Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
22. mai 2015Nr. 72
Løgtingslóg um fjarskifti, sum seinast broytt við løgtingslóg nr. 31 frá 17. mars 2022
(Fjarskiftislógin)
Kapittul 1
Endamál, lógarøki og allýsingar
Endamál
§ 1. Endamál lógarinnar er at virka fyri einum vælskipaðum og nýskapandi marknaði fyri fjarskiftiskervi og fjarskiftistænastur til frama fyri allar endabrúkarar.
Lógarøki
§ 2. Lógin er galdandi fyri tann, sum bjóðar út fjarskiftiskervi ella fjarskiftistænastur, eigarar av fjarskiftiskervum, veitarar av teleterminalútbúnaði, ið verður nýttur til fartelefoni tænastur, veitarar av gjaldtelefonum, veitarar av nummarleiðbeiningardátugrunnum og nummarleiðbeingardátuskráum, veitarar av kunningartænastum og innihaldstænastum, veitarar av atgongustýritænastum og eigarar av ídnaðarliga ognarrættinum til atgongustýritænastur og atgongustýriskipanir.
Stk. 2. Lógin er galdandi fyri nýtslu og eftirliti við radiofrekvensum.
Stk. 3. Lógin er galdandi á føroyskum landøki og sjóøki, umframt fyri føroyskt skrásett skip og flogfør, undir hesum eisini frálanda innleggingar á føroysku landleiðunum.
Stk. 4. Lógin er ikki galdandi fyri innanhýsis elektroniskt samskifti á virkjum ella í húsarhaldum.
Allýsingar
§ 3. Eftir hesi lóg merkir:
1) Fjarskifti: Flyting, sending ella móttøka av tekni, signali, skrift, mynd, ljóði ella øðrum boðum av einhvørjum slagi, við hjálp av ljósi, radiosignali ella øðrum elektromagnetiskum signali í einum samskiftiskervi.
2) Fjarskiftiskervi: Eitt og hvørt radioborið ella tráðborið fjarskiftisundirstøðukervi, sum verður nýtt at miðla fjarskiftistænastur.
3) Fjarskiftistænasta: Tænasta, ið heilt ella partvíst er elektroniskur flutningur av samskifti sum ljóð, myndir, tekstur ella ein samanseting av hesum umvegis radiotøkni ella fjarskiftistøkni millum kervisendar, undir hesum bæði einvegis samskifti og tvívegis samskifti.
4) Alment fjarskiftiskervi ella fjarskiftistænasta: Fjarskiftiskervi ella fjarskiftistænasta, sum nevnd í nr. 2 og nr. 3, ið er tøk hjá einum ikki frammanundan avmarkaðum bólki av endabrúkarum, ella veitarum av fjarskiftiskervum ella fjarskiftistænastum.
5) Kunningartænasta og innihaldstænasta: Tænasta, ið heilt ella partvíst letur eitt og hvørt slag av kunning ella innihaldi vera elektroniskt tøkt hjá øðrum endabrúkarum, ið, grundað á eina individuella umbøn, fáa atgongd til hetta umvegis fjarskiftiskervi ella fjarskiftistænastur.
6) Endabrúkari: Brúkari av fjarskiftiskervi ella fjarskiftistænastu, sum ikki á handilsligum grundarlagi letur hetta sama fjarskiftiskervi ella hesa somu fjarskiftistænastu vera tøka at nýta hjá øðrum.
7) Haldaranummar: Eitt og hvørt nummar, ið er fevnt av samlaðu føroysku nummarætlanini, og sum kann bjóðast víðari til ein endabrúkara.
8) Veitari: Tann, sum handilsliga bjóðar út fjarskiftiskervi ella fjarskiftistænastu til onnur.
9) Vinnuligur veitari: Veitari, nevndur í nr. 8, ið sum meginveiting ella sum sjálvstøðugan part av virkseminum, bjóðar út fjarskiftiskervi ella fjarskiftistænastu.
10) RMS veitari: Veitari, nevndur í nr. 8, ið hevur ráðandi marknaðarstøðu.
11) Kervisatgongd: At ein veitari, eftir nærri ásettum treytum og við tí endamáli at bjóða út fjarskiftiskervi ella fjarskiftistænastur, fær atgongd til fjarskiftiskervi og fjarskiftistænasturnar og aðrar hentleikar hjá einum øðrum veitara.
12) Sambinding: Kervisatgongd, ið verður stovnað millum veitarar av fjarskiftiskervum og fjarskiftistænastum, og sum er ein fysisk og logisk samanbinding av fjarskiftiskervum, ið verða nýtt av somu fyritøku ella aðrari fyritøku við tí fyri eyga at geva brúkarunum hjá fyritøkuni møguleika at samskifta innanhýsis, ella við brúkarar hjá aðrari fyritøku, ella at fáa atgongd til tænastur hjá øðrum fyritøkum.
13) Interoperabilitetur: Evni til leypandi at senda og móttaka dáta millum samanbundin fjarskiftiskervi í eini góðsku sum endabrúkarin væntar, og uttan neiliga ávirkan á sendandi ella móttakandi kervini.
14) Terminering: At móttaka eitt telefon uppkall frá sambindingarpunktinum millum tvey fjarskiftiskervi og bera tað víðari til endabrúkaran, ið móttekur telefonuppringina.
15) Kervisendi: Markamótið millum elektroniska fjarskiftiskervið og tænasturnar øðrumegin, og teleterminalútbúnaðin hinumegin. Kervisendin er eitt fysiskt punkt, har ein haldari fær atgongd til eitt alment fjarskiftiskervi. Tá kervi nýta kobling ella ruting, eyðmerkist kervisendin við eini serstakari adressu, ið kann vera knýtt til nummar ella navn haldarans.
16) Accessnet: Uttasti parturin av telekervinum, undir hesum kaðalar, útbúnaður og onnur aktiv, sum binda endabrúkaran í fjarskiftiskervið umvegis nærmastu meginstøð.
17) Teleterminalútbúnaður: Ein framleiðsla, ella ein relevantur lutur í somu, ið ger tað møguligt at samskifta, og sum er ætlað til beinleiðis ella óbeinleiðis at knýta í ein kervisenda í almennum elektróniskum fjarskiftiskervum.
18) Multipleksoperatørur: Veitari av fjarskiftiskervi ella fjarskiftistænastu ella eigari av fjarskiftiskervi, sum rekur eitt terrestriskt talgilt sjónvarp.
19) Atgongustýriskipan: Ein tøknilig fyriskipan ella loysn, ið gevur atgongd til eina krypteraða radiotænastu ella sjónvarpstænastu í klárum formi, treytað av haldi ella øðrum frammanundan fráboðaðum loyvi.
Kapittul 2
Loyvi
Loyvi at stovna, reka og bjóða út alment fjarskiftiskervi
§ 4. Vinnuligir veitarar skulu hava loyvi, til tess at stovna, reka og bjóða út alment fjarskiftiskervi og fjarskiftistænastur. Umsókn um loyvi verður send Fjarskiftiseftirlitinum.
Stk. 2. Loyvi kann einans veitast kapitalfeløgum, undir hesum deildir hjá útlendskum kapitalfeløgum, skrásett hjá Skráseting Føroya.
Stk. 3. Loyvi er ikki eksklusivt, og kann vera givið øðrum vinnuligum veitarum við líknandi ella øðrum treytum.
Stk. 4. Farast má ikki undir virksemi sum vinnuligur veitari, fyrr enn loyvi er fingið. Hetta er eisini galdandi fyri uppsetan sbrt. § 50.
Innihaldið í loyvum
§ 5. Loyvir skulu innihalda endamál og loyvdu staðsetingina og fyriskipanina av fjarskiftiskervinum og fjarskiftistænastunum, ið loyvið viðvíkur.
Stk. 2. Loyvir kunnu innihalda reglur og krøv, undir hesum um:
1) tíðaravmarking av loyvinum,
2) at halda ávísar standardir og lúka ávísar góðkenningar,
3) at lúka altjóða krøv og halda altjóða reglur, ásettar av altjóða fjarskiftismyndugleikum og altjóðafelagsskapum, og
4) at fráboða Fjarskiftiseftirlitinum, tá týðandi broytingar fara fram í virkseminum hjá veitaranum, undir hesum, tá týðandi tøkni ella kervi verða tikin í ella úr nýtslu, ella týðandi tænastur verða settar í verk ella niðurlagdar.
Umsitingarlig viðurskifti í sambandi við veitan av loyvum
§ 6. Fjarskiftiseftirlitið umsitur og veitir loyvir sambært § 4 og § 5.
Stk. 2. Loyvir skulu veitast eftir objektivum, gjøgnumskygdum og ikki diskriminerandi reglum.
Stk. 3. Fjarskiftiseftirlitið kann, uttan at veita endurgjald, gera broytingar í veittum loyvum, tá broytingar í lógum ella altjóða skyldur krevja tað.
Stk. 4. Fjarskiftiseftirlitið tekur avgerð um, hvør er at meta sum vinnuligur veitari, hvørt eitt kervi er at meta sum alment, og kann gera undantak frá kravinum um loyvi sambært § 4, stk. 1 og 2 generelt fyri ávísan bólk av veitarum, ella eftir umsókn.
Stk. 5. Fjarskiftiseftirlitið skrásetur givin loyvi í eina almenna skrá.
Stk. 6. Landsstýrismaðurin kann gera nærri reglur um umsiting og veiting av loyvum, undir hesum reglur um, hvørjir veitarar eru at rokna sum vinnuligir og nær kervi eru at meta sum almenn, og reglur um undantak sbrt. stk. 4.
Kapittul 3
Kappingarreglur fyri fjarskiftisøkið
Almennar skyldur og rættindi
§ 7. Veitarar av almennum fjarskiftiskervum ella fjarskiftistænastum hava rætt og skyldu til innanhýsis at samráðast um avtalur um sambinding og at tryggja interoperabilitet við tí fyri eyga at bjóða út alment fjarskiftiskervi ella fjarskiftistænastu.
Stk. 2. Fjarskiftiseftirlitið kann, um neyðugt, áleggja skyldur fyri at tryggja samband millum endabrúkarar, at skapa interoperabilitet millum tænastur ella at binda saman kervi.
Stk. 3. Avtalur um kervisatgongd og sambinding verða gjørdar á handilsligum grundarlagi.
