Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
6. mai 2025Nr. 85
Kunngerð um tøknilig krøv og fyriskipan av tinglýsingarskipanini
Við heimild í § 24 a, stk. 3, sum ásett í § 1, nr. 13, í løgtingslóg nr. 128 frá 13. desember 2024 um broyting í løgtingslóg um tinglýsing, lov om Gældsbreve, løgtingslóg um tinglýsingargjøld v.m. og løgtingslóg um tinglýsingaravgjald verður ásett:
Kapittul 1
Talgilda undirskriftin
§ 1. Tann talgilda undirskriftin, sum skal brúkast við stovnan og fráboðan av skjølum til tinglýsingar, skal lúka krøvini í løgtingslóg um talgildan samleika.
Stk. 2. Talgild innritan skal haraftrat brúkast við atgongd til upplýsingar um longu framdar tinglýsingar, fráboðanir, uppsløg o.a. við uppsløgum í akfarsbókini.
§ 2. Við móttøku av einum elektroniskum skjali til tinglýsingar ger Umhvørvisstovan eitt eftirlit av teimum tilknýttu talgildu undirskriftunum umframt til hvønn, tann einstaka talgilda undirskriftin hoyrir til.
Stk. 2. Kann ein talgild undirskrift, sum sambært løgtingslógini ella øðrum forskriftum skal setast á eitt elektroniskt skjal, ikki góðkennast, sbr. stk. 1, kann tinglýsing ikki fremjast.
Stk. 3. Umhvørvisstovan kann krevja, at rakstrargjaldið fyri nýtslu av talgildari undirskrift verður rindað í sambandi við fráboðanina av talgildum skjølum til tinglýsingar.
§ 3. Innihaldið í einum skjali, sum verður fráboðað til tinglýsingar, má ikki broytast, eftir tað hevur fingið talgilda undirskrift.
§ 4. Fráboðanir frá Tinglýsingini, undir hesum fráboðanir um tinglýsing, verða sendar elektroniskt, sbr. stk. 2.
Stk. 2. Fráboðan um tinglýsing verður send við vanligum posti í teimum førum, har Umhvørvisstovan av tøkniligum ávum ikki hevur møguleika at senda fráboðanina elektroniskt.
Kapittul 2
Tøknilig krøv til skjøl
§ 5. Skjøl, sum skulu vera grundarlag fyri tinglýsing, skulu vera stovnaði við nýtslu av teimum sniðum, sum eru atkomulig umvegis talgildu innlatingarskipanina hjá Umhvørvisstovuni.
§ 6. Talgild fylgiskjøl til eitt skjal, ið verður fráboðað til tinglýsingar, skulu vera av slagnum PDF.
Kapittul 3
Funkur í talgildu innlatingarskipanini
Nýtsla av funkum í tinglýsingarskipanini
§ 7. Til talgildu innlatingarskipanina er knýtt eitt undirskrivingaryvirlit, ein fulltrúardátugrunnur umframt yvirlit yvir skjøl, sum umvegis innlatingarskipanina eru send til tinglýsingar.
§ 8. Tá eitt elektroniskt skjal, sum skal fráboðast til tinglýsingar, er útfylt, kann fráboðarin gera niðanfyri standandi:
1) skjalið kann sendast til undirskrivingar, og
2) tinglýsingaravgjald og tinglýsingargjald kann rindast
Undirskrivingarmappan
§ 9. Talgilda undirskrivingin av einum skjali, sum skal fráboðast til tinglýsingar, verður gjørd í undirskrivingarmappuni.
Stk. 2. Tá eitt skjal verður lagt í undirskrivingarmappuna, skal upplýsast, hvør fráboðari er og hvør síðani skal undirskriva skjalið, sbr. stk. 3. Haraftrat skal upplýsast ein teldupostadressa, hvareini boð verða send, tá skjalið síðani verður undirskrivað.
