Kunngerð nr. 84 frá 29. september 2026 um útbúgving til kt-supportara

29. september 2026Nr. 84

Kunngerð um útbúgving til kt-supportara

Við heimild í § 4, stk. 1, § 8, stk. 3, § 14, stk. 1 og 2, § 17, stk. 2 og § 18, stk. 1 og 2 í løgtingslóg nr. 94 frá 29. desember 1998 um yrkisútbúgvingar, sum broytt við løgtingslóg nr. 48 frá 26. mars 2002 og løgtingslóg nr. 52 frá 17. mai 2011 og eftir tilmæli frá yvirkisútbúgvingarráðnum og samtykt frá yrkisnevndini, verður ásett:

Um útbúgvingina

§ 1. Í útbúgvingini til kt-supportara fær lærlingurin gjøgnum skúlagongd og verkliga læru vitan og førleikar innan hesi kjarnuøki:

1)   Sniðgeving, planlegging, uppbygging, innlegging, samanseting, fyrisiting og viðlíkahald av ambætaraloysnum og netverksloysnum, umframt sniðgeving og verkseting av trygdarloysnum, feilfinning og rætting av villum á systemstøði og modulstøði.

2)   Skipaðar arbeiðshættir fyri veiting av kt-tænastum.

3)   KT-trygd og dátutrygd, herundir fyribyrging av álopum, at verja dátur og skipanir, trygdaravrit og endurskapan.

4)   Uppbygging, innlegging, uppseting, royndarkoyring, viðlíkahald, uppstiging, feilfinning og rætting av villum í teldum, ambætarum og netum, umframt fylgibúnaði á kervisstøði og modulstøði og tillagan til brúkaran, uppstiging av stýriskipanum og nýtslu.

5)   Kundarøkt.

Útbúgvingartíð, bygnaður og innihald

§ 2. Útbúgvingin tekur 2½ ár.

Stk. 2. Útbúgvingin er lutað sundur í verkliga læru á góðkendum læruplássi og skúlagongd.

§ 3. Skúlagongdin, íroknað sveinaroyndarskeiðið, er 48 vikur og verður skipað soleiðis:

1)   1. skúlaskeið, 2. skúlaskeið og 3. skúlaskeið á tilsamans 43 vikur, og

2)   sveinaroyndarskeið á 5 vikur.

Stk. 2. Skúlagongdin í 1.-3. skúlaskeiði fevnir um almennar lærugreinar, yrkislærugreinar og vallærugreinar. Skemalagda undirvísingartíðin er tilsamans 1.728 undirvísingartímar.

§ 4. Lærlingurin hevur almennar lærugreinar sum part av útbúgvingini. Almennu lærugreinarnar eru á hesum stigum og við hesum undirvísingartímatali:

1)   Enskt C, 133 undirvísingartímar.

2)   Føroyskt C, 140 undirvísingartímar.

3)   Støddfrøði C, 167 undirvísingartímar.

Stk. 2. Skemalagda tímatalið til almennu lærugreinarnar er tilsamans 440 undirvísingartímar.

Stk. 3. Innihald og førleikamál í almennu lærugreinunum verða lýst í námsætlanunum fyri lærugreinarnar.

§ 5. Skemalagda tímatalið til yrkislærugreinar er tilsamans 1.072 undirvísingartímar við hesum lærugreinum:

1)   Ambætaraautomatisering.

2)   Ambætarafyrisiting og trygd.

3)   Ambætarastýriskipan.

4)   Ambætaratøkni.

5)   Ambætaratøkni t.e. Linux.

6)   Ambætaratøkni t.e. veikleikagreining.

7)   Fyrstahjálp.

8)   Eldsløkking.

9)   Feilrætting á neteindum.

10) KT-tænastustýring.

11) Kundatænasta.

12) Net.

13) Neteindir.

14) Optimering og automatisering.

15) Praktisk feilfinning.

16) Samskifti.

17) Script.

18) Stýriskipanir.

19) Support.

20) Teldutænasta.

21) Teldutøkni.

22) Tøknilig skjalfesting.

23) Tráðleyst net (WLAN).

24) Trygd.

25) Trygdaravrit og endurskapan.

