Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
6. desember 2011Nr. 150
Kunngerð um fíggjarligt ískoyti til sálarfrøðiliga viðgerð hjá privatstarvandi sálarfrøðingi, sum seinast broytt við kunngerð nr. 170 frá 22. desember 2023
1) Við heimild í § 8, stk. 4 í løgtingslóg nr. 178 frá 22. desember 2009 um almenna heilsutrygd, sum broytt við løgtingslóg nr. 13 frá 16. mars 2015, verður ásett:
§ 1. Heilsutrygd veitir ískoyti til viðgerð hjá privatstarvandi sálarfrøðingi til:
1) Ráns-, harðskaps- og neyðtøkuoffur.
2) Ferðslu- og vanlukkuoffur.
3) Avvarðandi til álvarsliga sálarliga sjúk fólk.
4) Fólk, rakt av álvarsligari avlemjandi sjúku.
5) Avvarðandi til fólk, sum eru rakt av álvarsligari avlemjandi sjúku.
6) Avvarðandi við andlát.
7) Fólk, sum hava roynt sjálvmorð og/ella hótt við sjálvmorði.
8) Kvinnur, sum hava fingið framt fosturtøku eftir 12. viku.
9) Fólk, sum hava verið fyri kynsligum ágangi, áðrenn tey fyltu 18 ár.
§ 2. Treytin fyri, at ískoyti verður veitt er, at ein kommunulækni skrivliga hevur ávíst sjúklinginum til viðgerð, áðrenn hon byrjar. Tó kann ein lækni ávísa á annan hátt, um mett verður, at sjúklingurin hevur brúk fyri bráðfeingis sálarligari hjálp. Eftir hetta skal læknin skjótast gjørligt útflýggja eina skrivliga ávísing.
§ 3. Ávísingin kann ikki veitast seinni enn 18 mánaðar eftir, at tilburðurin sambært § 1 er farin fram. Persónar, fevndir av § 1, nr. 9, kunnu tó fáa ískoyti til sálarviðgerð, til tey fylla 25 ár.
Stk. 2.2) Ávísingin er bert galdandi, um sálarfrøðingurin móttekur hana í seinasta lagi tríggjar mánaðir eftir, at hon varð útflýggjað.
§ 4. Ískoyti til gjald fyri viðgerð hjá privatstarvandi sálarfrøðingi kann verða veitt sum einstaklingaviðgerð, tveypersónaviðgerð ella bólkaviðgerð.
Stk. 2. 2) Heilsutrygd veitir 40% í ískoyti til gjald fyri viðgerð hjá privatstarvandi sálarfrøðingi.
Stk. 3. 2) Heilsutrygd veitir fult ískoyti til viðgerð hjá privatstarvandi sálarfrøðingi til persónar millum 15 til 25 ár, ið hava angist ella lætt til moderat tunglyndi. Fult ískoyti verður veitt til í mesta lagi 12 viðgerðir.
Stk. 4. 1) Fyri at fáa fult ískoyti til sálarfrøðiliga viðgerð sambært stk. 3 er tað ein treyt, at persónurin lýkur treytirnar í skjali 1.
§ 5. Viðgerðin frá privatstarvandi sálarfrøðingum skal verða veitt samsvarandi treytunum, sum eru ásettar í sáttmála millum felagið Føroyskir Sálarfrøðingar og Heilsumálaráðið.
§ 6. Henda kunngerð kemur í gildi dagin eftir, at hon er kunngjørd.
Stk. 2. Samstundis fer úr gildi kunngerð nr. 10 frá 11. februar 2000 um ískoyti til sálarviðgerð fyri serliga útsettar bólkar.
Heilsumálaráðið, 6. desember 2011
Karsten Hansen (sign.)
landsstýrismaður
/ Poul Geert Hansen (sign.)
Skjal 1 2)
Treytir fyri at fáa ávísing frá kommunulækna til 12 ókeypis sálarfrøðiligar viðgerðir
Avmarking av persónsbólki við løttum til moderatum tunglyndi
Treytir fyri at persónar við løttum til moderatum tunglyndi eru fevndir av § 4, stk. 3:
1) Persónurin skal vera læknafakliga diagnostisk útgreinaður sambært galdandi kliniskum leiðreglum innan økið; harumframt kann tað gerast ein psykometrisk screening so sum “Major ICD-10 Depression Spørgeskema”.
2) Virkisførleikin hjá persóninum skal vera lætt ella moderat niðursettur orsakað av tunglyndinum hjá persóninum.
3) Sambært eini læknafakligari meting vil persónurin fáa gagn av sálarfrøðiligari viðgerð hjá løggildum sálarfrøðingi, og mett verður harumframt, at tað ikki er nóg mikið við viðtalum hjá kommunulækna sum einasta viðgerð.
Avmarking av persónsbólki við angist
Treytir fyri at persónar við angist eru fevndir av § 4, stk. 3:
1) Persónurin skal vera læknafakliga diagnostisk útgreinaður sambært galdandi kliniskum leiðreglum innan økið; harumframt kann tað gerast ein psykometrisk screening so sum “Angst-Symptom-Spørgeskemaet (ASS)”.
2) Kommunulæknin hjá persóninum skal hava diagnostiserað viðkomandi við einari av niðanfyrinevndu diagnosum (sambært ICD-10 klassifikatiónum):
F40.0 Agorafobi
F40.1 Sosialfobi
F40.2 Einkult fobi
F41.0 Panikkangist
F41.1 Generaliserað angist
F41.2 Lætt angist-tunglyndi
F41.3 Onnur blandað angiststøða
F41.8 Aðrar angiststøður
F41.9 Angiststøða, sum ikki er greinað eftir slagi
F42.0 Obsessiv-kompulsiv atferð
F43.1 Posttraumatisk belastningsreaktión
3) Virkisførleikin hjá persóninum skal vera lætt ella moderat niðursettur orsakað av angiststøðuni hjá persóninum.
4) Sambært eini læknafakligari meting vil persónurin fáa gagn av sálarfrøðiligari viðgerð hjá løggildum sálarfrøðingi, og mett verður harumframt, at tað ikki er nóg mikið við viðtalum hjá kommunulækna sum einasta viðgerð.