Stk. 3. P-tøl og v-tøl hjá persónum og virkjum, sum skulu kunna undirskriva skjalið, skulu upplýsast. Er undirskrivarin eitt virki, skulu p-tølini hjá tekningarheimilaðum ella p-tølini hjá starvsfólkunum upplýsast.
§ 10. Tá eitt skjal er undirskrivað talgilt, sbr. § 9, stk. 2, kann fráboðarin senda tað til tinglýsingar. Fráboðarin skal undirskrivað skjalið talgilt.
§ 11. Eitt skjal, sum liggur í undirskrivingarmappuni, kann strikast av fráboðaranum.
Stk. 2. Eitt skjal í undirskrivingarmappuni, sum ikki áðrenn 30 dagar er fráboðað til tinglýsingar, kann verða strikað av Umhvørvisstovuni.
Skráseting av skjølum
§ 12. Í tinglýsingarskipanini verður neyðuga skjalprógvanin, skjalváttan o.a. fyri tinglýsing skrásett. Haraftrat verður fylgiskjal, sum víst verður til í fráboðaða skjalinum, skrásett í tinglýsingarskipanini.
Dátugrunnur fyri fulltrúir
§ 13. Í dátugrunninum fyri fulltrúir verða fulltrúir skrásettar sambært § 49 b, sum ásett í § 1, nr. 37 í løgtingslógini og kapittul 3 í kunngerð um atgongd til akfarsbókina og um tinglýsingarháttin, sbr. tó stk. 4.
Stk. 2. Í dátugrunninum fyri fulltrúir er ein skrá fyri galdandi og uppathildnar fulltrúir.
Stk. 3. Eitt yvirlit yvir fulltrúir, sum eru knýttar til ein talgildan samleika, síggjast í fulltrúaryvirlitinum i innlatingarskipanini hjá tinglýsingini. Um talgilda undirskriftin, sum verður nýtt, er ein undirskrift hjá einum starvsfólki, síggjast allar fulltrúir, ið viðvíkja viðkomandi virki, í yvirlitinum.
Stk. 4. Tær fulltrúir, sum eru fevndar av § 6, stk. 1, í kunngerð um atgongd til akfarsbókina og um tinglýsingarháttin, verða ikki skrásettar elektroniskt, men úttiknar av Tinglýsingini til manuella viðgerð.
Kapittul 4
Íbinding til skipanina
§ 14. Umhvørvisstovan kann loyva skipan-til-skipanatgongd til tinglýsingarskipanina. Íbindingin til skipanina skal góðkennast av Umhvørvisstovuni.
§ 15. Umsókn um góðkenning av einari íbinding verður send Umhvørvisstovuni sambært § 50 c, stk. 4, sum ásett í § 1, nr. 42 í løgtingslógini.
Stk. 2. Góðkenning av einari íbinding kann einans gerast, tá ið umsøkjarin er skrásettur sum stórkundi hjá Umhvørvisstovuni, sbr. § 5, stk. 2, sum ásett í § 4 í løgtingslógini og § 5, stk. 4, sum ásett í § 3, nr. 1 í løgtingslógini.
§ 16. Við umsókn um góðkenning av einari íbinding skal umsøkjarin upplýsa hvørt eitt ella fleiri av starvsfólkunum í virkinum skulu virka sum umsitari av atgongd virkisins til tinglýsingarskipanina. Hetta er tó ikki galdandi, um umsøkjari er ein góðkendur fráboðari, sbr. kapittul 4 í kunngerð um atgongd til akfarsbókina og um tinglýsingarháttin. Í tílíkum føri verður atgongdin til skipanina umsitin av tí umsitara, ið er tilnevndur eftir § 13, stk. 2, í kunngerð um atgongd til akfarsbókina og um tinglýsingarháttin.
