Skrivar tú trygging verður eisini leitað eftir øðrum endingum av orðinum sum t.d. tryggingar og tryggingarvirksemi.
Skrivar tú ?trygging verður leitað eftir orðum sum t.d. lívstrygging og lívstryggingar.
Skrivar tú ”trygging” verður einans leitað eftir júst hesum sniðnum av orðinum.
1. juli 2025Nr. 118
Kunngerð um útbúgving til húsasmið
Við heimild í § 4, stk. 1, § 8, stk. 3, § 14, stk. 1 og 2, § 17, stk. 2 og § 18, stk. 1 og 2 í løgtingslóg nr. 94 frá 29. desember 1998 um yrkisútbúgvingar, sum broytt við løgtingslóg nr. 48 frá 26. mars 2002 og løgtingslóg nr. 52 frá 17. mai 2011, verður ásett:
Um útbúgvingina
§ 1. Í útbúgvingini til húsasmið fær lærlingurin gjøgnum skúlagongd og verkliga læru vitan og førleikar innan hesi kjarnuøki:
1) Ráðlegging og útinnan av arbeiði innan yrkið, har góðskan er sambært lógum, reglum og siðvenju,
2) ráðlegging og útinnan av seruppgávum innan yrkið, tað verður seg nýhugsan og at finna loysnir,
3) ráðgeving og kundatænastu,
4) ráðlegging, samskipan og útinnan av arbeiði í samstarvi við onnur yrki á arbeiðsplássinum, og
5) ráðlegging og útinnan av arbeiði við virðing fyri umhvørvinum og trygdini á arbeiðsplássinum og hjá brúkaranum.
Útbúgvingartíð, bygnaður og innihald
§ 2. Útbúgvingin tekur 4 ár.
Stk. 2. Útbúgvingin er býtt sundur í verkliga læru á góðkendum læruplássi og skúlagongd.
§ 3. Skúlagongdin, íroknað eitt sveinaroyndarskeið, er 55 vikur og verður skipað soleiðis:
1) 1. skúlaskeið, 2. skúlaskeið, 3. skúlaskeið, 4. skúlaskeið og 5. skúlaskeið 50 vikur tilsamans, og
2) sveinaroyndarskeið, 5 vikur
Stk. 2. Skúlagongdin í 1.-5. skúlaskeiði fevnir um almennar lærugreinar, yrkislærugreinar og vallærugreinar. Skemalagda undirvísingartíðin er til samans 1.800 undirvísingartímar.
§ 4. Lærlingurin hevur almennar lærugreinar sum part av útbúgvingini. Almennu lærugreinarnar eru í útgangsstøðinum á E stigi við hesum undirvísingartímatali:
1) Alisfrøði E, 72 undirvísingartímar.
2) Enskt E, 72 undirvísingartímar.
3) Føroyskt E, 72 undirvísingartímar.
4) Støddfrøði E, 72 undirvísingartímar.
5) Vallærugrein E, 72 undirvísingartímar.
Stk. 2. Skemalagda tímatalið til almennu lærugreinarnar er til samans 360 undirvísingartímar, harav 72 undirvísingartímar eru til eina vallærugrein. Lærlingurin velur eina vallærugrein, sum skúlin bjóðar út.
Stk. 3. Innihald og førleikamál í almennu lærugreinunum verða lýst í námsætlanunum fyri lærugreinarnar.
§ 5. Skemalagda tímatalið til yrkislærugreinar er tilsamans 1.200 undirvísingartímar við hesum lærugreinum:
1) Amboðslæra.
2) Arbeiðsumhvørvi.
3) Betong og forskalling.
4) Byggipláss.
5) Eldsløkking.
6) Fyrstahjálp.
7) Góðskutilvitan.
8) Hæddarmáta og avseta.
9) Ísetan av hurðum og vindeygum.
10) Konstruktiónir.
11) Snið, skap og litir.
12) Tekning.
13) Tilfarslæra.
14) Trappur, rimaverk og svalar.
Stk. 2. Innihald og førleikamál í yrkislærugreinunum verða lýst í námsætlanunum fyri lærugreinarnar.
§ 6. Skemalagda tímatalið til vallærugreinar, sum eru yrkislærugreinar, er til samans 150 undirvísingartímar.
Stk. 2. Innihald og førleikamál í vallærugreinunum, sum eru yrkislærugreinar, verða lýst í námsætlanunum fyri lærugreinarnar.
§ 7. Fyri hvørt skúlaskeiði skipar skúlin fyri eftirmeting í yrkislærugreinunum. Til hetta eru ásettir til samans 90 undirvísingartímar.
Stk. 2. Eftirmetingin verður lýst í námsskipan fyri útbúgvingina ella í námsætlanini fyri einstøku lærugreinina.
§ 8. Innihaldið í verkligu læruni verður lýst í námsskipanini fyri útbúgvingina.
