Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
5. mai 2021Nr. 75
Løgtingslóg um elektriskan útbúnað, elektriskar innleggingar og elektriskt tilfar
(Eltrygdarlógin)
Samsvarandi samtykt Løgtingsins staðfestir og kunnger løgmaður hesa løgtingslóg:
Kapittul 1
Virkisøki og allýsingar
§ 1. Løgtingslógin er galdandi fyri elektriskan útbúnað og elektriskar innleggingar við so høgum spenningi ella stórari streymstyrki, sum vandi kann standast av. Løgtingslógin er eisini galdandi fyri elektriskt tilfar.
§ 2. Við elektriskan útbúnað skilst í hesi løgtingslóg allur útbúnaður til framleiðslu, flyting, býti og goymslu av elmegi. Elektriskur útbúnaður fevnir bæði um háspenningsútbúnað og lágspenningsútbúnað og er ikki avmarkaður til spenningsmark.
Stk. 2. Við elektriska innlegging skilst í hesi løgtingslóg øll innleggingin frá elektriska útbúnaðinum fram til og við íbundið elektriskt tilfar og leiðingar, undantikið innleggingar umborð á skipum, á flytførum frálandaútbúnaði, umborð á flogførum umframt elektriskar innleggingar í motorakførum, sum eru ætlaðar sum drívmegi í motorakførum, undantikið løðistikkið til eldrivin motorakfør.
Stk. 3. Við elektriskt tilfar skilst í hesi løgtingslóg eitthvørt slag av tilfari, sum er partur av, ella er ætlað at verða partur av elektriskum útbúnaði ella elektriskari innlegging, ella sum skal setast til elektriska útbúnaðin ella elektrisku innleggingina, undantikið elektriskt tilfar sum er serliga roknað til nýtslu umborð á skipum og aliflakum, flytførum frálandaútbúnaði ella í flogførum, umframt elektriskt tilfar í motorakførum, ið er ætlað til rakstur av motorakfarinum, undantikið løðistikk, sum er ætlað sum partur av eldrivnum motorakførum.
Kapittul 2
Trygdarkrøv o.a.
§ 3. Elektriskur útbúnaður og elektriskar innleggingar skulu gerast og rekast á ein slíkan hátt, at hesar ikki eru til vanda fyri persónar, húsdjór ella ogn.
§ 4. Elektriskt tilfar skal verða framleitt á ein slíkan hátt, at tað, við rættari innlegging og viðlíkahaldi og við nýtslu í samsvari við endamálið við tí undir vanligum umstøðum, ikki er til vanda fyri persónar, húsdjór ella ogn.
§ 5. Landsstýrismaðurin kann áseta reglur um trygd fyri
1) gerð og rakstur av elektriskum útbúnaði,
2) gerð og rakstur av elektriskum innleggingum, elektriskt tilfar, og gerð og
3) rakstur av øðrum útbúnaði nærhendis ella í sambandi við elektriskan útbúnað ella elektriskar innleggingar.
Stk. 2. Landsstýrismaðurin kann áseta krav um skjalprógv viðvíkjandi gerð og rakstur av elektriskum útbúnaði og elektriskum innleggingum umframt elektriskum tilfari, sbr. stk. 1, nr. 1-3.
§ 6. Elnevndin kann í serligum førum geva fráviksloyvi frá krøvum í reglum, settar við heimild í § 5, stk. 1. Elnevndin kann áseta treytir fyri fráviksloyvinum.
Stk. 2. Elnevndin kann í serligum førum, tá umstøðurnar gera tað neyðugt, seta serlig trygdarkrøv, sum víkja frá krøvum í reglum, ásettar sbrt. § 5, stk. 1, ella seta krøv um serligar merkingar ella vegleiðingar viðvíkjandi elektriskum útbúnaði, elektriskum innleggingum og elektriskum tilfari.
Kapittul 3
Almennar skyldur o.a.
§ 7. Tann, ið ger ella rekur elektriskan útbúnað og elelektriskar innleggingar, skal fylgja reglum, ásettar sbrt. § 5, stk. 1, nr. 1 og 2. Verður í reglum, ið eru ásettar sbrt. hesum, víst til standardar, verður trygdarkravið í § 3 mett lokið, um ásettu reglurnar og teir standardar, sum reglurnar vísa til, eru fylgdar.