Stk. 4. Uttan mun til stk. 3, so skulu veitarar av almennum fjarskiftiskervum ella fjarskiftistænastum, ið hava fingið álagt skyldur sambært stk. 2, § 10 ella reglum ásettum eftir § 17, stk. 2, bjóða øðrum veitarum av almennum fjarskiftiskervum ella fjarskiftistænastum avtalur um kervisatgongd og sambinding til tær treytir, ið veitarin hevur fingið álagt.
Stk. 5. Veitarar av almennum fjarskiftiskervum og fjarskiftistænastum skulu handfara upplýsingar, sum eru fingnar í sambandi við avtalur um kervisatgongd og sambinding, í trúnaði og mugu ikki lata øðrum, undir hesum heldur ikki egnum deildum, dótturfeløgum ella samstarvsfeløgum, ið kunnu fáa kappingarfyrimun av hesum, hesar upplýsingar.
Stk. 6. Fjarskiftiseftirlitið kann í ítøkiligum málum taka avgerð um, hvørt ein umbøn frá einum veitara um stovnan ella broyting av eini avtalu um kervisatgongd ella sambinding í samsvari við álagdar skyldur sambært stk. 2, § 10 ella reglum, ásettum eftir § 17, stk. 2, er rímilig ella ikki.
Ráðandi marknaðarstøða
§ 8. Loyvishavarar, sum hava ein marknaðarpart, ið er 50 prosent ella meir av einum viðkomandi marknaði, vera av Fjarskiftiseftirlitinum tilnevndir RMS veitarar. Fjarskiftiseftirlitið ásetur, hvørjir marknaðir eru at rokna sum viðkomandi.
Stk. 2. Keyp, søla og leiga av veitingum á heilsølumarknaðum millum loyvishavarar sambært § 4, ið ikki eru til víðarisølu ella framleigu, eru eisini at roknað sum fevnd av heilsølumarknaðunum.
Stk. 3. Fjarskiftiseftirlitið kann tilnevna ein RMS veitara at vera RMS veitari á einum atknýttum marknaði, um sambandið millum hesar marknaðir er soleiðis, at ein styrkistøða á tí eina marknaðinum kann brúkast til at styrkja marknaðarstøðuna á hinum marknaðinum.
Stk. 4. Fjarskiftiseftirlitið kann, um serlig viðurskifti tala fyri hesum, tilnevna ein veitara at vera RMS-veitara, hóast marknaðarparturin er niðanfyri 50 prosent.
Stk. 5. Fjarskiftiseftirlitið almannakunnger, hvørjir veitarar eru RMS veitarar.
Skyldur, ið kunnu áleggjast veitarum, ið hava ráðandi marknaðarstøðu
§ 9. Fjarskiftiseftirlitið kann, um neyðugt, áleggja RMS veitara, sum er álagdur at geva kervisatgongd, og veitara av almennum fjarskiftiskervum ella tænastum, sum nýtir slíka álagda atgongd, at lúka tøkniligar ella rakstrarligar skyldur, tá ið hetta er neyðugt fyri at tryggja vanligan kervisrakstur.
§ 10. Fjarskiftiseftirlitið kann áleggja veitarum av fjarskiftiskervum og fjarskiftistænastum, ið eru tilnevndir at vera RMS veitarar, eina ella fleiri av hesum skyldum:
1) Kervisatgongd, sbrt. § 11.
2) Ikki diskriminatión, sbrt. § 12.
3) Gjøgnumskygni, sbrt. § 13.
4) Roknskaparligt sundurbýti, sbrt. § 14.
5) Prístamarhald, sbrt. § 15.
6) Skyldur um funktionellan atskilnað, sbrt. § 16.
Stk. 2. Fjarskiftiseftirlitið kann undir serligum umstøðum áleggja aðrar skyldur, um tær í stk. 1, nr. 1-6 nevndu skyldur ikki eru egnaðar ella nøktandi til at fremja kapping og virkisføri.
Stk. 3. Fjarskiftiseftirlitið ásetur í tí einstøku avgerðini vavið og innihaldið av skylduni.
Stk. 4. Veitarar, ið hava fingið álagt skyldur sambært hesi grein, skulu boða Fjarskiftiseftirlitinum frá, um avgerð verður tikin um at gera fyriskipanarligar ella bygnaðarligar broytingar, ið hava munandi týdning fyri tær áløgdu skyldurnar.
Skylda um kervisatgongd
§ 11. Ein skylda um kervisatgongd er at skilja sum ein treyt um, at veitari, ið hevur ráðandi marknaðarstøðu, skal bjóða kervisatgongd til nærri ásettar partar av veruligu ella virtuellu eindunum, tænastunum og øðrum hentleikum veitarans. Skyldan kann fevna um øll viðurskifti, ið eru neyðug fyri kervisatgongd, undir hesum eisini um:
1) viðurskifti, ið eru neyðug til tess at kunna virka sum fjarskiftisveitari uttan egið kervi,
2) faktiska og virtuella samhúsing og onnur sløg av atgongd til felagsnýtslu av hentleikum, bygningum, atkomuvegum, kaðalum í bygningum, mastrum, antennum og øðrum konstruktiónum, kaðalrennum og leidningsrennum, kaðalbrunnum og kaðalskápum, og
3) at áleggja veitingarskyldu av ávísum tænastum í heilsølu.
Skylda um ikki diskriminatión
§ 12. Ein skylda um ikki diskriminatión er at skilja sum ein treyt um, at veitari, ið hevur ráðandi marknaðarstøðu, skal tryggja, at hann undir samsvarandi viðurskiftum bjóðar øðrum fjarskiftiskervisveitarum og fjarskiftistænastuveitarum, ið bjóða út samsvarandi tænastu, somu treytir og prísir, og at hann bjóðar út tænastur og miðlar upplýsingar til aðrar til somu treytir, somu prísir og í somu góðsku, ið stendur veitaranum sjálvum, dótturfeløgum ella samstarvspartnarum hansara í boði.
Stk. 2. Hevur ein RMS veitari fingið álagt skyldu um gjøgnumskygni, sbrt. § 13, og har veitarin hevur fingið álagt at almannakunngera upplýsingar um nýggjar tænastur og komandi broytingar í verandi tænastum, kann Fjarskiftiseftirlitið krevja, at ein nýggj ella broytt heilsølutænasta, sum er fevnd av skylduni um kervisatgongd, sbrt. § 11, hvørki má veitast innanhýsis ella uttanhýsis í eitt ávíst tíðarskeið.
Skylda um gjøgnumskygni
§ 13. Ein skylda um gjøgnumskygni er at skilja sum ein treyt um, at veitari, ið hevur ráðandi marknaðarstøðu, skal almannakunngera ávísar upplýsingar.
Stk. 2. Um veitaranum er áløgd ein treyt um ikki diskriminatión eftir § 12, kann veitaranum áleggjast at almannakunngera eitt standardtilboð, ið skal vera nóg óbuntað, at tað tryggjar, at aðrir veitarar ikki gjalda fyri hentleikar, ið teir ikki vilja hava, og sum inniheldur eina lýsing av teimum útbjóðaðu tænastunum og er útgreinað í staklutir og hartil hoyrandi treytir og prísir.
Stk. 3. Um einum veitara, ið hevur ráðandi marknaðarstøðu, verður áløgd ein treyt um óbuntaða kervisatgongd sambært § 11, skal eitt standardtilboð almannakunngerast.
Stk. 4. Fjarskiftiseftirlitið kann áseta nærri reglur um standardtilboð, undir hesum, um innihald o.a.
Stk. 5. Veitari, ið hevur ráðandi marknaðarstøðu, skal skjalprógva, at standardtilboðið verður fyrisitið á sama hátt fyri bæði veitaran sjálvan og onnur.
Skylda um roknskaparligt sundurbýti
§ 14. Ein skylda um roknskaparligt sundurbýti er at skilja sum ein treyt um, at veitari, ið hevur ráðandi marknaðarstøðu, skal føra roknskap fyri ávíst virksemi ella ávís virkisøkir í sambandi við kervisatgongd.
Stk. 2. Fjarskiftiseftirlitið kann gera nærri reglur um roknskaparførslu.
Stk. 3. Fjarskiftiseftirlitið kann, við fyriliti til reglur um tagnarskyldu, undir hesum, í fyrisitingarlóg og lóg um persónsupplýsingar, almannakunngera roknskaparupplýsingar, undir hesum upplýsingar um inntøkur.
Skylda um prístamarhald
§ 15. Ein skylda um prístamarhald er at skilja sum ein treyt um, at veitari, ið hevur ráðandi marknaðarstøðu, skal lúka krøv um prísáseting, sum eru avleidd av órímiliga lágum ella órímiliga høgum prísum, ella av at hava varðveitt eina prísáseting, ið er til skaða fyri endabrúkaran.
Stk. 2. Fjarskiftiseftirlitið ásetur hvør prísásetingarháttur skal nýtast, og kann gera nærri reglur hesum viðvíkjandi.
Stk. 3. Fjarskiftiseftirlitið kann áleggja veitaranum at føra kostnaðarroknskap, sum stuðlar undir prístamarhaldið og tann prísásetingarhátt, ið Fjarskiftiseftirlitið hevur ásett, og kann gera nærri reglur hesum viðvíkjandi, undir hesum eisini um almannakunngerð av kostnaðarroknskapi.
Stk. 4. Veitari, ið hevur ráðandi marknaðarstøðu, skal lata ein óheftan serkønan eftirkanna, at kostnaðarroknskapir sambært stk. 3 eru greiddir sambært áløgdu skylduni, og veita váttan fyri, at skyldan er lokin. Fjarskiftiseftirlitið kann almannakunngera váttanina.
Skyldur um funktionellan atskilnað
§ 16. Ein skylda um funktionellan atskilnað er at skilja sum ein treyt um, at veitari, ið hevur ráðandi marknaðarstøðu, og sum hevur virksemi innan fyri bæði heilsøluliðið og smásøluliðið, skal hava tað virksemið, sum fylgir við heilsøluni av viðkomandi kervisatgongdartænastum í einari sjálvstøðugt virkandi eind.
Stk. 2. Fjarskiftiseftirlitið kann bara í heilt serligum førum, og við góðkenning frá avvarðandi landsstýrismanni, áleggja veitarum við ráðandi marknaðarstøðu skyldur um funktionellan atskilnað, um:
1) Tað verður staðfest, at týðandi og áhaldandi kappingartrupulleikar ella marknaðarbrek eru í sambandi við heilsølu av viðkomandi kervisatgongdartænastum, og
2) tað verður mett, at aðrar skyldur ikki hava megnað at skapa effektiva kapping.