26) Virkisfatan.

Stk. 2. Innihald og førleikamál í yrkislærugreinunum verða lýst í námsætlanunum fyri lærugreinarnar.

§ 6. Skemalagda tímatalið til vallærugreinar, sum eru yrkislærugreinar, er 36 undirvísingartímar, umframt teir í sveinaroyndarskeiðnum.

Stk. 2. Innihald og førleikamál í vallærugreinunum, sum eru yrkislærugreinar, verða lýst í námsætlanunum fyri lærugreinarnar.

§ 7. Fyri hvørt skúlaskeið skipar skúlin fyri eftirmeting í yrkislærugreinunum. Tíðin til eftirmeting er íroknað undirvísingartímatalið fyri einstøku lærugreinarnar.

Stk. 2. Eftirmetingin verður lýst í námsskipani fyri útbúgvingini ella í námsætlanini fyri einstøku lærugreinina.

§ 8. Innihaldið í verkligu læruni verður lýst í námsskipanini fyri útbúgvingina.

Førleikar fyri at halda áfram

§ 9. Fyri at halda á fram á næsta skúlaskeiði, skal lærlingurin hava staðið skúlaskeiðini frammanundan við í minsta lagi 02 í øllum lærugreinum, hava góðkendan lærusáttmála og lúka tær treytir, sum eru ásettar í námsskipanini.

Førleikamál við útbúgvingarlok

§ 10. Førleikarnir, ið lærlingurin skal hava ognað sær við útbúgvingarlok, eru, at hann dugir:

1)   at greiða frá grundleggjandi viðurskiftum um kunningartrygd og nettrygd í sambandi við arbeiðsuppgávur innan yrkið,

2)   at leggja inn og gera grundleggjandi uppseting av neteindum og at finna feilir í netverkinum í sambandi við uppbygging og viðlíkahald av lokalneti,

3)   at luttaka í broytingartilgongdum, tá framleiðslur ella arbeiðsgongdir verða betraðar og gjørdar munadyggari,

4)   at læra frá sær, vegleiða og veita tænastu til brúkarar,

5)   at leggja inn, uppstiga, seta upp og nýta stýrisskipan í einum ambætara, herundir at fremja brúkarafyrisiting og tilfeingisfyrisiting og at leggja inn og seta upp amboð og trygdarloysnir,

6)   at arbeiða eftir skipaðum arbeiðsháttum fyri veiting av kt-tænastum,

7)   at gera og nýta skjalfesting, sum hoyrir til yrkið, eisini á fremmandamáli,

8)   at knýta viðkomandi ástøði og arbeiðshættir at fyrireiking, sniðgeving, uppgávubýti, fremjan, íverksetan, eftirmeting og handan av viðkomandi arbeiðsuppgávum úr verkligu læruni,

9)   at leggja inn, uppstiga, seta upp, umsita og viðlíkahalda netverksambætarar, herundir at finna og rætta feilir,

10) at greina trygdartrupulleikar í einum neti, herundir at sniðgeva, leggja til rættis, seta í verk og seta upp trygdarloysnir í einum neti,

11) at nýta vitlíki, herundir LLM, Large Language Models, sum amboð innan starvsøkið hjá útbúgvingini og at greina virðið av møguligari automatisering og sjálvvirkni,

12) at umsita kt-ognir gjøgnum alla livitíðina við støði í støddini á fyritøkuni, herundir at skráseta, flokka, royna og eftirmeta kt-útgerð, skipanir, brúkararættindi og arbeiðsgongdir,

13) at nýta aktuella fakbókmentir innan yrkið, umframt tíðindakeldur og váðametingar frá viðkomandi myndugleikum,

14) at luttaka í sniðgeving og uppbygging av smærri lokalnetum, herundir at leggja inn og seta upp eindir í einum neti sambært vanligum kt-trygdarstandardum í yrkinum,

15) at arbeiða við atliti til ESD, Electro Static Discharge, og EMC, Electro Magnetic Compatibility, í samsvari við galdandi trygdar- og umhvørvisreglur,

16) at dimensionera, leggja inn, seta upp og uppstiga eina teldu ella ein ambætara við tilhoyrandi tólbúnaði og ritbúnaði, herundir at fremja feilrætting niður á modulstig,

17) at leggja inn og seta upp sambindingar og eindir í einum neti, og at feilfinna á netverki í sambandi við uppbygging og viðlíkahaldi av lokalneti við uttanhýsis sambinding,

18) at leggja inn og seta upp ymisk sløg av trygdaravritum sambært vanligum kt-trygdarstandardum í yrkinum, og

19) at menna script og smærri forrit við nýtslu av scriptmáli.