Stk. 2. Verða standardar, sum nevndir í stk. 1, ikki ella bert lutvíst nýttir, skal tað kunna skjalprógvast á hvønn hátt, ið trygdarkravið í § 3 er lokið. Skjalprógvanin skal vera til taks á føroyskum, donskum ella enskum.
Stk. 3. Landsstýrismaðurin kann áseta nærri reglur um skjalprógvan eftir stk. 2.
§ 8. Tann, ið framleiðir elektriskt tilfar, skal fylgja reglum, ásettar sbrt. § 5, stk. 1, nr. 3. Er tað í reglum, ásettar sbrt. § 5, stk. 1, nr. 3, víst til standardar, verður trygdarkravið í § 4 mett at vera lokið, um ásettu reglurnar og teir standardar, sum reglurnar vísa til, eru fylgd.
Stk. 2. Verða standardar, sum nevndir í stk. 1, ikki ella bert lutvíst nýttir, skal skjalprógvast, á hvønn hátt trygdarkravið í § 4 er lokið. Skjalprógvanin skal vera til taks á føroyskum, donskum ella enskum.
Stk. 3. Tann, ið framleiðir ella innflytur elektriskt tilfar til Føroyar, hevur ábyrgd av, at allar upplýsingar, ið eru neyðugar fyri, at elektriska tilfarið kann verða nýtt samsvarandi sínum endamáli uttan at elva til vanda, eru settar sjónliga á elektriska tilfarið. Ber hetta ikki til, skulu upplýsingarnar síggjast í vegleiðing, ið er løgd við. Upplýsingarnar skulu vera á føroyskum, donskum ella enskum.
Stk. 4. Tann, ið framleiðir ella innflytur elektriskt tilfar sum savningarsett til Føroyar, hevur ábyrgd av, at vegleiðing fylgir við, soleiðis at elektriska tilfarið lýkur § 4, um vegleiðingin verður fylgd. Hetta sama er galdandi fyri fylgilutir til elektriska tilfarið.
Stk. 5. Landsstýrismaðurin kann áseta nærri reglur um skjalprógvan eftir stk. 2.
§ 9. Eigari ella brúkari av elektriskum útbúnaði hevur ábyrgd av, at elektriski útbúnaðurin lýkur reglur, ásettar sbrt. § 5, stk. 1, nr. 1, umframt trygdarkravið í § 3.
Stk. 2. Eigari ella brúkari av elektriskum útbúnaði hevur ábyrgd av, at útbúnaðurin verður rikin og hildin við líka á fullgóðan hátt samsvarandi reglum, ásettar sbrt. § 5, stk. 1, nr. 1. Eigari ella brúkari av elektriskum útbúnaði skal eisini fáa í rættlag feilir og manglar skjótast gjørligt, umframt skjótast gjørligt seta tiltøk í verk fyri at forða fyri, at feilir og manglar kunnu hava við sær vanda, sbr. § 3.
Stk. 3. Eigari ella brúkari av elektriskum útbúnaði skal vísa ansni fyri at forða fyri, at útbúnaðurin verður yvirlastaður.
§ 10. Eigari ella brúkari av elektriskari innlegging hevur ábyrgdina av, at innleggingin lýkur reglur, ásettar sbrt. § 5, stk. 1, nr. 2, umframt trygdarkravið í § 3.
Stk. 2. Eigari ella brúkari av elektriskari innlegging hevur ábyrgd av, at innleggingin verður rikin og viðlíkahildin á fullgóðan hátt samsvarandi reglum sbrt. § 5, stk. 1, nr. 2. Eigari ella brúkari av elektriskari innlegging skal eisini fáa í rættlag feilir og manglar skjótast gjørligt, umframt skjótast gjørligt seta tiltøk í verk til tess at forða fyri, at feilir og manglar kunnu hava við sær vanda, sbr. § 3.
Stk. 3. Eigari ella brúkari av elektriskari innlegging skal vísa ansni til tess at forða fyri, at innleggingin verður yvirlastað.