Stk. 3. Uttan mun til ásetingarnar omanfyri hava veitarar, ið eiga tráðborið fjarskiftiskervi, undir hesum eisini við umheimin, og sum hava eina ráðandi marknaðarstøðu á einum ella fleiri av teimum av Fjarskiftiseftirlitinum ásettu heilsølumarknaðunum, sbrt. § 8, skyldu til at reka hesi kervi í eini sjálvstøðugari rættareind.
Stk. 4. Stk. 3 avmarkar ikki atgongdina hjá Fjarskiftiseftirlitinum at áleggja skyldur, heldur ikki um hesar ganga tvørtur um rættareindir í sama samtaki.
Talgildar radiotænastur og sjónvarpstænastur o.a.
§ 17. Fjarskiftiseftirlitið kann áseta reglur um, at multipleksoperatørar skulu bjóða út atgongd til forritanarmarkamót til nýtsluforrit, API, og til elektroniskar sendiskráir, EPG, til reiðuligar, rímiligar og ikki diskriminerandi treytir, til tess at tryggja atgongdina hjá endabrúkarunum til talgildar radiosenditænastur og sjónvarpssenditænastur.
Stk. 2. Fjarskiftiseftirlitið kann áseta reglur um:
1) krøv til veitarar av atgongustýrisskipanum, um treytir fyri atgongd til at brúka atgongustýrisskipanir, og krøv til roknskaparførslu veitarans, og
2) treytir viðvíkjandi veitan av brúksrætti til patent ella vørumerki viðvíkjandi atgongustýrisskipanum og atknýttum tænastum.
Veitarar av kaðalsjónvarpi og terrestriskum sjónvarpi
§ 18. Veitarar av almennum fjarskiftiskervum ella fjarskiftistænastum mugu ikki innan fyri somu rættareind reka síni kaðal ella terrestrisku sjónvarpskervi og onnur almenn fjarskiftiskervi, um veitarin hevur eina ráðandi marknaðarstøðu á viðkomandi marknaði eftir § 8.
Stk. 2. Fjarskiftiseftirlitið kann áseta nærri reglur um, at kravið í stk. 1 ikki er galdandi, um kappingarviðurskiftini tala fyri hesum.
Kapittul 4
Samhúsing o.a. og ognartøka
Samhúsing, felags nýtsla o.tíl.
§ 19. Landsstýrismaðurin kann, við atliti til umhvørvi, fólkaheilsu, almenna trygd ella vegna atlit til planlegging, áseta reglur um, at ein veitari av fjarskiftiskervi skal geva øðrum veitarum av fjarskiftiskervi atgongd til samhúsing og felags nýtslu av kervislutum og øðrum hentleikum í fjarskiftiskervinum.
Stk. 2. Landsstýrismaðurin kann áseta reglur um innlit í avtalur um samhúsing, eftirlit, seming, býti av útreiðslum, ásetan av tvingsilsbót og um kæruviðgerð, sbrt. stk. 1.
Ognartøka
§ 20. Landsstýrismaðurin kann ognartaka privat lendi í førum, har mett verður, at tað er samfelagsliga neyðugt til tess at tryggja eitt vælvirkandi og hóskandi alment samskiftiskervi, og har tað ikki er gjørligt at keypa lendið.
Stk. 2. Ognartøka sambært stk. 1 skal fara fram eftir reglunum í lóg om forpligtelse til jords afgivelse til offentlige veje, havne og landingssteder, samt til offentlige skoler på Færøerne.
Stk. 3. Landsstýrismaðurin kann, í førum nevnd í stk. 1, geva fjarskiftisveitara ognarrætt ella brúksrætt til ognartikna lendið.
Kapittul 5
Endabrúkarar og veitingarskylda o.a.
Grundleggjandi endabrúkararættindi
§ 21. Landsstýrismaðurin kann áseta reglur við tí endamáli at binda eigarar av fjarskiftiskervum og veitarar av fjarskiftiskervum ella fjarskiftistænastum til at tryggja atgongdina hjá endabrúkarum til at ringja til almennu alarmtænastuna ,112, nummarupplýsingartænastur, teksttelefontænasturnar og møguligar aðrar samfelagstýdningarmiklar fjarskiftistænastur, undir hesum um atgongdina til alarmtænastur fyri endabrúkarar, ið hava skerdan førleika.
§ 22. Landsstýrismaðurin kann áseta reglur til tess at áleggja teimum, sum veita almenn fjarskiftiskervi ella fjarskiftistænastur, at tryggja grundleggjandi brúkararættindini í sambandi við avtalur um veitan av fjarskiftiskervum ella fjarskiftistænastum til endabrúkaran.
Stk. 2. Reglur, ásettar sambært stk. 1, kunnu eitt nú fevna um ásetingar um rættin hjá endabrúkara til ein sáttmála, innihaldið í sáttmálanum, terminalútbúnað, tøknilig markamót og um kæruviðgerð. Landsstýrismaðurin kann eisini áseta nærri reglur um skyldu at lata serligar funktiónir og hentleikar, møguliga ókeypis, vera til taks hjá endabrúkarunum, og skyldu at gera endabrúkararnar varugar við hesar, umframt at áseta reglur um skyldu at kunna um møguleikarnar at verja persónsupplýsingar, og um skyldu at kunna um almannagagnligar upplýsingar um lógliga og ólógliga nýtslu av fjarskiftistænastum o.a.
Stk. 3. Fyri reglur, ásettar sbrt. stk. 1, kann landstýrismaðurin taka avgerð um, at hesar bert skulu fevna um ávís sløg av avtalum, undir hesum bert um avtalur við ikki vinnuligar kundar og um, at vikið kann ikki vera frá reglunum við avtalu. Landsstýrismaðurin kann gera reglur, ið áseta um, og í hvønn mun, Fjarskiftiseftirlitið kann gera undantak frá reglunum.
Stk. 4. Fjarskiftiseftirlitið kann áleggja veitarum minstukrøv til góðskuna av fjarskiftistænastunum og áseta á hvønn hátt, góðskan skal mátast.
Stk. 5. Fjarskiftiseftirlitið kann áseta reglur, ið áleggja teimum, sum veita almenn fjarskiftiskervi ella fjarskiftistænastur til endabrúkarar, at almannakunngera prísupplýsingar, viðskiftatreytir, góðsku, ómaksgjøld o.tíl. fyri tær tænastur, sum verða bodnar út, umframt reglur um upplýsingarskyldu veitarans mótvegis endabrúkaranum.
Stk. 6. Fjarskiftiseftirlitið kann áseta reglur um krøv, ið teir, sum veita almenn fjarskiftiskervi ella fjarskiftistænastur, skulu lúka viðvíkjandi atgongdini til fjarskiftistænastur, val av veitara o.tíl. hjá serligum brúkarabólkum, undir hesum eisini fólki við skerdum førleika.
Stk. 7. Fjarskiftiseftirlitið kann áseta reglur, ið áleggja teimum, sum veita almenn fjarskiftiskervi ella fjarskiftistænastur, at tryggja endabrúkarunum atgongd til kunning, at breiða út kunning og møguleikan at nýta skipanir og tænastur eftir egnum vali.
Stk. 8. Fjarskiftiseftirlitið kann, til tess at forða fyri sviki í sambandi við nýtslu av ávísum numrum ella tænastum, áseta reglur, ið áleggja veitarum til endabrúkarar at steingja atgongdina til hesi nummur ella tænastur, og krevja, at veitarin heldur aftur viðkomandi inntøkur frá sambinding ella øðrum tænastum.
Stk. 9. Veitarar, ið hava fingið tillutað nummartilfeingi, skulu eftir kravi endabrúkarans bjóða eina talgilda og útgreinaða rokning ókeypis. Um rokningin verður skrivað út og send í pappírsformi, má gjaldið fyri at útgreina rokningar ikki vera hægri enn útreiðslan at gera nevndu útgreinan, marginalkostnaðurin.
§ 23. Landsstýrismaðurin kann áseta reglur til tess at áleggja teimum, sum veita teleterminalútbúnað, ið verður nýttur til farsamskiftistænastur, skyldu til at tryggja grundleggjandi brúkararættindi í sambandi við avtalur um veiting av teleterminalútbúnaði til endabrúkaran. Landstýrismaðurin kann undir hesum áseta nærri reglur um mesta bindingstíðarskeið í sambandi við hentleikar í teleterminalútbúnaði.
Stk. 2. Við ásetan av reglum eftir stk. 1 kann landstýrismaðurin gera av, at reglurnar bert skulu galda fyri ávís avtaluviðurskifti, undir hesum bert fyri ikki vinnurekandi endabrúkarar, og at vikið kann ikki verða frá teimum við avtalu.
§ 24. Fjarskiftiseftirlitið kann áseta reglur um stovnan og rakstur av gjaldtelefonum ella aðra atgongd til almenna talutelefoni, sum inniheldur minstukrøv til veitarar av gjaldtelefoni, undir hesum eisini at røkja serliga tørvin hjá teimum endabrúkarum, ið hava skerdan førleika.
Dyljan av fjarskifti, kunningartrygd og viðgerð av persónsupplýsingum o.a.
§ 25. 1) Eigarar av fjarskiftiskervi og veitarar av fjarskiftiskervum ella fjarskiftistænastum og starvsfólk teirra og fyrrverandi starvsfólk, umframt starvsfólk á Fjarskiftiseftirlitinum og í Føroya Kærustovni mugu ikki ógrundað lata víðari ella gagnnýta upplýsingar um kervisnýtsluna ella tænastunýtsluna hjá øðrum ella um innihaldið í hesum, sum tey fáa kunnleika til í sambandi við viðkomandi útboð av fjarskiftiskervum ella fjarskiftistænastum. Tað liggur eisini á teimum at seta neyðug tiltøk í verk til tess at fyribyrgja, at óviðkomandi fáa atgongd til upplýsingar um innihald ella nýtslu av fjarskifti.
Stk. 2. Ásetingarnar í §§ 152-152 a og 152 d-152 f í revsilógini eru galdandi á sama hátt fyri tann, ið virkar ella hevur virkað hjá einum eigara av einum fjarskiftiskervi ella hjá einum veitara av fjarskiftiskervi ella fjarskiftistænastu, ella sum á annan hátt hevur arbeitt við uppgávum, ið verða gjørdar eftir avtalu við hesar.
