Løgtingslóg nr. 34 frá 7. mai 2013 um Búnaðargrunn, sum seinast broytt við løgtingslóg nr. 90 frá 7. mai 2025

7. mai 2013Nr. 34

Løgtingslóg um Búnaðargrunn, sum seinast broytt við løgtingslóg nr. 90 frá 7. mai 2025

• Kapittul 1 Stovnsetan grunsins og endamál
• Kapittul 2 Fæ grunsins
• Kapittul 3 Treytir fyri lánsveiting
• Kapittul 3 a Fígging av festikontu og felags festipulju
• Kapittul 4 Leiðsla grunsins
• Kapittul 5 Eftirlit, avtøka, útlutan, kæra o.a.
• Kapittul 6 Revsiásetingar
• Kapittul 7 Gildiskoma

Kapittul 1

Stovnsetan grunsins og endamál

§ 1. ^{1) 2)} Búnaðargrunnurin hevur til endamáls at veita fígging til føroyskan landbúnað.

Stk. 2. ²⁾ Fígging kann verða latin sum lán ella stuðul ella sum ein samanseting av báðum.

§ 2. ^{1) 2)} Búnaðargrunnurin fíggjar kostnaðin av at fyrisita landsjørðina.

Kapittul 2

Fæ grunsins

§ 3. ²⁾ Fæ grunsins fevnir um allar ognir Búnaðargrunsins umframt pening á festikontu, pening í felags festipulju og pening á kontu, ætlað til stuðul til at menna og gagnnýta landbúnaðarframleiðslu.

Stk. 2. ²⁾ Landsjørðin er ikki partur av fæi grunsins, hóast ávísar ognir eru tinglýstar sum ogn grunsins, og skal skrásetast og tinglýsast sum ogn hjá Føroya landsstýri við frámerkinum “Føroya landsstýrið: Landsjørð.”

§ 4. Búnaðargrunnurin yvirtekur øll rættindi og allar skyldur hjá Jarðargrunninum og Grunninum fyri vakstrarhús og grønmetisframleiðslu.

§ 5. ²⁾ Tá føst ogn hjá landinum, sum hoyrir til eitt festi, verður seld, verður sølupeningurin fluttur Búnaðargrunninum.

Stk. 2. ²⁾ 20% av upphæddini, nevnd í stk. 1, verða sett á serstaka kontu, sbrt. § 10 c, sum er markað til stuðul til at menna og gagnnýta landbúnaðarframleiðslu.

Stk. 3. ²⁾ 80% av upphæddini, nevnd í stk. 1, verður býtt javnt millum festikontuna hjá avvarðandi festi og felags festipuljuna.

Stk. 4. ²⁾ (Strikað).

Stk. 5. ²⁾ (Strikað).

Stk. 6. ²⁾ (Strikað).

§ 6. ²⁾ Stýrið skal tryggja ognir grunsins best møguligt og skal ansa eftir at fáa mest møguligt avkast.

Stk. 2. ²⁾ Íløgurøktin skal støðugt vera í samsvari við íløgupolitikk landsins.

Serstudningur ³⁾

§ 6 a. ^{3) 2)} (Strikað).

Stk. 2. ²⁾ (Strikað).

§ 6 b. ^{3) 2)} (Strikað).

§ 6 c. ^{3) 4) 5) 2)} Av innistandandi upphædd 1. januar 2013, markað til Royndarstøðina í Hoyvík, verða kr. 5,0 mió. nýttar til antikvariska serskipan í Koltri soleiðis, at í árunum 2014 til 2025 flytur Búnaðargrunnurin landskassanum upphæddina, í síni heild ella lutvíst, eftir umbøn frá Søvnum landsins fyri staðfesta nýtslu.

Stk. 2. ²⁾ Avvarðandi landsstýrismaður kann innan egið málsøki áseta treytir um nýtslu av serstudninginum sbrt. stk. 1.