§ 11. Tann, ið rekur ein elektriskan útbúnað til at veita elektriska orku, kann ikki, sum treyt fyri at veita elektrisitet til brúkaran, seta strangari trygdarkrøv enn tey, ið fylgja av reglum, ásettar sbrt. § 5, stk. 1.
§ 12. Tann, ið rekur ein elektriskan útbúnað, skal rinda endurgjald fyri skaða á persón ella góðs, sum útbúnaðurin er atvold til, uttan so, at tað verður prógvað, at ikki kundi verið sloppið undan skaðanum við tí ansni og nærlagni, sum rakstur av slíkum útbúnaði krevur.
Stk. 2. Um skaðin er voldur av ymiskum elektriskum útbúnaði, hefta øll, ið reka útbúnaðin, samhaldsfast mótvegis tí, ið hevur verið fyri skaða, uttan so, at tann, ið rekur ein av hesum útbúnaði, kann prógva, at skaðin ikki kann vera elvdur av hesum útbúnaði. Tey, ið reka skaðaelvandi útbúnað, hefta javnbjóðis fyri at rinda endurgjaldið, um onnur avtala ikki er gjørd.
Kapittul 4
Eftirlit
§ 13. Elnevndin hevur eftirlit við, at henda løgtingslógin og reglur, settar sbrt. løgtingslógini, verða hildnar.
Stk. 2. Elnevndin kann krevja at fáa allar upplýsingar, ið eru neyðugar fyri at fremja eftirlitið sbrt. stk. 1. Upplýsingarnar kunnu útvegast við at venda sær til fyritøkur ella persónar, ið projektera, reka og gera elektriskan útbúnað ella elektriskar innleggingar, eigarar og brúkarar av elektriskum útbúnaði ella elektriskum innleggingum, umframt øll umsetningarlið av elektriskum tilfari.
Stk. 3. Elnevndin ella myndugleikar, netfelag ella privatar fyritøkur, sum eru heimilað sbrt. § 23, stk. 1, kunnu ikki lata øðrum upplýsingar um, at Elnevndin hevur fingið fráboðan frá einum arbeiðstakara ella hansara umboðsfólki.
§ 14. Elnevndin, ella tann, ið Elnevndin heimilar til tað, hava til eina og hvørja tíð við viðkomandi samleikaprógvi og uttan rættarúrskurð atgongd til almennar og privatar ognir og støð fyri at útvega upplýsingar, ið skulu brúkast til eftirlit við hesi løgtingslóg.
Stk. 2. Um neyðugt, veitir løgreglan Elnevndini stuðul til hetta.
§ 15. Elnevndin kann geva boð um, at eigari ella brúkari av elektriskum útbúnaði ella elektriskari innlegging letur løggilda elinnleggingarfyritøku fremja eftirlit av útbúnaðinum ella av innleggingini fyri rokning eigarans ella brúkarans.
§ 16. Elnevndin kann geva eigaranum ella brúkaranum av elektriskum útbúnaði ella elektriskari innlegging boð um at bøta um feilir og manglar við útbúnaðinum ella innleggingini fyri rokning eigarans ella brúkarans.
§ 17. Elnevndin kann seta forboð fyri nýtslu av elektriskum útbúnaði og elektriskum innleggingum, ið ikki halda reglur ásettar sbrt. § 5, stk. 1, nr. 1 og 2 ella trygdarkravið í § 3.
Stk. 2. Verður framt brot á forboð eftir stk. 1, kann Elnevndin lata elveitingina til viðkomandi útbúnað ella viðkomandi innlegging slíta fyri rokning eigarans ella brúkarans. Elnevndin kann geva netfelagnum boð um at slíta elveitingina, um forboð eftir stk. 1 verður brotið.
Stk. 3. Elnevndin kann krevja, at kostnaðir av at slíta elveitingina verða endurrindaðir av tí, ið er álagdur forboð eftir stk. 1.
§ 18. Elnevndin kann, uttan at rinda fyri tað, taka elektriskt tilfar út til nýtslu í eftirlitinum eftir § 13, stk. 1.
Stk. 2. Elnevndin kann gera ella lata gera tekniska kanning av elektriskum tilfari, sum er tikið út eftir stk. 1. Elnevndin kann krevja, at kostnaðir av uttanhýsis kanningum verða endurrindaðir av tí, sum í sambandi við kanningina fær fráboðað boð ella forboð eftir § 19 og § 20, stk. 1 og 2.