§ 26. Veitarar av almennum fjarskiftiskervum ella fjarskiftistænastum skulu seta í verk neyðugu tøkniligu og fyriskipanarligu trygdartiltøkini viðvíkjandi kunningartrygd og viðvíkjandi viðgerð av persónsdáta í sambandi við fjarskifti. Slík kunnu fevna um tiltøk, sum hava til endamáls at stýra váðan fyri kunningartrygdini í kervum og tænastum, undir hesum persóndátatrygd, og tryggja eitt trygdarstøði, ið stendur mát við henda váða.
Stk. 2. Veitarar av almennum fjarskiftiskervum ella fjarskiftistænastum hava skyldu at boða Fjarskiftiseftirlitinum frá brotum á kunningartrygdina, sum hava týðandi avleiðingar fyri kervisraksturin og tænasturaksturin, og frá brotum á persónsdátutrygdina. Landsstýrismaðurin kann áseta, at skyldan í serligum førum eisini kann fevna um fráboðan til onnur enn Fjarskiftiseftirlitið.
Stk. 3. Landsstýrismaðurin kann áseta reglur fyri veitarar av fjarskiftiskervum ella fjarskiftistænastum, um minstukrøv til viðgerð av persónsupplýsingum í fjarskiftiskervum ella fjarskiftistænastum, og um eftirlit við, at hesar reglur verða hildnar. Hesar reglur kunnu m.a. fevna um krøv um:
1) vísing av numrum, ið ringt verður frá, sjálvvirkandi víðaristilling og nýstluuppgerð, og
2) goymslu og viðgerð av ferðsludáta og lokaliseringsdáta í sambandi við fjarskifti.
Stk. 4. Landsstýrismaðurin kann áseta reglur fyri veitarar av fjarskiftiskervum ella fjarskiftistænastum um minstukrøv til kunningartrygdina í sambandi við at bjóða út fjarskiftiskervi ella fjarskiftistænastur, og um eftirlit við, at hesar reglur verða hildnar.
§ 27. Landsstýrismaðurin kann áseta reglur fyri likamligar og løgfrøðiligar persónar, um vernd av endabrúkarum mótvegis goymslu av upplýsingum á terminalútbúnaði, og atgongd til upplýsingar, sum eru goymdar á terminalútbúnaðinum hjá endabrúkarunum.
Skylda at hava tøkniligan útbúnað til ávís inntriv
§ 28. 2) Veitari av fjarskiftiskervum ella fjarskiftistænastum, sum hevur fingið loyvi sambært § 4, hevur skyldu til, uttan útreiðslur fyri landið, undir hesum eisini fyri løgregluna, at tryggja, at tøkniliga útgerðin og tøkniligu skipanirnar, sum veitarin nýtir, eru skipaðar soleiðis, at løgreglan kann gera inntriv í fráboðanarloyndina við avlurting av fastnettelefoni, fartelefoni, SMS og fjarskiftiseftiransan, sambært kap. 84 í rættargangslógini.
Stk. 2. Landsstýrismaðurin kann áseta nærri reglur um tey tøkniligu krøvini til útgerð og skipanir, sambært stk. 1.
Stk. 3. Veitarin hevur skyldu til at verða løgregluni til hjálpar við útinning av inntrivi í fráboðanarloyndina í teimum í stk. 1 nevndu førum.
Stk. 4. Landsstýrismaðurin kann í serligum førum víkja frá kravinum í stk. 1, um tøknilig og praktisk fyrilit gera tað neyðugt.
Stk. 5. Um fjarskiftisveitararnir gera ella nýta eina felags loysn til at lúka treytirnar í stk. 1, skulu útreiðslurnar gjaldast við støði í marknaðarbýtinum.
§ 29. Veitarar av fjarskiftiskervi ella fjarskiftistænastu, sum hava fingið loyvi sambært § 4, skulu til ein felags dátugrunn, sbr. § 38, boða frá og dagføra upplýsingar um haldaranummar og aktuellan veitara. Boðast skal frá upplýsingunum beinanvegin eftir, at endabrúkarin skiftir veitara, sbr. § 37. Henda skylda er áløgd tí veitara, ið endabrúkarin skiftir til, og er eisini galdandi í teimum førum, har endabrúkarin flytur uttan at nýta vanligu mannagongdirnar fyri nummarportabilitet.
§ 30. Veitarar av fjarskiftiskervi ella fjarskiftistænastu til endabrúkarar skulu, eftir áheitan frá løgregluni, útflýggja upplýsingar, ið eyðmerkja atgongdina hjá einum endabrúkara til fjarskiftiskervi ella fjarskiftistænastur.
Veitingarskylda
§ 31. Veitingarskyldan hevur til endamáls at tryggja øllum endabrúkarum atgongd til eina røð av grundleggjandi fjarskiftistænastum við rímiligum treytum og fyri ein rímiligan prís.
Stk. 2. Veitingarskyldan verður tryggjað við, at Fjarskiftiseftirlitið tilnevnir ein ella fleiri veitingarskyldugar veitarar, ið hava skyldu at bjóða út:
1) Atgongd til eitt alment fjarskiftiskervi á einum ávísum staði.
2) Atgongd til eina alment atkomuliga talutelefonitænastu umvegis tað í nr. 1 nevnda fjarskiftiskervið.
3) Serligar veitingartænastur til nærri avmarkaðar bólkar av fólkum við skerdum førleika.
4) Eina fullfíggjaða nummarskrá og eina landsfevnandi nummarupplýsingartænastu.
Stk. 3. Landsstýrismaðurin kann áseta reglur um, at veitingarskyldan skal fevna um aðrar veitingar enn tær, nevndar í nr. 1-4.
Stk. 4. Landsstýrismaðurin kann áseta reglur um, at ein ella fleiri av veitingarskyldunum:
1) ikki longur skulu bjóðast sum ein partur av veitingarskylduni, ella
2) ikki, ella bert í ávísan mun, skulu bjóðast nýggjum viðskiftafólkum sum partur av veitingarskylduni.
Stk. 5. Landsstýrismaðurin kann áseta reglur um:
1) Vavið á veitingarskylduni, undir hesum um hentleikar og virksemi, ið eru partar av veitingarskylduni.
2) Tilnevning av veitingarskyldugum veitarum. Reglurnar kunnu m.a. fevna um, hvussu tilnevningin fer fram, tilnevning eftir almennum útboði og tilnevningartíðarskeiði.
3) Karmar fyri áseting av treytum fyri, hvussu teir tilnevndu veitararnir skulu røkja veitingarskylduna. Reglurnar kunnu eitt nú fevna um innihaldið í treytunum, undir hesum góðskukrøv til tær veitingar, sum tilnevndu veitararnir skulu lata, og krøv viðvíkjandi góðskumátingum og almannakunngering av hesum góðskumátingum.
4) Skyldurnar hjá veitingarskyldugu veitarunum við tí endamáli, at tryggja grundleggjandi brúkararættindi í sambandi við útboð og veiting av veitingarskyldugum veitingum. Reglurnar kunnu innihalda krøv til innihaldið í tí sáttmála, sum skal galda í viðurskiftunum millum veitingarskyldugan veitara og ein endabrúkara, undir hesum:
a) krøv um kompensatiónsskipanir og afturgjaldskipanir, ið verða at nýta, um góðskukrøv ikki verða hildin, og
b) krøv til møguligar sáttmálatreytir um veiting av trygd.
Stk. 6. Veitarar, ið eru tilnevndir veitingarskyldugir veitarar, skulu veita ella bjóða út tær veitingar, ið eru fevndar av veitingarskylduni, til ein og hvønn, ið biður um hetta, uttan so, at tann, ið biður um veitingarnar, í fleiri førum ella grovt hevur misnýtt ta veitingarskyldugu veitingina, og tað er týðandi vandi fyri nýggjari misnýtslu av viðkomandi veiting.
Stk. 7. Veitari, ið noktar veiting eftir stk. 6, hevur skyldu at upplýsa endabrúkaran um kærumøguleikan í § 70, herundir um freist og kærumyndugleika.
Hámarksprísur fyri veitingarskyldugar veitingar
§ 32. Landsstýrismaðurin kann áseta nærri reglur um útrokning av hámarksprísi, undir hesum áseta, at prísir fyri veitingarskyldugar veitingar skulu vera eins um alt landið, og áseta karmar fyri, í hvønn mun Fjarskiftiseftirlitið hevur heimild at áseta hámarksprísir.
Stk. 2. Landsstýrismaðurin kann gera av, at Fjarskiftiseftirlitið skal áseta hámarksprís fyri eina ella fleiri veitingarskyldugar veitingar, sambært § 31, stk. 2 og 3. Prísirnir skulu í minsta lagi samsvara við veitingarkostnaðin. Útrokningin av hámarksprísi fyri veitingarskyldugar veitingar er ikki galdandi, tá ið veitingarnar, eftir altjóða skyldum, skulu bjóðast út ókeypis.
Fígging av veitingarskylduni
§ 33. Veitari, ið hevur fingið álagt veitingarskyldu, sum er fevnd av § 31, stk. 2, ella er ásett við heimild í § 31, stk. 3, kann fáa afturgoldið skjalprógvaðar nettoútreiðslur í sambandi við veitingarskyldugu veitingarnar, um veitingarskyldan er ein órímilig byrða fyri tann tilnevnda veitingarskylduga veitaran. Nettoútreiðslur verða ikki afturgoldnar, um prísirnir hjá tí veitingarskylduga veitaranum eru óvanliga lágir í mun til veitingina.
Stk. 2. Fjarskiftiseftirlitið tekur støðu til, um treytirnar fyri afturgjaldi sambært stk. 1 eru til staðar, og til uppgerð og áseting av nettoútreiðslunum. Fjarskiftiseftirlitið fyriskipar møguligt uppkrav og avrokning av nettoútreiðslunum.
Stk. 3. Veitarar, ið veita veitingar, ið samsvara við tær í § 31, stk. 2, nr. 1 og 2 nevndu, hava skyldu at vera við til at fíggja nettoútreiðslurnar hjá tí veitingarskylduga veitaranum, sum ásett av Fjarskiftiseftirlitinum sambært stk. 2. Fíggingarskyldan fevnir eisini um tann veitingarskylduga veitaran.
Stk. 4. Veitingarskyldu fyri veitingar, álagdar eftir § 31, stk. 3, ber landið kostnaðin av. Tó kann landsstýrismaðurin í serligum førum gera av, at kostnaðurin skal berast av veitarunum.