Førleikamál við útbúgvingarlok
§ 9. Førleikarnir, ið lærlingurin skal hava ognað sær við útbúgvingarlok, eru, at hann dugir:
1) at hallmáta og hæddarmáta øki, áseta kotur og vatnrættar og loddrættar linjur og velja mátitól,
2) at innrætta eitt byggipláss við atliti at arbeiðsumhvørvi, trygd, gonguvegum, ruskskiljing, veðurviðurskiftum og trivnaðarhentleikum,
3) at luttaka í fyribyrgjandi trygdararbeiði og í fyriskipanini av hesum á arbeiðsplássinum,
4) at lesa vegleiðingar og trygdarvegleiðingar,
5) at gera mongdarútrokningar av tilfari,
6) at gera tekningar og skitsur,
7) at samskifta við viðskiftafólk,
8) at meta um dimensiónir, tilfar, amboð trygdarútgerð, viðlíkahaldstørv og burðardygd,
9) at leggja út undirsløg,
10) at evna til og byggja upp útvegg við klædningi, seta upp klædning á skjøldur og evna til vindskeiðir, úthang og takskegg,
11) at snøra upp, avbinda, evna til, byggja upp yvirtrom,
12) at leggja ymisk sløg av tróðri,
13) at veksla út, seta takvindeygu í og arbeiða við inndekningum til ymisk taksnið,
14) at evna til og leggja skottrennu,
15) at lekta eina yvirtrom til ávís tøk,
16) at evna til takverk við takskeggi og skálkum,
17) at seta í innhurðar og úthurðar og vindeygu við tilsetningum, inndekningum og fugum,
18) at byggja upp og klæða innanveggir,
19) at byggja upp gólv og veggir í einum vátrúmi,
20) at leggja trægólv við parket ella brettum og øðrum líknandi tilfari,
21) at seta upp loft og undirlag til loft,
22) at seta upp fast innbúgv,
23) at máta upp, gera og seta upp trappur, svalar og stakitt,
24) at kenna til ymisk sløg av betongi,
25) at umvæla rotskaðar og soppaskaðar,
26) at bjálva sambært galdandi krøvum og reglum við atliti at burðardygd, og
27) at hava kunnleika til siðbundna føroyska byggilist, so sum greipingar, flagtekju og triðingsreising.
Sveinaroynd
§ 10. Eftir 5. skúlaskeið skipar skúlin fyri einum sveinaroyndarskeiði, ið varir 5 vikur sambært § 3, stk. 1, nr. 2.
Stk. 2. Fyri at innskriva seg til sveinaroyndarskeiðið skal lærlingurin hava staðið 1.-5. skúlaskeið, sambært kunngerð um felagsreglur á yrkisnámi, og hava góðkendan lærusáttmála.
Stk. 3. Sveinaroyndarskeiðið fevnir um tveir høvuðslutir:
1) Skemaløgd undirvísing í yrkislærugreinum á 72 undirvísingartímar, og
2) sveinaroynd, ið fevnir um ein ástøðiligan part og ein verkligan part, sum taka støði í førleikamálunum í útbúgvingini.
§ 11. Ástøðiligi parturin fevnir um eina tekniroynd, skurðmynd, tilfarsútrokning og skjalfesting sum fyrireiking til verkliga partin. Próvtøl verða latin fyri:
1) skjalfesting og framløgu,
2) tekniroyndina, og
3) skurðmyndina við tilfarsútrokning.
Stk. 2. Til tekniroyndina fær lærlingurin 7 undirvísingartímar.
Stk. 3. Til skurðmynd við tilfarslýsing, tilfarsútrokning og tíðarætlan sum fyrireiking til verkliga partin fær lærlingurin 16 undirvísingartímar.
Stk. 4. Lærlingurin fær 21 undirvísingartímar til at fyrireika verkliga partin og framløguna. 30 minuttir eru til próvhoyring íroknað próvtalsgeving.
§ 12. Verkligi parturin fevnir um handverkið sjálvt.
Stk. 2. Til verkligu uppgávuna fær lærlingurin 64 undirvísingartímar.
§ 13. Ein lærari og tveir metingardómarar døma ástøðiliga og verkliga partin.
Stk. 2. Próvtalið fyri ástøðiliga partin verður roknað soleiðis:
1) Skjalfesting og framløga telja 50%.
2) Tekniroynd og skurðmynd við tilfarsútrokning telja 50%.
Stk. 3. Eitt próvtal verður latið fyri verkliga partin.
Stk. 4. Fyri at standa verkliga og ástøðiliga partin av sveinaroyndini skal lærlingurin hava fingið í minsta lagi próvtalið 02 fyri hvønn partin sær.
Stk. 5. Endaliga sveinaroyndarpróvtalið verður roknað sum eitt vektað miðaltal av próvtalinum fyri ástøðiliga partin og próvtalinum fyri verkliga partin av sveinaroyndini. Próvtalið fyri ástøðiliga partin skal vektast við 4/10, og próvtalið fyri verkliga partin skal vektast við 6/10.
§ 14. Við lokna útbúgving fær lærlingurin útflýggjað sveinabræv sum váttan fyri, at hann hevur fingið førleikar innan útbúgvingina.
Gildiskoma
§ 15. Henda kunngerð kemur í gildi dagin eftir, at hon er kunngjørd, og er galdandi fyri lærlingar, sum byrja 1. ella 2. skúlaskeið eftir 1. august 2025.
Barna- og útbúgvingarmálaráðið, 1. juli 2025
Djóni Nolsøe Joensen (sign.)
landsstýrismaður
/ Poul Geert Hansen (sign.)