§ 19. Elnevndin kann geva boð um, at bøtt verður um feilir og manglar við elektriskum tilfari, ið ikki heldur reglur, ásettar sbrt. § 5, stk. 1, nr. 3 ella trygdarkravið í § 4.
§ 20. Elnevndin kann seta forboð fyri sølu, útflýggjan, innlegging ella brúki av elektriskum tilfari, ið ikki heldur reglur, ásettar sbrt. § 5, stk. 1, nr. 3, ella trygdarkravið í § 4.
Stk. 2. Elnevndin kann geva boð um, at elektriskt tilfar, sum er fevnt av forboði eftir stk. 1, verður tikið aftur frá marknaðinum, verður afturkallað frá brúkarum ella verður fyribeint.
Stk. 3. Elnevndin kann geva boð um, at elektriskt tilfar, sum er fevnt av forboði eftir stk. 1, verður koblað frá.
Stk. 4. Verða boð eftir stk. 3 ikki hildin, kann Elnevndin geva eini løggildari innleggingarfyritøku boð um at frákobla elektriska tilfarið, um tað er fast innlagt. Elnevndin kann krevja kostnaðin av frákopling endurrindaðan av tí, sum hevur fingið fráboðan um boð eftir stk. 3.
§ 21. Elnevndin kann geva tí, ið hevur fingið fráboðað undantaksloyvi eftir treytum eftir § 6, stk. 1, boð um at halda hesar.
§ 22. Elnevndin kann upplýsa almenningin um vandan við elektriskum útbúnaði, elektriskum innleggingum og elektriskum tilfari, tá boð ella forboð eru givin eftir §§ 15 og 16, § 17, stk. 1, § 19 og § 20, stk. 1 og 2.
Stk. 2. Við kunning eftir stk. 1 kann Elnevndin einans lata víðari upplýsingar, sum hava eyðkenni av handilsloynidómum, tá hetta verður mett neyðugt fyri at verja trygdina hjá brúkarunum.
§ 23. Elnevndin kann, við góðkenning frá landstýrismanninum, heimila øðrum myndugleikum, netfelagi ella privatum fyritøkum, at:
1) fremja eftirlitsuppgávur eftir § 13, stk. 1,
2) hjálpa Elnevndini at fremja eftirlitsuppgávur eftir § 13, stk. 1, ella
3) geva boð ella seta forboð eftir §§ 15 og 16, § 17, stk. 1, § 19 og § 20, stk. 1 og 2.
Stk. 2. Elnevndin kann í sambandi við eina heimilan eftir stk. 1 seta krav um, at myndugleikin, netfelagið ella privata fyritøkan er akreditterað av Den Danske Akkrediteringsfond, DANAK. Viðkomandi myndugleiki, netfelag ella fyritøka skal gjalda fyri kostnaðir í sambandi við akkredittering.
Stk. 3. Elnevndin kann, í sambandi við heimilan eftir stk. 1, seta krøv um gegni, um tekniskar førleikar og um ábyrgdartrygging. Elnevndin kann eisini seta krav um, at boð ella forboð fevna um upplýsingar um kærumøguleikar sbr. § 37, stk. 2.
Stk. 4. Starvsfólk hjá myndugleikum, netfelagi og fyritøkum, ið eru heimilað sbrt. stk. 1, hava tagnarskyldu sbrt. §§ 152-152 f í revsilógini.
Kapittul 5
Elnevndin
§ 24. Nevndin røkir tær uppgávur, ið eru álagdar nevndini í hesi løgtingslóg ella í reglum, settum sbrt. løgtingslógini. Elnevndin skal umframt vera landsstýrismanninum til hjálpar í neyðugan mun við ráðum o.s.fr. í spurningum, sum koma undir hesa løgtingslóg.
Stk. 2. Elnevndin er samansett av formanni, ið skal vera løgfrøðingur, rakstrarleiðaranum í netfelagnum, stjóranum á Landsverki, einum góðkendum elinnleggjara, sum Føroya Handverksmeistarafelag tilnevnir, og einum limi við elfrøðiligari útbúgving. Landsstýrimaðurin tilnevnir formannin og seinast nevnda lim.