Stk. 5. Landsstýrismaðurin kann áseta reglur um, hvussu tær skjalprógvaðu nettoútreiðslurnar hjá tí veitingarskylduga veitaranum skulu vera roknaðar, hvussu mannagongdin fyri afturgjald av hesum nettoútreiðslum skal vera, og, tá talan er um veitingar eftir § 31, stk. 2 nr. 1 og 2, ella har landsstýrismaðurin sambært § 31, stk. 3 hevur tikið avgerð um hetta, hvørjir veitarar koma undir skyldu at rinda sambært ávikavist stk. 3 og stk. 4 í hesi grein.
Upplýsingarskylda
§ 34. Ein veitingarskyldugur veitari, ið vil avhenda sítt accesskervi ella ein týðandi part av hesum til eina sjálvstøðuga løgfrøðiliga eind við øðrum ognarrætti, skal frammanundan og í góðari tíð boða Fjarskiftiseftirlitinum frá hesum soleiðis, at Fjarskiftiseftirlitið hevur møguleika fyri at meta um, hvussu ætlaða avhendanin fer at ávirka útboðið av teimum veitingarskyldugu veitingunum í § 31, stk. 2 nr. 1 og 2.
Kapittul 6
Nummarviðurskifti
Nummarætlan
§ 35. Fjarskiftiseftirlitið ger, almannakunnger og fyrisitur eina samlaða føroyska nummarætlan, ið býtir sundur samlaða nummartilfeingið, sum fevnir um nummur, nummarseriur, loynitøl og adressur, ið verða nýttar í sambandi við útboð av fjarskiftiskervi ella fjarskiftistænastum. Í nummarætlanini verður nummartilfeingi m.a. lagt av til:
1) stuttnummur, til eitt nú almennu alarmtænasturnar, nummarupplýsingartænastur og onnur týðandi samfelagslig endamál,
2) útboð av fjarskiftiskervi ella fjarskiftistænastum við serligum takseringsviðurskiftum,
3) afturhaldan av numrum við tí fyri eyga at nýta tey seinni, m.a. í sambandi við umskipan av nummarætlanini,
4) útboð av ókeypis numrum, har uppringing fer fram uttan uppringingargjald ella nýtslukostnað fyri endabrúkaran, og til
5) útboð av numrum, har veitarin, sum ein sameindan part av kostnaðinum fyri uppringing, eisini tekur sær av at skráseta nýtsluna av eini kunningartænastu ella innihaldstænastu, sum liggur aftanfyri, umframt at fakturera og krevja endabrúkaran eftir kostnaðinum.
Stk. 2. Fjarskiftiseftirlitið tillutar nummur, nummarseriur, loynitøl og adressur til teirra, ið hava fingið loyvi sambært § 4 til at bjóða út fjarskiftiskervi ella fjarskiftistænastur ella veitingarskyldugar veitingar.
Stk. 3. Fjarskiftiseftirlitið kann áseta nærri reglur um samanseting, almannakunngering og fyrisiting av nummarætlanini, undir hesum, eisini um skipan, tillutan, broyting, afturtøku og afturkallan av tillutaðum numrum, nummarserium, loynitølum og adressum.
Stk. 4. Nummur og elektroniskar adressur mugu ikki takast í nýtslu, fyrr enn Fjarskiftiseftirlitið hevur tillutað hesi.
Stk. 5. Veitarar, ið hava fingið tillutað nummur og aftur tilluta hesi nummur til endabrúkarar, skulu veita avrit av sínum nummardátugrunni til ein og hvønn, ið setur fram umbøn um tess. Gjaldið fyri at veita avrit má ikki vera hægri enn útreiðslan av at veita avritið, marginalkostnaðurin.
Nummaravgjald
§ 36. Fjarskiftiseftirlitið kann krevja nummaravgjøld hjá teimum veitarum, ið hava fingið tillutað nummur, nummarseriur, loynitøl ella adressur.
Stk. 2. Verða nummaravgjøld ásett við heimild í stk. 1, verða hesi ásett árliga á fíggjarlógini og verða almannakunngjørd av Fjarskiftiseftirlitinum.
Stk. 3. Verða nummaravgjøld ásett sambært stk. 1, verður goldið fyri tillutað nummur, nummarseriur, loynitøl ella adressur, uttan mun til um hesi eru víðari tillutað endabrúkarum og øðrum veitarum, ella ikki.
Nummarportabilitetur
§ 37. Veitarar av fjarskiftiskervi ella fjarskiftistænastum skulu tryggja, at endabrúkarar kunnu taka við sær haldaranummur, tá ið skift verður í millum veitarar innan fyri sama tænastuslag, ávikavist fastnet og fartelefonnet, undir hesum VoIP.
Stk. 2. Veitarar av fjarskiftiskervi ella fjarskiftistænastum skulu eftirlíka øllum umbønum um nummarportabilitet, ið ein endabrúkari hevur biðið um.
Stk. 3. Í serligum føri, t.d. við skuld, kunnu veitarar nokta nummarportabiliteti.
Stk. 4. Endabrúkarar skulu hava møguleika fyri at fáa haldaranummarið flutt innan arbeiðslok arbeiðsdagin eftir, at veitarin, haðani haldið verður flutt, hevur fingið umbønina. Flytingin má tó í fyrsta lagi fremjast, tá haldið hjá móttakandi veitaranum er vorðið virkið.
Stk. 5. Ein endabrúkari, ið hevur biðið um at portera haldaranummur, skal ikki bíða til eitt møguligt bindingstíðarskeið ella ein uppsagnartíð er farin, áðrenn porteringin verður virkin.
Stk. 6. Endabrúkarar, ið hava biðið um portering av haldaranumrum, verða ikki av tí orsøk loystir frá møguligum skyldum, sum eru ásettar í sáttmála við tann veitara, sum endabrúkarin í sambandi við porteringina heilt ella partvíst uppsigur síni kundaviðurskifti hjá, undir hesum, at rinda fyri eitt møguligt bindingstíðarskeið ella í eini uppsagnartíð.
Stk. 7. Veitarar, ið endabrúkarin hevur síni kundaviðurskifti hjá, kann ikki í sambandi við nummarportering krevja serstakt gjald fyri porteringina.
Stk. 8. Veitarar, ið lata nummur sum liður í nummarportering, kunnu frá øðrum veitarum í mesta lagi krevja gjald fyri tær útreiðslur, ið veitarin beinleiðis hevur havt í sambandi við porteringina, og fyri framhaldandi rindanina av nummaravgjaldinum.
Stk. 9. Fjarskiftiseftirlitið kann áseta nærri reglur um nummarportabilitet, undir hesum reglur og mannagongdir í sambandi við portering, um noktan av portering, um bindingstíð, endurgjald, avgreiðslutíð, kærumyndugleika o.a.
§ 38. Skipast skal ein nummardátugrunnur. Veitarar av fjarskiftiskervi ella fjarskiftistænastum skulu tryggja, at aðrir veitarar hava atgongd til upplýsing um, hvønn veitara eitt haldaranummar er givið til við tí endamáli at tryggja rætta stýring av eini uppringing til haldaranummur, sum eru porterað.
Stk. 2. Fjarskiftiseftirlitið kann áseta nærri reglur um skipan av dátugrunni og menning av infraskipanini við tí endamáli at fremja nummarportering, undir hesum treytir um gjald, aftaná alment útboð at lata triðjamanni stovnseting og rakstur av dátugrunninum, o.a.
Stk. 3. Um veitarar av fjarskiftiskervi ella tænstum gera ella nýta eina felags loysn til at lúka treytirnar í § 37 og § 38, stk. 1, kann Fjarskiftiseftirlitið gera av, at útreiðslurnar skulu gjaldast við støði í marknaðarbýtinum.
Víðaristilling av uppringingum
§ 39. Veitarar av fjarskiftiskervi ella fjarskiftistænastum skulu tryggja rætta víðaristilling av uppringingum til haldaranummur, ið eru partur av samlaðu nummarætlanini, undir hesum eisini uppringingar til haldaranummur, ið eru fevnd av reglunum um nummarportabilitet.
Stk. 2. Skyldan í stk. 1 fevnir ikki um uppringingar til nummur við serligari prísáseting, um tann, sum fær uppringingina, hevur valt at avmarka atgongdina at ringja til nummarið.
Stk. 3. Fjarskiftiseftirlitið kann áseta nærri reglur um, hvussu og eftir hvørjum treytum nummarportering og víðaristilling av uppringingum millum veitarar av fjarskiftiskervi ella fjarskiftistænastu, sambært stk. 1, skal fara fram, undir hesum eisini reglur um, hvussu flytingin og viðaristilling skal handfarast, tá ið ein endabrúkari tekur eitt nummar við sær í sambandi við fleiri eftirfylgjandi skift millum veitarar av almennum fjarskiftiskervi ella fjarskiftistænastum, umframt møgulig ískoytiskrøv til innihaldið í avtalum um sambinding við atliti til nummarflyting og víðaristilling.
Stk. 4. Fjarskiftiseftirlitið kann áseta nærri reglur um gjald og treytir, ið veitarar av fjarskiftiskervi ella fjarskiftistænastum, ella triðimaður kann áleggja øðrum veitarum av fjarskiftiskervi ella fjarskiftistænastum, í sambandi við uppsløg hjá hesum í dátugrunnar við tí endamáli at tryggja rætta víðaristilling av numrum, ið eru fevnd av reglunum um nummarportabilitet.
Nýtsla av nummarupplýsingardáta
§ 40. Veitarar av fjarskiftiskervi ella fjarskiftistænastum, ið lata endabrúkarum haldaranummur, skulu lata øllum, ið biðja um tað, upplýsingar um haldaranummur, ið eru latin endabrúkaranum, sum innihalda navn, bústað, møguligar upplýsingar um starv, haldaranummarið og tað slag av tænastum, sum haldaranummarið verður nýtt til. Gjaldið fyri slíkar upplýsingar má ikki vera hægri enn marginalútreiðslan av at útvega endabrúkaranum upplýsingarnar.
Stk. 2. Fjarskiftiseftirlitið kann áseta nærri reglur um minstu krøv til savnan og víðarilatan av nummarupplýsingardáta, hvussu dátuni verða latin, dagføring av upplýsingum o.tíl., og vavið á teimum treytum, ið kunnu áleggjast veitaranum av nummarupplýsingadátugrunnum og skráseting mótvegis endabrúkarunum.