Sveinaroynd

§ 11. Eftir 3. skúlaskeið skipar skúlin fyri einum sveinaroyndarskeiði, ið varir 5 vikur, 180 undirvísingartímar, sambært § 3, stk. 1, nr. 2.

Stk. 2. Fyri at innskriva seg til sveinaroyndarskeiðið skal lærlingurin hava staðið 1.-3. skúlaskeið, sambært kunngerð um felagsreglur á yrkisnámi, og hava góðkendan lærusáttmála.

Stk. 3. Sveinaroyndarskeiðið fevnir um tríggjar høvuðslutir:

1)   Skemaløgd undirvísing í yrkisvallærugreinum á 72 undirvísingartímar,

2)   eina sveinaroyndarverkætlan á 72 undirvísingartímar, ið fevnir um ein verkligan part og ein ástøðiligan part, sum taka støði í førleikamálunum í útbúgvingini, og

3)   eitt próvtøkutíðarskeið á 36 undirvísingartímar.

§ 12. Til sveinaroyndarverkætlanina skal lærlingurin, einsamallur ella í bólki við í mesta lagi fýra lærlingum, planleggja, skjalfesta og byggja upp eitt kt-umhvørvi til eina fyritøku, stovn ella líknandi.

Stk. 2. Verkætlanin skal í minsta lagi fevna um eitt netverk, ambætarafyrisiting og brúkarafyrisiting, trygdarloysnir og atgongdarstýring, skjalfesting av loysnini og fakliga grundgeving fyri valdum loysnum.

§ 13. Próvtøkan er munnlig og einsæris. Próvtøkan fevnir um eina framløgu, fakliga samrøðu og sýning av verkligu loysnini. Lærlingurin skal greiða frá bygnaði, virknaði, trygd, rakstri, umframt møguligari víðkan og viðlíkahaldi av kt-loysnini.

Stk. 2. Lærlingurin skal vísa, at hann dugir at arbeiða skipað, sjálvstøðugt og fakliga við uppbygging, rakstri og feilfinning í kt-skipanum.

Stk. 3. Lærarin leggur eina ella fleiri villur inn í skipanina, og lærlingurin skal vísa, at hann dugir at finna, avmarka og rætta villuna við skipaðum arbeiðsháttum.

§ 14. Ein lærari og tveir metingardómarar døma sveinaroyndina.

Stk. 2. Eitt próvtal verður latið fyri ástøðiliga partin, grundað á skjalfestingina, munnligu framløguna og fakligu samrøðuna.

Stk. 3. Eitt próvtal verður latið fyri verkliga partin, grundað á sýndu loysnina og praktisku feilfinningina.

Stk. 4. Fyri at standa verkliga og ástøðiliga partin av sveinaroyndini skal lærlingurin hava fingið í minsta lagi próvtalið 02 fyri hvønn partin sær.

Stk. 5. Endaliga sveinaroyndarpróvtalið verður roknað sum eitt miðaltal av próvtalinum fyri ástøðiliga partin og próvtalinum fyri verkliga partin av sveinaroyndini.

§ 15. Við lokna útbúgving fær lærlingurin útflýggjað sveinabræv sum váttan fyri, at hann hevur fingið førleikar innan útbúgvingina.

Gildiskoma

§ 16. Henda kunngerð kemur í gildi dagin eftir, at hon er kunngjørd, og er galdandi fyri lærlingar, sum byrja 1. ella 2. skúlaskeið eftir 1. august 2026.

Mentamálaráðið, 29. september 2026

Bárður á Lakjuni (sign.)

landsstýrismaður

/ Poul Geert Hansen (sign.)