Stk. 3. Nevndarlimunum kann verða veitt árlig samsýning og fáa teir endurgjald fyri skjalprógvaðar ferðaútreiðslur. Teir limir, sum ikki fáa samsýning, fáa dagpening samsvarandi landsstýrisins reglum um samsýning til limir í nevndum, ráðum o.ø.
Stk. 4. Nevndin ger uppskot til starvsskipan, ið landsstýrið skal góðkenna.
Stk. 5. Nevndin kann fáa sær neyðug hjálparfólk.
Stk. 6. Undir Elnevndini er avgreiðsluskrivstova, sum eftir nærri avgerð nevndarinnar og góðkenning landsstýrimansins, kann verða løgd til netfelag, ella stovn undir landsstýrismanninum.
Kapittul 6
Órógv á raksturin av øðrum virkjum
§ 25. Elektriskur útbúnaður skal ikki órógva raksturin av øðrum virkjum, ið eru. Kann við trygdartiltøkum sleppast undan slíkari órógv, ber virkiseigarin ella nýtarin, ið hevur verið atvoldin til órónna, kostnaðin av slíkum tiltøkum. Hini virkini skulu tó bera ein hóskandi part av útreiðslunum, um tiltøkini, ið verða sett í verk, hava við sær munandi fyrimunir fyri rakstur teirra.
Stk. 2. Um semja ikki fæst, verða hesir spurningar avgjørdir av serligari nevnd. Tað snýr seg um:
1) hvørji trygdartiltøk skulu verða tikin til tess at útihýsa órónni,
2) hvørt ein elektriskur útbúnaður ger, at raksturin av verandi virki verður fyri órógv,
3) hvør ið skal seta trygdartiltøkini í verk, og
4) um og í hvønn mun hini virkini skulu bera útreiðslurnar í sambandi við hetta.
Stk. 3. Avgerð nevndarinnar eftir stk. 2 er endalig og bindandi fyri partarnar.
Stk. 4. Nevndin kann gera av, at ikki kann verða farið undir bygging ella rakstur av elektriska útbúnaðinum, fyrr enn tey trygdartiltøk, sum verða hildin neyðug, eru framd.
Stk. 5. Í avgerðini ásetir nevndin, hvør av pørtunum skal bera kostnaðin av nevndarviðgerðini av málinum og við hvørjari upphædd.
Stk. 6. Tann serliga nevndin er samansett av sorinskrivaranum ella einum av fulltrúum hansara sum formanni og 2 øðrum limum, ið verða tilnevndir frá einum máli til annað av Elnevndini uttan um teir.
Kapittul 7
Ognartøka
§ 26. Elektriskar leiðingar kunnu verða leiddar yvir og undir gøtur og vegir, tá ið tær kunna verða lagdar uttan ampa fyri ferðsluna.
Stk. 2. Áðrenn farið verður undir arbeiðið, skal verða boðað eigaranum av vegnum frá hesum 4 vikur frammanundan. Eigarin av vegnum kann innan 3 vikur aftan á fráboðanina mótmæla, at leiðingarnar verða leiddar, til Elnevndina.
Stk. 3. Aftan á tinging við partarnar, løgregluna og vegamyndugleikan ger Elnevndin endaliga av, um og á hvønn hátt leiðingarnar kunnu verða leiddar.
Stk. 4. Um Elnevndin metir, at tað at føra fram leiðingar fer at hava við sær fíggjarligan miss hjá eigaranum av vegnum, ella um elsteyrar, stengur o.tíl. skulu setast upp á vegaøkinum, skal verða farið fram eftir reglunum í §§ 27-32.
§ 27. Tá ið almannagagnið krevur tað, kann landsstýrismaðurin loyva, at farið verður undir ognartøku viðvíkjandi fastari ogn eftir reglunum í hesi grein, sbr. §§ 29-32, til at leggja undir ella oman á jørð leiðingar við mastrum, transformarastøðum o.tíl., ið hoyra til, tá ið útbúnaðurin er ætlaður til flyting og býti av elmegi til spenningar niðan fyri 72kV.