Kapittul 3

Treytir fyri lánsveiting

§ 7. ^{1) 2)} Búnaðargrunnurin kann veita lán til íløgur, sum eru natúrliga knýttar at landbúnaðarvirksemi.

Stk. 2. ^{1) 2)} Lán eftir stk. 1 er treytað av, at umsøkjarin hevur fastan bústað í Føroyum, hevur ræðið á sínum búgvi, rekur ella ætlar at reka vinnuligan landbúnað, er bókhaldsskyldugur eftir løgtingslóg um bókhald og er mvg-skrásettur eftir løgtingslóg um meirvirðisgjald.

Stk. 3. ^{1) 2)} Lán eftir stk. 1 er harumframt treytað av, at umsøkjarin hevur neyðugan verkligan og ástøðiligan førleika til at reka tað landbúnaðarvirksemi, sum lánið fevnir um, at umsøkjarin kann vísa á, at ætlaða virksemið kann bera fíggingina, og at umsøkjarin kann veita hóskandi trygd, sbr. § 7 a, stk. 1.

Stk. 4. ^{1) 2)} Grunnurin skal tryggja, at lán verður brúkt samsvarandi játtanini.

Stk. 5. ^{1) 2)} Tekur grunnurin ikki aðra avgerð, fellur lánið til gjaldingar, um lánið heilt ella lutvíst verður brúkt til annað endamál enn tað, tað varð játtað til.

Stk. 6. ^{1) 2)} (Strikað).

§ 7 a. ²⁾ Um umsøkjarin sjálvur eigur ognina, sum lán eftir § 7 verður veitt til, skal lánið úr Búnaðargrunninum verða tryggjað við 1. veðrætti í fastogn ella leysafæ innan fyri 80% av virðinum.

Stk. 2. Grunnurin skal treyta sær, at fastognin ella leysafæið ikki er ella verður sett í veð fyri aðra skuld.

Stk. 3. Alt lánið fellur til gjaldingar beinanvegin, um ognin, sum lánið er veitt til, verður seld, uttan so, at keyparin yvirtekur lánið eftir verandi treytum.

§ 8. Um lántakari ikki megnar at gjalda skuld til Búnaðargrunnin, hevur grunnurin heimild at gera avtalu við lántakaran um eitt lægri lánsgjald í eitt avmarkað tíðarskeið, tó so, at skuldin ikki veksur.

§ 9. ¹⁾ Um lántakari ikki megnar at gjalda skuld til Búnaðargrunnin, tí skuldin er størri enn virksemið kann bera, kann grunnurin, eftir neyvari meting av framtíðarinntøkumøguleikunum og fíggjarstøðuni hjá lántakaranum í síni heild, strika partar av skuldini. Er talan um festara, skal grunnurin í hesum sambandi boða jarðarumsitingini frá, og skal jarðarumsitingin taka støðu festarans til viðgerðar.

Stk. 2. ¹⁾ Skuld kann einans strikast, um mett verður, at lítlir og eingir møguleikar eru fyri, at grunnurin fær alla sína áogn aftur, og avsett er móti tapi frammanundan.

Stk. 3. ¹⁾ Nágreinilig meting skal gerast av gjaldsevnunum hjá lántakaranum, sum samanhildið við skuld hansara og trygdarvirðini hjá grunninum verður grundarlag fyri støðutakan til møguliga striking. Partur av hesum grundarlagnum er eisini meting av, um lántakari við forsvarligum og nøktandi rakstri átti at kunna røkt lánsskyldurnar.

Stk. 4. ¹⁾ Grunnurin skal uppbyggja fastar mannagongdir fyri umsóknir og viðgerð av málum um avskriving av skuld. Landsstýrismaðurin ásetur í kunngerð nágreiniligari treytir og reglur hesum viðvíkjandi.