Stk. 2. Umsitari hevur atgongd at skráseta starvsfólk hjá virkinum, ið skulu kunna nýta íbindingina til skipanina. Umsitari kann ikki sjálvur fráboða skjøl til tinglýsingar við nýtslu av íbindingini til skipanina.
Stk. 3. Við skráseting av starvsfólkum sambært stk. 2 skal umsitari upplýsa navn, p-tal og kontaktupplýsingar hjá viðkomandi.
Stk. 4. Um tað í mun til eitt ávíst virki, hvørs vegna fleiri starvsfólk umvegis skipan-til-skipan skulu hava atgongd til tinglýsingarskipanina, eru serligar orsakir, sum gera tað óskynsamt at tilnevna ein umsitara eftir stk. 1, kann Umhvørvisstovan gera av, at Umhvørvisstovan stendur fyri skrásetingini av starvsfólkunum hjá virkinum, sum skulu nýta atgongdina.
Stk. 5. Umhvørvisstovan ásetir reglur um tøkniligu krøvini, ið íbindingin til skipanina skal lúka. Landsstýrisfólkið góðkennir reglurnar sambært 1. pkt.
§ 17. Umhvørvisstovan kann afturkalla eitt loyvi eftir § 14, um treytirnar í §§ 15 og 16 ikki longur eru loknar. Áðrenn Umhvørvisstovan afturkallar eitt loyvi, skal loyvishavarin hava høvi at greiða frá áskoðan sínari um hetta.
Kapittul 5
Innihaldið í og nýtslan av tinglýsingarskipanini
§ 18. Umhvørvisstovan er dátuábyrgdari fyri tinglýsingarskipanina við tilknýttum dátagrunnum.
§ 19. Tinglýsingarskipanin kann bert førast og goymast hjá tí dátuviðgera, sum Umhvørvisstovan hevur gjørt avtalu við hesum viðvíkjandi t.e. veitari.
Stk. 2. Veitari kann við loyvi frá Umhvørvisstovuni lata uppgávuna til undirveitarar.
§ 20. Tinglýsingarskipanin kann bert goyma upplýsingar, undir hesum persónupplýsingar, sum sambært løgtingslóg um tinglýsing ella øðrum tinglýsingarforskriftum kunnu førast í skipanina.
§ 21. Upplýsingar í tinglýsingarskipanini kunnu bert fáast til vegar við grundarlagi í fráboðaðum skjølum til tinglýsingar ella har tað annars sambært løgtingslóg um tinglýsing ella øðrum tinglýsingarforskriftum er heimild at føra upplýsingar í skipanina, sbr. tó stk. 2.
Stk. 2. Upplýsingar í tinglýsingarskipanini kunnu haraftrat fáast til vegar við elektroniskari flyting av upplýsingum frá skránni hjá Landsfólkayvirlitinum, adressuskránni, akfarsskránni og virkisskránni.
Stk. 3. Eftir áheitan frá tinglýsingarskipanini verða upplýsingar, fevndar av stk. 2, fluttar beinleiðis umvegis Heldina til tinglýsingarskipanina.
§ 22. Viðgerð av upplýsingum kann einans fremjast til dagføringar av upplýsingum í skipanini umframt viðgerð við tí í hyggju at framleiða upplýsingar, sum sambært løgtingslóg um tinglýsing ella øðrum tinglýsingarforskriftum skulu veitast av tinglýsingarskipanini.
§ 23. Frá tinglýsingarskipanini kann elektroniskur flutningur av upplýsingum gerast í hesum førum:
1) Upplýsingar, sum eru viðkomandi fyri útrokningina av tinglýsingaravgjaldi, kunnu latast Gjaldstovuni.
2) Upplýsingar frá tinglýsingarskipanini kunnu latast til eina góðkenda íbindingarskipan, sbr. § 14, við teirri ætlan at fráboða eitt skjal til tinglýsingar.
Stk. 2. Úrskrift úr tinglýsingarskipanini verður gjørd á internetportalinum hjá Umhvørvisstovuni ella við brúki av einari góðkendari íbindingarskipan.