Stk. 2. Um landsstýrismaðurin ikki beinavegin sýtir umsókn eftir stk. 1, letur landsstýrismaðurin Elnevndini málið til kanningar og ummælis.
Stk. 3. Elnevndin sær til, at eigarar og nýtarar av teimum økjum, ið munnu ætlast at verða nervað av tí ætlaða útbúnaðinum, við innskrivaðum brævi fáa boð um umsóknina og um hvørji rættindi, ið ynskt verða. Samstundis verður mælt teimum til innan 3 vikur, aftan á at boðini eru send, at seta fram tær atfinningar, teir hava móti umsóknini. Somuleiðis verður at boða kommunustýrunum í teimum kommunum, sum útbúnaðurin nemur við, frá.
Stk. 4. Elnevndin kunnger 2 reisur í landsumfatandi almennum blað ella bløðum, ella elektróniskum miðlum at umsóknin er fingin og við tilskilan av innihaldinum í umsóknini, og hvørji rættindi ynskt verður at fáa. Ein og hvør, ið hevur rættarligan áhuga at røkja í sambandi við umsóknina, og sum ikki serstakliga hevur fingið boð, sbr. stk. 3, verður biðin innan 3 vikur frá seinastu kunngerð í almennum landsumfatandi blað ella bløðum , ella elektróniskum miðlum at seta fram sínar viðmerkingar fyri Elnevndini.
Stk. 5. Umsøkjarin skal geva Elnevndini allar tær upplýsingar um útbúnaðin og rakstur tess, sum eru neyðugar til meting av umsóknini.
Stk. 6. Elnevndin gevur ummæli til landsstýrismannin, sum ger av, hvørt umsóknin kann verða játtað.
§ 28. Við atliti at gerð av útbúnaðum, sum koma undir § 27, hevur tann, ið eigur býtisútbúnaðin, heimild at gera neyðugar fyrireikandi uppmátingar og onnur tøknilig fyrireikingararbeiði og kanningar.
Stk. 2. Til at fara undir tey fyrireikingararbeiðir og tær kanningar, sum nevndar eru í stk. 1, skulu teir avvarðandi eigarar og nýtarar í minsta lagi 14 dagar frammanundan fáa serstakt boð um hetta. Ber hetta ikki til, verður kunngjørt soleiðis, sum mett verður hóskandi á staðnum.
Stk. 3. Teir skaðar, ið standast av arbeiðinum, skulu verða endurgoldnir. Fæst ikki friðarsemja um støddina á endurgjaldinum, verður hetta ásett av Elnevndini. Avgerðin hjá Elnevndini kann verða skotin inn fyri landsstýrismannin.
Stk. 4. Tann, ið við vilja tekur burtur, avlagar ella løstar merkingar, sum verða gjørdar í sambandi við fyrireikingararbeiðini, verður revsaður við sekt, uttan so, at strangari revsing er uppiborin eftir revsilógini.
§ 29. Tá ið landsstýrismaðurin eftir § 27 hevur givið loyvi til ognartøku viðvíkjandi fastari ogn, boðar Elnevndin bæði tí ella teimum, ið hava fingið loyvi, og eigarum og nýtarum av tí føstu ognini til fundar á viðkomandi økinum, ella har Elnevndin heldur hóskandi. Fráboðan um fundin verður givin við 14 daga freist við innskrivaðum brævi ella við stevningarmonnunum. Nevndin ger av, hvørjir av hennara limum skulu luttaka.
Stk. 2. Á fundinum tingast Elnevndin við partarnar um ta gjølligaru skipanina. Fæst ikki semja, ella koma ikki allir av eigarunum ella nýtarunum á fundin, ásetir nevndin innan karmin av loyvi landsstýrismansins innihaldið og víddina av teimum rættindum á hvørjari ogn sær, ið verður at ognast, meðan spurningurin um støddina á endurgjaldinum verður skotin inn fyri gerðarrætt til ásetingar.
Stk. 3. Elnevndin kann gera av, at tann ella teir, sum hava fingið loyvið, skulu veita trygd fyri greiðslu av endurgjaldinum, áðrenn arbeiðið byrjar. Verður ikki semja millum partarnar, ger Elnevndin av, í hvørjum peningastovni trygdin verður latin til varðveitslu.