Stk. 3. Ein endabrúkari kann krevja síni nummarupplýsingardáta hildin loynilig í sambandi við útboð av nummarupplýsingartænastum. Krav um hetta hevur samstundis við sær, at nummarupplýsingardáta hjá endabrúkarunum mugu ikki latast øðrum.
Stk. 4. Hóast ásetingina í stk. 3
1) kann nummarupplýsingardáta altíð latast øðrum fjarskiftiskervisveitarum ella fjarskiftistænastuveitarum við signaleringsendamáli,
2) skal nummarupplýsingardáta altíð latast teirri landsumfatandi nummarupplýsingartænastuni hjá veitingarskylduga veitaranum, sbrt. § 31, stk. 2, nr. 4.
Stk. 5. Landsumfatandi nummarupplýsingartænastan hjá veitingarskylduga veitaranum kann bert víðarigeva nummarupplýsingardáta, nevnd í stk. 4, nr. 2 í sambandi við, at svarað verður upp á áheitan frá almennu alarmtænastuni, løgregluni og rættinum.
Stk. 6. Ein endabrúkari kann hjá veitarum av alment atkomuligum nummarupplýsingardátugrunnum og nummarupplýsingardátuskráum krevja at verða skrásettur í øllum nummarupplýsingardátugrunnum og nummarupplýsingarskráum, tá nummarupplýsingarnar hjá endabrúkaranum eru viðkomandi fyri endamálið við nummarupplýsingardátugrunninum og nummarupplýsingarskránni. Veitarar av nummarupplýsingardátugrunnum og nummarupplýsingarskráum skulu eftir áheitan frá einum endabrúkara geva honum atgongd til at kanna egin nummarupplýsingardáta hjá viðkomandi veitara.
Stk. 7. Veitarar skulu uttan útreiðslur fyri endabrúkaran geva hesum upplýsingar um endamálið við dátugrunninum ella dátuskránni, og um aðrar nýtslumøguleikar av hesum, grundað á leitimøguleikar, ið eru innbygdir í elektroniskar útgávur, áðrenn endabrúkarin verður tikin við í dátugrunnin ella skránna, og áðrenn broyting av endamáli ella nevndu nýtslumøguleikum verður verksett.
Eftirlit við reglunum um nummarviðurskifti
§ 41. Fjarskiftiseftirlitið hevur eftirlit við, at reglurnar um nummarviðurskifti eftir hesi lóg verða hildnar og hevur myndugleika til at áseta nærri reglur um krøv til nummargoymslu, útbreiðslu av nummarkunning, nummarfyrisiting og dagføring, umframt reglur um dátuvernd.
Kapittul 7
Frekvensviðurskifti
Frekvensætlan
§ 42. Fjarskiftiseftirlitið ásetur føroysku frekvensætlanina og ásetur nærri reglur um fyrisiting og útlutan av frekvensum.
Frekvensloyvi
§ 43. Nýtsla av frekvensum kann einans fara fram við loyvi frá Fjarskiftiseftirlitinum uttan so, at frekvensloyvi ikki er kravt sambært reglum, ásettar við heimild í stk. 2. Frekvensloyvir verða tillutað eftir umsókn til einstakar brúkarar ella til ein avmarkaðan bólk av brúkarum.
Stk. 2. Fjarskiftiseftirlitið kann áseta nærri reglur um, at ávís frekvensøki kunnu nýtast uttan frekvensloyvi sambært stk. 1.
Stk. 3. Frekvensloyvir mugu ikki seljast ella avhendast uttan so, at Fjarskiftiseftirlitið frammanundan hevur givið loyvi til tað.
Áseting av treytum
§ 44. Fjarskiftiseftirlitið skal í frekvensloyvinum áseta treytir fyri nýtslu av frekvensinum, tá ið ávísir frekvensir verða tillutaðir. Frekvenslovyi skulu hava ásetingar um:
1) tíðarskeiðið, um frekvensloyvið er tíðaravmarkað,
2) tað ávísa kervið ella ta ávísu tøknina, ið loyvi skal nýtast til,
3) møgulig einkarættindi í sambandi við transmissión av serligum innihaldi ella av ávísum audiovisuellum tænastum,
4) umsjónarreglur og eftirlitsreglur, og
5) reglur um góðkenningar.
Stk. 2. Fjarskiftiseftirlitið kann harumframt, tá ávísir frekvensir verða tillutaðir, áseta nærri treytir fyri frekvensnýtsluni. Hesar treytir kunnu vera:
1) krøv um, at allar reglur viðvíkjandi útgerð verða hildnar, undir hesum eisini reglur viðvíkjandi elektromagnetiskum spektrum,
2) krav um at halda frekvensætlanina,
3) tøkniligar radiostandardir, undir hesum
a) mesta sendistyrki,
b) mesta antennuhædd og onnur antennuviðurskifti,
c) elektromagnetiskt bylgjuskifti og bandbreidd,
d) frekvenskonfiguratión,
4) krøv, grundað á interferens og móttøkuviðurskifti,
5) krøv, sum tryggja, at altjóða ásetingar viðvíkjandi frekvensspektrum verða hildnar, undir hesum eisini avtalan um altjóða frekvenstillutan,
6) avmarkingar, sum eru grundaðar á landafrøðiligu viðurskiftini í økinum, har loyvt er at nýta frekvensin,
7) krøv um serlig samfelagslig atlit,
8) krav um, at brúkarar av ávísum frekvensum skulu hava staðið tær kravdu próvtøkurnar,
9) krøv um, at gjaldfallin gjøld eru goldin,
10) avmarkingar viðvíkjandi sambinding við almenna fjarskiftiskervið, og
11) tíðaravmarkingar og avmarkingar í sambandi við útboð av vinnuligum veitingum.
Stk. 3. Fjarskiftiseftirlitið kann undir serligum umstøðum broyta ásettu treytirnar í frekvensloyvistíðarskeiðinum. Frekvensloyvishavarin skal kunnast í minsta lagi eitt ár frammanundan, at broyting verður framd, uttan so, at átrokandi umstøður gera tað neyðugt at nýta eina styttri freist.
Stk. 4. Fjarskiftiseftirlitið kann nokta at tilluta frekvens, um onnur neyðug loyvi at reka fjarskiftiskervi ella fjarskiftistænastu, ella kringvarpsvirksemi ikki eru fingin til vega.
Stk. 5. Tillutaður frekvensur kann verða afturtikin, um týðandi fortreytir fyri tillutan av einum frekvensloyvi broytast ella fella burtur. Freistin er tann sama sum í stk. 3.
Eftirlit
§ 45. Fjarskiftiseftirlitið hevur eftirlit við, at frekvenstilfeingið verður gagnnýtt á munadyggan hátt og í samsvari við altjóða avtalur, og at skaðiligt órógv av tráðleysum signalum verður avmarkað mest møguligt.
Stk. 2. Fjarskiftiseftirlitið kann, til tess at røkka endamálinum við lógini, áseta nærri reglur um frekvensir, nýtslu av frekvensum o.tíl.
Stk. 3. Fjarskiftiseftirlitið ásetur nærri reglur um tagnarskyldu fyri øll, sum móttaka upplýsingar ella radiosignalir, uttan at hetta er ætlað móttakaranum ella almenninginum.
Radioroyndir, kallitekin og eyðmerkingarnummur
§ 46. Fjarskiftiseftirlitið kann áseta nærri reglur um, at nýtsla av radiofrekvensum í áhugaradiotænastum og áhugaradiofylgisveinatænastum, flogferðsluradiotænastum og maritimum radiotænastum er treytað av, at staðin er ein kravd próvtøka.
Stk. 2. Fjarskiftiseftirlitið ásetur reglur fyri próvtøkur eftir stk. 1.
Stk. 3. Fjarskiftiseftirlitið ásetur reglur um veitan av kalliteknum og eyðmerkingarnumrum.
Stk. 4. Fjarskiftiseftirlitið ásetur reglur um nýtslu av kalliteknum og eyðmerkingarnumrum.
Útveiting
§ 47. Landsstýrismaðurin kann áseta reglur um, at almennum myndugleikum, eins og privatum, verður heimilað heilt ella partvíst at gera uppgávur, sum standast av reglum, givnar við heimild í § 46. Heimildin fevnir tó ikki um at gera reglur eftir § 46, sbr. tó stk. 3.
Stk. 2. Landsstýrismaðurin kann áseta reglur um møguleika Fjarskiftiseftirlitsins at gera nærri avtalu um treytir í sambandi við útinnan av teimum uppgávum, sum eru heimilaðar almennum ella privatum myndugleikum eftir stk. 1 og 3.
Stk. 3. 1) Landsstýrismaðurin kann áseta reglur, ið geva almennum myndugleikum, sum eru heimilaðir at gera uppgávur eftir stk. 1, heimild at áseta reglur, nevndar í § 46, stk. 2 og 3. Í hesum sambandi kunnu eisini ásetast reglur um kæru til Føroya Kærustovn sambært § 71, stk. 1.
Stk. 4. 1) Verður avgerðarmyndugleiki latin almennum myndugleikum, ella privatum, eftir stk. 1, skal landsstýrismaðurin áseta reglur um kæru til Føroya Kærustovn sambært § 71, stk. 1.
Gjøld
§ 48. Fjarskiftiseftirlitið krevur inn gjøld fyri frekvensnýtslu. Landsstýrismaðurin ásetur reglur um gjøld og kann áseta ómaksgjøld fyri umsjón og eftirlit við frekvensloyvunum, t.d. eftirlitsgjald.
§ 49. Landsstýrismaðurin kann áseta reglur um gjøld og ómaksgjøld fyri:
1) at halda próvtøkur og skriva út frekvensloyvi, undir hesum avrit av frekvensloyvum, sbr. § 46, stk. 2,
2) veitan av kalliteknum og eyðmerkingarnumrum, sbr. § 46, stk. 3,
3) at senda út rykkjarar, um kravd gjøld, sbr. nr. 1 og 2, og frekvensgjøld, sbr. § 48, ikki eru goldin, og
4) ársfjórðingsbýti fyri rindan av frekvensgjaldi, sbr. § 48.
Stk. 2. Fjarskiftiseftirlitið og aðrir almennir myndugleikar og privat, sum eftir § 47, stk. 1 eru heimilað at gera uppgávur, krevja inn gjøldini, ásett í stk. 1.