Kapittul 6
Trygdartiløk fyri tinglýsingarskipanini
§ 24. Umhvørvisstovan er fevnd av rundskriv um KT-trygd og er av Fíggjarmálaráðnum flokkað í trygdarbólk 2. Viðgerð av persónupplýsingum skal fara fram í samsvari við løgtingslóg um vernd av persónupplýsingum.
Stk. 2. Ein skrivlig avtala millum Umhvørvisstovuna og veitaran, sbr. § 19, stk. 1, skal áseta, at reglurnar í teimum í stk. 1 nevndu reglum somuleiðis eru galdandi fyri viðgerðina hjá veitaranum og møguligum undirveitarum hjá hesum, sbr. § 19, stk. 2.
§ 25. Neyðugt eftirlit skal fremjast fyri at tryggja, at ósannar upplýsingar ikki verða viðgjørdar.
Stk. 2. Upplýsingar, sum vísa seg vera ósannar, skulu, í tann mun tað er gjørligt sambært løgtingslóg um tinglýsing ella øðrum tinglýsingarforskriftum, skjótast gjørligt rættast ella strikast.
§ 26. Starvsfólk hjá Umhvørvisstovuni, sum fáast við skráseting av tinglýsingarskjølum, hava atgongd til at skráseta upplýsingar í skipanini.
Stk. 2. Starvsfólk nevnd í stk. 1 fáa eitt persónligt og trúnaðarligt loyniorð, ið skal brúkast, tá tey rita inn í talgildu tinglýsingarskipanina við tí í hyggju at skráseta.
Stk. 3. Umhvørvisstovan skal kanna, at starvsfólk, sum hava atgongd at skráseta í tinglýsingarskipanini, framvegis hava tørv á teimum rættindum, ið tey eru heimilaði til.
§ 27. Loyniorð skulu tøppast soleiðis, at tey ikki kunnu lesast.
Stk. 2. Tá skrásetingar verða gjørdar av upplýsingum í skipanini ella ritað verður inn í skipanina, skulu við hvørt brúkaraskifti og tá farið verður frá einum skíggja, gerast tílíkar fyriskipanir, at nýggj innritan við ætlan um skráseting ella uppslag fer at krevja tøppan av persónligum og trúnaðarligum loyniorði.
§ 28. Allar skrásetingar, sum verða gjørdar í tinglýsingarskipanini, skulu loggast. Loggurin skal innihalda upplýsingar um tíð, brúkara, slag av nýtslu og tilskilan av ogn, persóni ella akfari, sum upplýsingarnar viðvíkja. Skrásetingin skal goymast í minsta lagi í seks mánaðir.
Stk. 2. Umhvørvisstovan og avvarðandi aðalráð kann til eina og hvørja tíð krevja logupplýsingar fyri skipanina frá veitaranum.
§ 29. Allar avvístar atgongdarroyndir verða skrásettar elektroniskt í tinglýsingarskipanini.
Kapittul 7
Víðarilatan av upplýsingum úr tinglýsingarskipanini
§ 30. Upplýsingar í skipanini kunnu latast víðari til einhvønn í samsvari við reglurnar í løgtingslóg um tinglýsing og reglum ásettar sambært henni. Upplýsingar um p-tøl verða ikki latnar víðari, sbr. § 50 c, stk. 1, í løgtingslóg um tinglýsing. Hevur likamligur persónur navnavernd og bústaðarvernd sambært § 25 í løgtingslóg um fólkayvirlit fer hetta haraftrat at síggjast í tinglýsingarskipanini.
Kapittul 8
Gildiskoma
§ 31. Henda kunngerð kemur í gildi 20. mai 2025.
Umhvørvismálaráðið, 6. mai 2025
Margit Stórá (sign.)
landsstýriskvinna
/ Pól E. Egholm (sign.)