§ 30. Gerðarrætturin, sbr. § 29, stk. 2, hevur 2 limir. Tann ella teir, sum hava fingið loyvi sbr. § 27, og fastognareigararnir ella nýtararnir velja hvør sín lim. Um annar parturin ikki skrivliga hevur sagt hinum partinum frá sínum vali innan 14 dagar aftan á, at hin seinri hevur boðað frá sínum vali, missir hin fyrri sín rætt til at velja sín lim, soleiðis at hin parturin eisini hevur rætt at velja hin limin.
Stk. 2. Um gerðarrætturin ikki kann semjast, tilnevnir sorinskrivarin ein ástøðumann. Ástøðumaðurin ger av, innan fyri markið av teimum ósambærligu áskoðanunum, teir spurningar, ið ósemjan er um.
Stk. 3. Úrskurðurin hjá gerðarrættinum verður fráboðaður báðum pørtum skrivliga. Úrskurðurin kann ikki verða skotin inn fyri annan fyrisitingarligan myndugleika.
§ 31. Upphæddin, sum eigarin av útbúnaðinum skal gjalda í endurgjaldi, verður at rinda avvarðandi eigara ella nýtara beinleiðis. Eigarin av útbúnaðinum hevur tó heimild til, áðrenn endurgjaldsupphæddin verður útgoldin, at krevja neyðuga sannan um, at veðhavarar, sum hava tinglýstan rætt, og onnur avvarðandi, samtykkja í útgjaldingini, og til slík sannan er til skjals, at lata endurgjaldsupphæddina í varðveitslu í peningastovni við tí avleiðing, at upphæddin við aftratkomnari rentu ikki kann verða tikin út uttan samtykki frá báðum pørtum.
§ 32. Sum prógv um, at rættindi til ogn hjá øðrum persóni er fingin, er úrskrift av tí, ið farið er fram í Elnevndini. Úrskriftina kann eigarin av útbúnaðinum lata tinglýsa sum skuldbinding í ognini.
§ 33. Tá ið almannagagnið krevur tað, kann landsstýrismaðurin aftan á at hava fingið ummæli frá Elnevndini, loyva, at sett verður í verk ognartøka viðvíkjandi fastogn eftir reglunum í lov om forpligtelse til jords afgivelse til offentlige veje, havne og landingssteder, samt til offentlige skoler på Færøerne, til útbúnað til framleiðslu, flyting, býti og goymslu av elmegi.
Stk. 2. Ognartøka sbr. stk. 1 kann fara fram til nýggjar útbúnaðir, til at vaksa um og broyta útbúnaðir, sum eru, til tryggingar av, at slíkir útbúnaðir verða verandi, til neyðug eyka tiltøk og vegna brúk, røkt, trygt virksemi og hóskiligan rakstur av teimum nevndu útbúnaðum, heruppií t.d. til orkustøðir, transformarastøðir, umformarastøðir, goymsluøki, ruskøki og leiðingar omaná og undir jørð við mastrum, ið hoyra til, og øðrum tilhoyri. Ognartøka sbr. stk. 1 kann eisini fara fram til teir útbúnaðir, ið nevndir eru í § 28. stk. 1.
Stk. 3. Í einari avtalu um avhending av rættindum yvir fastari ogn til útbúnaðir, sum ikki koma undir § 27, stk. 1, kann verða avgjørt, at gerðarrætturin, nevndur er í § 30, ásetir endurgjald fyri avhending. Avgerðin hjá gerðarrættinum kann tá verða viðgjørd við yvirmeting eftir reglunum í § 4 í lov om forpligtelse til jords afgivelse til offentlige veje, havne og landingssteder, samt til offentlige skoler på Færøerne.
Stk. 4. Reglurnar í § 28 um fyrireikandi uppmátingar hjá útbúnaðarhavaranum og onnur tøknilig fyrireikandi arbeiði og kanningar o.s.fr. verða nýttar samsvarandi.
Stk. 5. Við ognartøku av lendi í sambandi við nýtslu av vatnorku til elframleiðslu verða nýttar reglurnar í lov for Færøerne om benyttelse af indsøer og vandløb.
