Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
6. mars 2001Nr. 25
Kunngerð um undirvísingarførleika á yrkisskúlum
Við heimild í § 45 í løgtingslóg nr. 94 frá 29. desember 1998 um yrkisútbúgvingar, sum broytt við løgtingslóg nr. 65 frá 10. mai 2000, § 17, stk. 5, í løgtingslóg nr. 107 frá 29. desember 1998 um støðisútbúgving innan fyrisitingar-, handils- og skrivstovuøkið (FHS-útbúgvingar), § 17, stk. 5, í løgtingslóg nr. 41 frá 23. apríl 1999 um støðisútbúgving innan tøkni (SIT-útbúgvingar), § 13, stk. 4, í løgtingslóg nr. 42 frá 23. apríl 1999 um hægri tøkniliga próvtøku (HT-útbúgvingar) og § 13, stk. 4, í løgtingslóg nr. 43 frá 23. apríl 1999 um hægri handilspróvtøku (HH-útbúgvingar), verður ásett:
§ 1. Lærarahópurin á tí einstaka yrkisskúlanum verður settur soleiðis saman, at málini fyri útbúgvingunum, sum skúlin bjóðar út, verða rokkin. Tað verður her í millum tryggjað, at undirvísingin í allari skúlagongdini kann verða gjøgnumførd á ein heildarkunnandi hátt, fevnandi bæði um verkliga og ástøðiliga undirvísing, og at tey, sum eru í útbúgving, fáa neyðugar almennar og serligar førleikar út frá egnum fortreytum.
§ 2. Lærari, sum undirvísir í verkligum yrkislærugreinum, skal, fyri at verða settur í starv, hava grundútbúgving sum yrkislærdur innan viðkomandi fakøki, ella hava hægri viðkomandi útbúgving, umframt vanliga í minsta lagi 5 ára viðkomandi og tíðarhóskandi vinnulívsroyndir.
Stk. 2. Lærari, sum undirvísir í lærugreinum á D-stigi og lægri, skal, fyri at verða settur í starv, í minsta lagi hava hóskandi útbúgving í einum ella fleiri fakøkjum, umframt tíðarhóskandi vinnulívsroyndir.
§ 3. Lærari, sum undirvísir á C-stigi, skal, fyri at verða settur í starv, hava eina viðkomandi hægri útbúgving, í minsta lagi á bachelor-stigi. Síðustillaður við bachelor er lærari við aðrari hægri útbúgving og serfrøðingavitan, ið er fingin til vega gjøgnum yrkisliga eftirútbúgving og arbeiðsroyndir, og sum er góðkend av landsstýrismanninum.
§ 4. Lærari, sum undirvísir á A-og B-stigi, skal, fyri at verða settur í starv, hava viðkomandi útbúgving á kandidatstigi. Í tí einstøku undirvísingarlærugreinini skal hann í minsta lagi hava útbúgving, ið svarar til síðu- ella hjágreinastig. Síðustillaður við kandidat er lærari við aðrari hægri útbúgving og serfrøðingavitan, ið er fingin til vega gjøgnum yrkisliga eftirútbúgving og arbeiðsroyndir, og sum er góðkend av landsstýrismanninum.
§ 5. Landsstýrismaðurin ásetir í samráð við skúlarnar nærri um førleikan at undirvísa í einstøku lærugreinini.
§ 6. Fyri lærarar, sum undirvísa í vinnulívstengdum lærugreinum á A-, B- og C-stigi, eru vanliga í minsta lagi 2 ára tíðarhóskandi vinnulívsroyndir kravdar.
§ 7. Hóast ásetingunum frammanfyri, kann lærari, sum higartil hevur undirvíst í eini lærugrein á gymnasialum stigi uttan at lúka krøvini í §§ 3 og 4, halda fram at undirvísa í henni, treytað av at hansara útbúgvingarliga førleikastøði í seinasta lagi 4 ár eftir, at henda kunngerð er komin í gildi, í minsta lagi svarar til førleikakrøvini í §§ 3 og 4, sbr. eisini § 10. Skúlastjórin og lærarin avtala í felag, hvussu komast kann upp á nevnda støði.
§ 8. Í seinasta lagi 2 ár eftir at lærari er settur í fast starv, skal hann hava tikið námsfrøðiliga útbúgving, sum landsstýrismaðurin skipar fyri ella hevur góðkent, sbr. Námsfrøðikunngerðina, um henda útbúgving ikki er lokin frammanundan.
§ 9. Tað áliggur skúlastjóranum, í samráð við lærararnar, at skipa fakliga og námsfrøðiliga eftirútbúgving við atliti at neyðugari dagføring av førleika læraranna, her í millum í tvørfakligum samstarvi.
Stk. 2. Hvør einstakur lærari hevur sjálvur ábyrgd av, at fakliga og námsfrøðiliga vitan hansara verður hildin viðlíka.
§ 10. Landsstýrismaðurin kann eftir umsókn gera undantøk frá ásetingunum í hesi kunngerð, tá ið hildið verður, at heilt serlig viðurskifti gera seg galdandi. Landsstýrismaðurin kann biðja um tilráðing frá skúlanum í slíkum málum.
§ 11. Henda kunngerð kemur í gildi 1. august 2001.
Mentamálastýrið, 6. mars 2001
Tórbjørn Jacobsen (sign.)
landsstýrismaður
/ Petur Petersen (sign.)