Stk. 5. ¹⁾ Í sambandi við festiskifti kann grunnurin, í samráð við jarðarfyrisitingina, taka mál um avskriving av skuld til viðgerðar, um hetta er ein fortreyt fyri, at nýggjur festari kann taka við festinum. Viðgerðin av tílíkum málum fylgir somu reglum sum í øðrum málum um avskriving av skuld.

§ 10. Landsstýrismaðurin ásetur nærri reglur fyri lánsveiting, herundir rentu- og afturgjaldstreytir, og hvørjar treytir lántakari skal lúka.

Kapittul 3 a

Fígging av festikontu og felags festipulju

§ 10 a. ^{1) 2)} Búnaðargrunnurin kann eftir umsókn játta festum stuðul av festikontu ella úr felags festipulju til ætlanir, sum hava til endamáls at skapa varandi virðisøking á festinum.

Stk. 2. ²⁾ Umsøkjarin skal lúka treytirnar í § 7, stk. 2 og 3.

Stk. 3. ²⁾ Játtast kunnu upp í 70% av samlaða íløgukostnaðinum.

Stk. 4. ²⁾ Búnaðargrunnurin skal ansa eftir, at stuðulin verður brúktur samsvarandi játtanini.

Stk. 5. ²⁾ Stuðul, veittur eftir hesi áseting, verður heilt ella partvíst kravdur afturgoldin, um stuðulin ella tað, sum stuðul varð latin til, heilt ella partvíst, er brúkt til annað endamál, enn tað, hann varð játtaður til.

Stk. 6. ²⁾ Landsstýrismaðurin kann áseta nærri reglur fyri at játta stuðul eftir hesi áseting.

Stk. 7. ²⁾ (Strikað).

§ 10 b. ^{1) 2)} Búnaðargrunnurin kann veita lán ella stuðul til nýskapandi tiltøk og verkætlanir, sum nevndin metir kunnu vera við til at menna vinnumøguleikarnar innan landbúnaðin.

Stk. 2. ²⁾ Lán, veitt eftir hesi áseting, skal fylgja ásetingunum í § 7 og § 7 a.

Stk. 3. ²⁾ Búnaðargrunnurin skal ansa eftir, at stuðulin verður brúktur samsvarandi játtanini.

Stk. 4. ²⁾ Stuðul, veittur eftir hesi áseting, verður heilt ella partvíst kravdur afturgoldin, um stuðulin ella tað, sum stuðul varð latin til, heilt ella partvíst, er brúkt til annað endamál, enn tað, hann varð játtaður til.

Stk. 5. ²⁾ Landsstýrismaðurin kann áseta nærri reglur fyri at játta lán og stuðul eftir hesi áseting.

§ 10 c. ²⁾ Av fæi grunsins verða 10 mió. kr. settar á serstaka kontu, ætlað til stuðul at menna og gagnnýta landbúnaðarframleiðslu.

Stk. 2. Upphæddin, nevnd í stk. 1, verður flutt Búnaðarstovuni við tveimum milliónum kr. um árið í fimm ár, saman við inntøkuni av sølu av landsjørð eftir § 5, stk. 2.

Stk. 3. Landbúnaðarstuðul eftir stk. 1 verður latin samsvarandi ásetingunum í løgtingslóg um landbúnaðarstuðul.

Kapittul 4

Leiðsla grunsins

§ 11. Búnaðargrunnurin verður fyrisitin av einum stýri við 5 limum, umframt 5 tiltakslimum, harav landsstýrismaðurin velur 4 stýrislimir og 4 tiltakslimir, og teir 4 stýrislimirnir velja í felag ein 5. stýrislim og tiltakslim. 5. stýrislimurin skal hava løgfrøðiligt ella búskaparfrøðiligt embætisprógv og skal ikki vera starvsettur í fyrisiting landsstýrisins ella á stovni undir landsstýrinum. Av teimum 4 stýrislimunum og tiltakslimunum, sum landsstýrismaðurin velur, verða ein stýrislimur og ein tiltakslimur valdir eftir tilmæli frá Bóndafelagnum, og ein stýrislimur og ein tiltakslimur verða valdir eftir tilmæli frá Óðalsfelagnum. Stýrið skipar seg sjálvt, og setur stjóran fyri grunnin.