Kapittul 8
Onnur viðurskifti
Uppsetan, burturbeining o.a, av fjarskiftiskervi
§ 50. Tann, ið eigur ella ræður yvir fastari ogn, skal tola, at almenna fjarskiftiskervið verður lagt í, á ella ígjøgnum ognina. Hesi skulu eisini tola, at tann sum í kervisveitarans tænastu fæst við at leggja, reka, broyta, halda, viðlíka ella taka burtur kervið, skal fáa atgongd til umrødda kervið, um tað er neyðugt fyri at útinna arbeiðið.
Stk. 2. Kervisveitarar skulu í samráð við viðkomandi eigara ella ræðishavara áseta, hvar kervið skal leggjast, og hvussu neyðuga arbeiðið skal gerast. Hetta arbeiðið má ikki hava við sær óneyðugan ampa fyri eigara ella ræðishavara. Um semja ikki fæst um, hvussu arbeiðið skal gerast, tekur Fjarskiftiseftirlitið avgerð í málinum.
Stk. 3. Fjarskiftiseftirlitið kann áseta, hvar kervisendin er.
Stk. 4. Hevur tað í stk. 2 nevnda arbeiðið ampa við sær, skal verða roynt at minka um hendan ampa. Um arbeiðið hevur skaða við sær, skal tapið, ið stendst av hesum skaða, verða endurgoldið.
Stk. 5. Fjarskiftiseftirlitið kann seta krøv um, at veitari veitir fíggjarliga borgan og tøkniligar garantiir, í sambandi við arbeiðir upp á ella í sambandi við undirstøðukervi á annan mans ogn.
Vernd av kervi
§ 51. Byggivirksemi og verklagsvirksemi, útgraving ella annað virksemi, ið kann skaða ella órógva eitt fjarskiftiskervi, má ikki gerast uttan so, at ábyrgdarhavarin fyri virkseminum frammanundan hevur útvegað sær upplýsingar um kervið, og hevur lagt arbeiðið til rættis í samstarvi við kervisveitaran.
Stk. 2. Í sambandi við skaða ella órógv á fjarskiftiskervið sambært stk. 1 skal ábyrgdarhavarin steðga arbeiðinum til tess at avmarka skaðan, og uttan drál boða kervisveitaranum frá.
Stk. 3. Tann, sum hevur ábyrgdina av skaða ella órógv, skal endurgjalda tap, ið stóðst av skaðanum ella órógvanini.
Samfelagstýdningarmikið fjarskifti í tilbúgvingarstøðu og aðrari serstakari støðu
§ 52. Í neyðstøðu, sum hóttir heilsu, trygd ella almennan ordan, kann landsstýrismaðurin seta neyðug tiltøk í verk fyri heilt ella partvíst at steðga nýtsluni av fjarskiftiskervinum og fjarskiftisútbúnaði, burtursæð frá móttøkuútbúnaði, ið einans er innrættaður til móttøku av kringvarpi.
Stk. 2. Landsstýrismaðurin kann avmarka nýtslurættin, tá tað er neyðugt fyri at tryggja fjarskiftiskervið. Hesar avmarkingar í nýtslurættindum skulu fráboðast viðkomandi beinanvegin. Harumframt skal eisini Fjarskiftiseftirlitið hava fráboðan um avmarkingarnar.
Stk. 3. Landsstýrismaðurin kann áseta nærri reglur um avmarkingar í nýtslurættinum, um tað er neyðugt fyri at tryggja fjarskifti í neyðstøðu og aðrari serligari støðu, uttan útreiðslur fyri landið.
Óheimilað atgongd til kunningartænastur og innihaldstænastur
§ 53. Tað er ikki loyvt við sølu fyri eyga at gera, innflyta, selja, eiga ella broyta avkotara ella annan líknandi útbúnað, hvørs endamál er at geva óheimilaða atgongd til kunningartænastur og innihaldstænastur, ið vanliga verða latnar mótvegis gjaldi. Lýsing ella annað slag av marknaðarføring fyri slíka útgerð er heldur ikki loyvd.
Kapittul 9
Myndugleiki, eftirlit og heimildir
Landsstýrismaðurin
§ 54. Myndugleikin á fjarskiftisøkinum er hjá landsstýrismanninum, ið skal tryggja, at endamálið við hesi lóg verður fylgt.
Stk. 2. Fjarskiftiseftirlitið er eftirlitsmyndugleiki hjá landsstýrismanninum á fjarskiftisøkinum.
Stk. 3. Landsstýrismaðurin kann áseta reglur um virki Fjarskiftiseftirlitsins.
§ 55. Landsstýrismaðurin kann heimila einum myndugleika undir ráðnum, ella eftir samráðing við avvarðandi landsstýrismann, øðrum landsmyndugleikum at útinna tær heimildir, ið eftir hesi lóg eru latnar landsstýrismanninum.
Stk. 2. Landsstýrismaðurin kann áseta reglur um kærur um avgerðir, ið eru tiknar av myndugleikum við heimild í stk. 1, undir hesum eisini, at avgerðirnar ikki kunnu kærast.
Stk. 3. Landsstýrismaðurin kann áseta reglur um útinnan av teimum heimildum, ið ein annar landsmyndugleiki eftir samráðing við avvarðandi landsstýrismann fær heimild til at útinna sambært stk. 1.
§ 56. Landsstýrismaðurin kann ikki geva Fjarskiftiseftirlitinum tænastuboð um, hvussu Fjarskiftiseftirlitið skal røkja myndugleikauppgávu sína í ítøkiligum málum, um viðgerð av og avgerð í einstøkum málum, um gerð av fyrisitingarligum reglum á økjum, sum Fjarskiftiseftirlitið við lóg hevur fingið heimild at áseta reglur á, ella um annað eftirlitsvirksemi hjá Fjarskiftiseftirlitinum, sum skal tryggja, at lógin og reglur, givnar við heimild í lógini, verða hildnar.
Stk. 2. Landstýrismaðurin kann ikki geva almennum myndugleikum, ella privatum, sum hava fingið heimild eftir § 47, stk. 1 til heilt ella partvís at útinna uppgávur, tænastuboð viðvíkjandi teimum ítøkiligu málum og uppgávum, sum tann almenni myndugleikin, ella privati, hevur fingið myndugleika at útinna.
Stk. 3. Landsstýrismaðurin kann ikki geva undantaksloyvi frá fyrisitingarligum reglum, ið landsstýrismaðurin hevur ásett við heimild í hesi lóg.
Fjarskiftiseftirlitið
§ 57. Fjarskiftiseftirlitið tekur, um annað ikki er ásett, avgerðir eftir hesi lóg og hevur eftirlit við, at reglurnar í lógini verða hildnar, undir hesum at veitarar av fjarskiftiskervum og fjarskiftistænastum halda sínar skyldur.
Stk. 2. Fjarskiftiseftirlitið kann taka fyribils avgerðir, um Fjarskiftiseftirlitið ikki móttekur upplýsingar ella tilfar sbrt. § 58, stk. 2, og umstøðurnar annars tala fyri hesum.
Stk. 3. Fjarskiftiseftirlitið kann, um tað er neyðugt, útvega sær hjálp frá løgregluni til tess at útinna eftirlitsuppgávur, sum nevndar eru í § 58, § 61, stk. 1 og § 62, stk. 1, og til at fremja tiltøk, sum nevnd eru í § 60. Landsstýrismaðurin kann áseta nærri reglur um møguleika hjá Fjarskiftiseftirlitinum at útvega sær hjálp frá løgregluni.
Stk. 4. Kunngerðir, sum Fjarskiftiseftirlitið ger sambært hesi løgtingslóg, skulu lýsast í Kunngerðablaðnum.
Máting, stakroyndareftirlit og innsavnan av upplýsingum o.a.
§ 58. Fjarskiftiseftirlitið kann gera stakroyndir og mátingar og seta upp yvirvøkuútgerð og telemetriútbúnað, sum hevur samband við hetta, um tað er neyðugt. Nevndu eftirlitsuppgávur og yvirvøkuuppgávur kunnu, um tað er neyðugt, setast í verk, uttan at boðað er frá frammanundan.
Stk. 2. Fjarskiftiseftirlitið kann savna inn øll dáta og allar upplýsingar, ið eru neyðugar fyri at fremja eftirlitsuppgávur og yvirvøkuuppgávur sínar, undir hesum roknskap og roknskaparskjøl o.a. Fjarskiftiseftirlitið kann eisini krevja, at dáta ella upplýsingar verða latnar inn regluliga, og kann seta krøv til innihald, uppseting, elektroniska innlating, innlatingarfreistir o.a.
Krøv til fjarskiftisútbúnað
§ 59. Fjarskiftiseftirlitið ásetur reglur um krøv, undir hesum standardir ella góðkenningar, sum fjarskiftisútbúnaður, ið skal nýtast í Føroyum, skal lúka.
Stk. 2. Fjarskiftisútbúnaður, sum ikki lýkur tey krøv, ið Fjarskiftiseftirlitið ásetur, kann ikki uttan loyvi Fjarskiftiseftirlitsins innflytast, seljast ella nýtast í Føroyum.
Umvæling av breki ella funktiónssliti
§ 60. Fjarskiftiseftirlitið kann geva boð um, at brek ella illa virkandi almenn fjarskiftiskervi, almennar fjarskiftistænastur ella fjarskiftisútbúnaður o. tíl skal umvælast ella rættast. Tann, ið fær slík boð, hevur ábyrgdina fyri at seta í verk neyðugu tiltøkini innan fyri ta freist, ið Fjarskiftiseftirlitið ásetur.
Stk. 2. Um boð frá Fjarskiftiseftirlitinum ikki verða fylgd, kann Fjarskiftiseftirlitið fyribils seta úr gildi ella steingja viðkomandi kervi, tænastu ella útgerð. Um tørvur er á tí, kann Fjarskiftiseftirlitið gera umvælingina og síðan senda rokningina til ábyrgdahavaran. Fjarskiftiseftirlitið kann,um neyðugt, krevja, at fjarskiftiskervið verður avtikið.
Atgongd til høli og flutningsamboð
§ 61. Fjarskiftiseftirlitið skal í sambandi við eftirlitskanning hava atgongd til høli og flutningstól, undir hesum atgongd til fjarskiftiskervi, fjarskiftistænastu ella annan fjarskiftisútbúnað.