§ 34. Eigarin av útbúnaðinum ber allan kostnað av tí starvsemi við meira, sum nevnt er í §§ 26-33, heruppií dagpening og ferðaútreiðslur til limirnar í gerðarrættinum, sbr. § 30, eftir reglum landsstýrisins um samsýning til limir í nevndum, ráðum o.ø.
Kapittul 8
Undantøka frá kunngering í Kunngerðablaðnum
§ 35. Landsstýrismaðurin kann áseta reglur um, at fyriskipanir, ið eru settar í gildi sbrt. hesi løgtingslóg, sum innihalda krøv til fyritøkur, elektriskar útbúnaðir, elektriskar innleggingar og elektriskt tilfar o.tíl. og tekniskar nágreiningar, sum verða vístar til í slíkum fyriskipanum, ikki verða kunngjørdar í Kunngerðablaðnum.
Stk. 2. Landsstýrismaðurin ásetir reglur um, hvussu upplýsingar um innihaldið í fyriskipanum og tekniskum nágreiningum, sum ikki verða lýstar í Kunngerðablaðnum, sbr. stk. 1, skulu almannakunngerast.
Stk. 3. Landsstýrismaðurin kann áseta reglur um, at tekniskar nágreiningar, sum ikki verða lýstar í Kunngerðablaðnum, sbr. stk. 1, skulu vera galdandi, hóast hesar ikki eru á føroyskum ella donskum.
Kapittul 9
Fígging
§ 36. Í tann mun, tær ikki verða rindaðar av gjøldum o.a., verða útreiðslurnar til umsitingina av løgtingslógini rindaðar við avgjøldum. Avgjøldini verða um elrokningina til elbrúkarar uppkravd av netfelagnum, sum hevur ábyrgd av veitingartrygdini sambært løgtingslóg um framleiðslu, flutning og veiting av ravmagni. Avgjaldsupphæddin verður ásett á fíggjarløgtingslógini.
Kapittul 10
Kærumøguleikar
§ 37. Avgerðir, ið Elnevndin hevur tikið eftir hesi løgtingslóg ella reglum, settar sbrt. løgtingslógini, kunnu ikki leggjast fyri annan fyrisitingarligan myndugleika, sbr. tó § 28, stk. 3.
Stk. 2. Kæra um avgerð, sum er tikin av tí, sum Elnevndin hevur heimilað sbrt. § 23, stk. 1, kann leggjast fyri Elnevndina.
Stk. 3. Freistin at senda inn kæru, sum nevnt í stk. 2, er 4 vikur at rokna frá, at kæran er fráboðað viðkomandi.
Kapittul 11
Revsiásetingar
§ 38. Um ikki strangari revsing er uppiborin sbrt. aðrari lóggávu, verður tann sektaður við sekt, ið:
1) tilætlað brýtur §§ 3 ella 4,
2) setur til viks upplýsingarskylduna í § 13, stk. 2, ella
3) ikki aktar eini boð ella brýtur forboð eftir §§ 15 og 16, § 17, stk. 1 og 2, § 19, § 20, stk. 1-4 og § 21.
Stk. 2. Í reglum, ásettar sambært § 5, kann sektarrevsing ásetast fyri brot á reglurnar.
§ 39. Feløg og aðrir løgfrøðiligir persónar koma undir revsiábyrgd eftir reglunum í kapitli 5 í revsilógini
§ 40. Fyrningarfreistin fyri revsiábyrgd er 10 ár.
Kapittul 12
Gildiskoma
§ 41. Løgtingslógin kemur í gildi 1. januar 2022, og samstundis fer úr gildi løgtingslóg nr. 134 frá 10. juni 1993 um sterkstreymsútbúnað.
§ 42. Reglur, ið eru settar í gildi sbrt. løgtingslóg nr. 134 frá 10. juni 1993 um sterkstreymsútbúnað, verða verandi í gildi, til tær verða strikaðar, ella aðrar settar í staðin sbrt. hesi løgtingslóg, sbr. tó stk. 2.
Stk. 2. Landsstýrismaðurin kann í reglum, settar sbrt. stk. 1, áseta skiftisreglur.
Í Tinganesi, 5. mai 2021
Bárður á Steig Nielsen (sign.)
løgmaður
Lm. nr. 87/2020