Stk. 2. Stýrið verður valt fyri 3 ár. Stýrislimir og tiltakslimir kunnu veljast aftur upp til tvær ferðir.

Stk. 3. Stýrislimirnir skulu hava innlit í løgfrøði, búskap, fyrisiting og landbúnaðarvinnu.

Stk. 4. Landsstýrismaðurin ger viðtøkur fyri grunnin. Stýrið ger reglur um fyrisiting og virksemi grunsins.

Stk. 5. Avgerðir hjá Búnaðargrunninum sbrt. lógini kunnu ikki kærast til annan fyrisitingarligan myndugleika.

Kapittul 5

Eftirlit, avtøka, útlutan, kæra o.a. ²⁾

§ 12. Landsstýrismaðurin hevur eftirlit við grunninum, og undir hesum hvussu ognir grunsins verða settar sambært § 6.

§ 13. Inntøkur og útreiðslur hjá Búnaðargrunninum skulu ikki takast við í løgtingsfíggjarlóg.

§ 14. Roknskaparhaldið skal fylgja lógini um landsins almenna roknskaparhald v.m., tó soleiðis, at niðurskrivingar móti væntandi tapum upp á útlán roknskaparliga skulu viðgerast samsvarandi reglunum fyri peningastovnarnar.

Stk. 2. Roknskapirnir hjá Búnaðargrunninum verða grannskoðaðir av løggildum grannskoðara og skulu sendast landsstýrismanninum við frágreiðing um virksemið í farna árinum. Roknskapirnir verða lagdir fyri Løgtingið sambært ásetingunum í stýrisskipanarlógini.

§ 15. Búnaðargrunnurin rindar á hvørjum ári eina upphædd til landskassan svarandi til kostnaðin av at reka jarðarumsitingina.

§ 16. Grunnurin kann takast av við lóg. Verður grunnurin tikin av, yvirtekur landskassin ognir grunsins og rættindi og skyldur hjá grunninum.

§ 16 a. Búnaðargrunninum verður heimilað at rinda landskassanum part av úrslitinum eftir skatt.

§ 16 b. ²⁾ Avgerðir Búnaðargrunsins eftir løgtingslógini kunnu ikki kærast til annan fyrisitingarligan myndugleika.

Kapittul 6

Revsiásetingar

§ 17. ^{1) 2)} Er ikki hægri revsing ásett í aðrari lóggávu, verður við sekt revsaður tann, sum gevur skeivar ella villleiðandi upplýsingar í sambandi við umsóknir o.a. eftir § 7, § 7 a, § 8, § 9, §§ 10 a og 10 b.

Stk. 2. ²⁾ Í reglum, givnar við heimild í hesi løgtingslóg, kann verða ásett, at brot á reglurnar verður revsað við sekt.

Stk. 3. ²⁾ Revsiábyrgd kann verða áløgd løgfrøðiligum persónum eftir reglunum í 5. kapitli í revsilógini.

Kapittul 7

Gildiskoma

§ 18. Henda løgtingslóg kemur í gildi dagin eftir, at hon er kunngjørd, og hevur virknað frá 1. mai 2013.

Stk. 2. Hóast ásetingina í § 11, halda limirnir í stýrinum fyri Búnaðargrunnin, sum vórðu valdir sambært løgtingslóg nr. 21 frá 17. mai 2004 um Búnaðargrunn, sum seinast broytt við løgtingslóg nr. 122 frá 7. desember 2012, fram sum stýrislimir í Búnaðargrunninum tað, ið var eftir av starvstíðini sum limir í stýrinum, tá nevnda lóg fór úr gildi 1. mai 2013.

Tórshavn, 7. mai 2013

Kaj Leo Holm Johannesen (sign.)

løgmaður

Lm. nr. 152/2012