Atgongd í sambandi við órógv
§ 62. Í neyðstøðu, sum hóttir lív og heilsu, kann Fjarskiftiseftirlitið, uttan rættarúrskurð og eftir at hava víst samleikaprógv, fáa atgongd til almennar og privatar ognir við tí fyri eyga at steðga órógvi av tænastum, radioútbúnaði, teleterminalútbúnaði, umframt elektriskum og elektroniskum tólum.
Stk. 2. Fjarskiftiseftirlitið skal skjótast gjørligt og seinast 24 tímar eftir, at Fjarskiftiseftirlitið hevur fingið atgongd sambært stk. 1, leggja málið fyri rættin. Rætturin avger við rættarúrskurði, um inntrivið kann góðtakast. Átti inntrivið ikki at verið framt, skal rætturin boða landsstýrismanninum frá hesum.
Kapittul 10
Gjald
§ 63. Útreiðslur Fjarskiftiseftirlitsins, frádrigið sølu av vørum og tænastuveitingum og rentuinntøkum, verða rindaðar við gjøldum frá teimum fyritøkum, ið hava fingið loyvi sambært § 4.
Stk. 2. Við útrokning av gjaldinum fyri eitt álmanakkaár verða útreiðslur Fjarskiftiseftirlitsins sambært stk. 1 býttar millum loyvishavararnar, í mun til teirra marknaðarpart álmanakkaárið frammanundan, av nettosøluni, ið er treytað av loyvinum sambært § 4.
§ 64. Í seinasta lagi 1. november á hvørjum ári lata veitarar, ið hava fingið loyvi sambært § 4, Fjarskiftiseftirlitinum grannskoðaðar upplýsingar um nettosølu sambært § 63, stk. 2 fyri undanfarna árið.
Stk. 2. Veitarar, ið hava fingið loyvi sambært § 4, rinda gjald eftir § 63 fyri fult álmannakkaár, eisini í teimum førum, har veitari bert hevur havt loyvi ein part av árinum.
Stk. 3. Verða feløg løgd saman, rindar felagið, sum heldur fram, gjaldið hjá avtikna felagnum.
Stk. 4. Heldur eitt felag uppat av øðrum orðsøkum enn í stk. 3, ella letur tað loyvið frá sær, ella missir tað, rindar felagið minsta gjald sambært § 65, stk. 1.
§ 65. Loyvishavarar verða altíð álagdir eitt minsta gjald á 2.000 kr. árliga.
Stk. 2. Hvørt ár í februar mánaði krevur Fjarskiftiseftirlitið ársgjaldið fyri undanfarna álmanakkaár.
Stk. 3. Gjøldini kunnu innheintast við panting.
Stk. 4. Fjarskiftiseftirlitið kann í serligum førum seta gjaldið hjá einum veitara niður.
§ 66. Landsstýrismaðurin kann gera nærri reglur um gjøld, undir hesum reglur um krøv til upplýsingar frá veitara, skilmarking av hvørjar tænastur og veitingar eru fevndar av avgjaldi, hvussu marknaðarpartar skulu roknast, reglur um innkrevjing o.a.
Kapittul 11
Samskifti
§ 67. 1) Landsstýrismaðurin kann áseta reglur um, at skrivligt samskifti við Fjarskiftiseftirlitið og Føroya Kærustovn um viðurskifti, sum eru fevnd av hesi lóg ella av reglum, ásettum við heimild í hesi lóg, skal vera talgilt.
Stk. 2. Landsstýrismaðurin kann áseta nærri reglur um talgilt samskifti, undir hesum um nýtslu av ávísum KT skipanum, serligum talgildum formatum, talgildari undirskrift o.tíl.
Stk. 3. Eini talgild boð eru komin fram, tá tey eru tøk hjá móttakaranum.
§ 68. 1) Landsstýrismaðurin kann áseta reglur um, at Fjarskiftiseftirlitið og Føroya Kærustovnur kunnu flýggja út avgerðir og onnur skjøl eftir hesi lóg uttan undirskrift, maskinskrivaðari ella líknandi undirskrift, ella við nýtslu av tøkni, sum tryggjar eintýðuga eyðmerking av viðkomandi, sum hevur útgivið avgerðina ella skjalið. Tìlík skjøl eru at javnmeta við skjøl, sum eru persónliga undirskrivað.
§ 69. Tá ið tað eftir hesi lóg, ella reglum, ásettum við heimild í hesi lóg, er kravt, at eitt skjal, sum er útflýggjað av øðrum enn einum almennum myndugleika sambært § 67, stk. 1, skal vera undirskrivað, kann hetta krav verða lúkað við nýtslu av tøkni, sum tryggjar eintýðuga eyðmerking av viðkomandi, sum hevur útgivið skjalið. Tìlík skjøl eru at javnmeta við skjøl, sum eru persónliga undirskrivað.
Kapittul 12
Kæra
§ 70. Kærast kann til Fjarskiftiseftirlitið um virksemið hjá tænastuveitarum og kervisveitarum eftir hesi lóg.
Stk. 2. Kærufreistin er 4 vikur frá tí degi, kærarin fekk ella átti at havt fingið kunnleika til tey viðurskifti, sum kært verður um.
Stk. 3. Veitarar av fjarskiftiskervi ella fjarskiftistænastum, ið hava fingið loyvi sambært § 4, skulu kunna í avtalum við endabrúkarar og ásýniligt á heimasíðu sínari um kærumøguleika, kærufreist og kærumyndugleika eftir hesi grein.
§ 71. 1) Føroya Kærustovnur tekur avgerð í málum, sum eftir løgtingslógini ella reglum, ásettar við heimild í løgtingslógini, eru lagdar til Føroya Kærustovn.
Stk. 2. 1) Avgerðir hjá Fjarskiftiseftirlitinum kunnu kærast til Føroya Kærustovn innan 4 vikur eftir, at viðkomandi hevur fingið fráboðan um avgerðina.
Kapittul 13
Sektarásetingar og revsiásetingar
Daglig ella vikulig bót
§ 72. Fjarskiftiseftirlitið kann áleggja tí, sum ikki letur ella ikki rættstundis letur upplýsingar, ið Fjarskiftiseftirlitið kann krevja, sambært § 58, stk. 2, ella sum ikki fylgir boðum ella avgerðum frá Fjarskiftiseftirlitinum, dagliga ella vikuliga bót, til undanlátið ella brotið heldur uppat, uttan so, at harðari revsing er uppiborin eftir aðrari lóggávu.
Afturtøka
§ 73. Fjarskiftiseftirlitið kann taka aftur tillutað loyvi, frekvensloyvi og nummartilfeingi, um veitarin av grovum óansni:
1) ikki heldur skyldur, krøv ella treytir í loyvum, nummartillutanum og frekvensloyvum, sbrt. §§ 4-6, § 35, stk. 4 og 5, § 43, stk. 3 og § 44, stk. 1 og 2 ella
2) fremur brot á reglur, ásettar við heimild í § 6, stk. 6, § 35, stk. 3, § 45, stk. 2, § 46, § 48 og § 49, stk. 1,
3) ikki fylgir avgerðum, tiknar við heimild í hesi lóg.
Revsing
§ 74. Um ikki harðari revsing er uppiborin eftir aðrari lóggávu, verður við bót revsaður
1) tann, ið fremur brot á § 4, stk. 4, § 7, stk. 5, § 25, stk. 1, § 28, stk. 3, § 30, § 40, stk. 3-6, § 43, stk 1 ella § 52, stk 1 og 2,
2) tann, ið ikki heldur skyldur, ið eru álagdar við heimild í § 10, stk. 1, nr. 2 og 3,
3) tann, sum tilvitað ella við grovum ósketni fremur brot á § 50, stk. 1 og 2, § 51, stk. 1 og 2 ella § 53,
4) tann veitingarskyldugi veitarin, sum undir serligum umstøðum ikki heldur reglur, krøv og hámarksprísir sambært § 31, stk. 6, ella hámarksprísir, sum ásettir við heimild í § 32.
5) tann, sum ikki heldur krøv, ið eru ásett við heimild í § 5, stk. 2 og § 44, stk. 1 og 2.
Stk. 2. Brot á reglur, ásettar við heimild í § 21, § 26, stk. 3, § 27, § 45, stk. 3, § 46, § 49, stk. 1 ella § 52, stk. 3 kunnu revsast við bót.
Stk. 3. Um veitingarskyldugur veitari ikki heldur skyldur, álagdar við heimild í § 31, stk. 1 og 2, ella reglum, ásettar við heimild í § 31, stk. 3-5, kann hann revsast við bót, um talan er um serligar umstøður.
Stk. 4. Feløg og aðrir løgfrøðiligir persónar verða revsaðir sambært reglunum í kapitli 5. í revsilógini.
Stk. 5. Tá ið revsing verður ásett eftir stk. 1, nr. 2, skulu afturat vanligu reglunum í 10. kapitli í revsilógini takast atlit til umsetningin hjá tí løgfrøðiliga persóninum árið fyri dómssøgnina, ella til sektaruppskot er fyrilagt.
Kapittul 14
Gildiskomureglur og skiftisreglur
§ 75. Henda lóg kemur í gildi 1. januar 2016.
Stk. 2. Samstundis fer úr gildi løgtingslóg nr. 79 frá 23. mai 1997 um fjarskifti.
Stk. 3. Kunngerðir, fyrisitingarligar ásetingar og avgerðir, undir hesum loyvi, frekvensloyvi og tillutanir av numrum, ið eru latin, tikin ella varðveitt eftir løgtingslóg nr. 79 frá 23. mai 1997 um fjarskifti, ella eftir reglum, ásettar við heimild í lógini, verða verandi í gildi, til tær fara ella verða settar úr gildi.
Stk. 4. Fyri rindan av útreiðslum Fjarskiftiseftirlitsins í 2015, verða uppgerð, útrokningar o.a. í kapitli 10, §§ 63-66 nýttar.
Í Tinganesi, 22. mai 2015
Kaj Leo Holm Johannesen (sign.)
løgmaður
Lm. nr. 106/2014
1) Broytt við løgtingslóg nr. 31 frá 17. mars 2022, har § 34 ljóðar soleiðis: “Henda løgtingslóg kemur í gildi 1. juli 2022 og samstundis fara løgtingslóg nr. 110 frá 13. desember 2006 um kærunevnd í lendismálum og løgtingslóg nr. 17 frá 8. mai 2008 um Vinnukærunevnd úr gildi.”
2) Broytt við løgtingslóg nr. 91 frá 7. juni 2020, har § 79 ljóðar soleiðis: “Henda løgtingslóg kemur í gildi 1. januar 2021.”
