Kunngerð nr. 11 frá 6. februar 2023 frá Fjarskiftiseftirlitinum um radiopróvbrøv

6. februar 2023Nr. 11

Kunngerð frá Fjarskiftiseftirlitinum um radiopróvbrøv

Við heimild í § 46, stk. 1 og 2 í løgtingslóg nr. 72 frá 22. mai 2015 um fjarskifti (Fjarskiftislógin) verður ásett:

Nýtsluøki

§ 1. Kunngerðin ásetur neyvari reglur um GOC-radiopróvbrøv, ROC-radiopróvbrøv, LRC-radiopróvbrøv og SRC-radiopróvbrøv, krøv til próvroynd, gildistíð og afturkalling av radiopróvbrøvum.

Allýsingar

§ 2. Í hesi kunngerð merkir:

1)   GMDSS: Global Maritime Distress and Safety System.

2)   GOC: General Operator’s Certificate.

3)   ROC: Restricted Operator’s Certificate.

4)   LRC: Long Range Certificate.

5)   SRC: Short Range Certificate.

6)   MF: Medium Frequency.

7)   HF: High Frequency.

8)   VHF: Very High Frequency.

9)   ECTS: European Credit Transfer System.

10) Radiopróvbrøv: Felagsheiti fyri GOC-próvbrøv, ROC-próvbrøv, LRC-próvbrøv og SRC-próvbrøv.

Próvbrøv

§ 3. Fjarskiftiseftirlitið skrivar út hesi próvbrøv, eftir at próvroynd er staðin:

1)   GOC.

2)   ROC.

3)   LRC.

4)   SRC.

Stk. 2. Innihaldið í próvroyndunum, nevnd í stk. 1, nr. 1-3 er í samsvari við reglugerðunum hjá ITU RR47-1 og STCW A-IV/2 og er ásett í skjali 1, litra a-c.

Stk. 3. Innihaldið í próvroyndini nevnd í stk. 1, nr. 4 er í samsvari við ERC viðmælið 31-04 frá CEPT og er ásett í skjali 1, litra d.

§ 4. GOC-próvbrøv kunnu verða útskrivað fólkum, sum hava fylt 18 ár. LRC-próvbrøv, ROC-próvbrøv og SRC-próvbrøv kunnu verða útskrivað fólkum, sum hava fylt 16 ár.

Stk. 2. Próvroyndin kann í fyrsta lagi takast 3 mánaðir áðrenn, at próvtakarin er fyltur 18 ár.

Stk. 3. Radiopróvbrøv, sum eru útskrivað í samsvar við evropeiska tilráðing, eftir tilráðing frá CEPT, verða javnsett við radiopróvbrøv eftir hesari kunngerð, um próvbrøvini hava eina átekning frá útskrivandi myndugleika um, at próvbrævið er útskrivað sbrt. omanfyri nevndu avgerðum og viðmælum.

§ 5. Útbúgving og roynd fyri radiopróvbrøv fara fram á einum skúla, sum er góðkendur av Fjarskiftiseftirlitinum.

Stk. 2. Fyri at fáa góðkenning krevst, at:

1)  Lærarin hevur galdandi GOC-radiopróvbræv og viðkomandi royndir innan siglingarøkið, og

2)  høli og radioútbúnaður eru tíðarhóskandi og klár at nýta sbrt. § 7.

Stk. 3. Skúlin skal lata Fjarskiftiseftirlitinum eina undirvísingarætlan, áðrenn próvtøkan verður hildin.

Stk. 4. Fjarskiftiseftirlitið kann afturkalla góðkenningina, um skúlin ikki longur lýkur krøvini í stk. 2 og 3.

§ 6. Radiopróvbrøvini skulu hava eina undirvísingarlongd, sum í minsta lagi svarar til 3 ECTS fyri GOC-próvbrøv, 2 ECTS fyri LRC-próvbrøv og 1 ECTS fyri ROC-próvbrøv og SCR-próvbrøv.

§ 7. Í undirvísingini og til verkligar royndir, skal nýtast tíðarhóskandi siglingar radioútbúnaður av teimum radiotólum, sum viðkomandi próvbræv fevnir um.

Stk. 2. Radioútbúnaður til neyðradiostaðfesting EPIRB og SART kann verða ein royndarútgáva.

Stk. 3. Til fylgisveinaútbúnað er tað eitt krav, at næmingurin kann brúka tíðarhóskandi Immarsat-C útbúnað.

Stk. 4. Krav um útbúnað er ikki galdandi fyri bólkarnar SSAS, t.e. Ship Security Alert System, og LRIT, t.e. Long-Range identification and tracking of ships.

Próvtøka

§ 8. Tá ið próvtakarin letur inn umsókn um at sleppa til roynd, skal hann samstundis lata inn eina passmynd til Fjarskiftiseftirlitið.

Stk. 2. Saman við umsóknini skal fylgja ein undirskrivað váttan um, at próvtakarin er kunnaður um ásetingina í altjóða radioreglugerðini hjá ITU um tagnarskyldu.

Stk. 3. Áðrenn royndin byrjar, skal próvtakarin vísa fram samleikaprógv.

§ 9. Próvtøka til GOC-radiopróvbrøv, ROC-radiopróvbrøv, LRC-radiopróvbrøv og SCR-radiopróvbrøv fevnir um ein skrivligan part og ein verkligan part, ið er munnligur.

Stk. 2. Til royndina verða nýtt ummælini “Royndin staðin” og “Royndin ikki staðin”.

Stk. 3. Eru lærarin og próvdómarin ósamdir, avger próvdómarin ummæli.

Stk. 4. Fjarskiftiseftirlitið útvegar tilfar til próvtøkuna, sum próvtakarin skal upp í.

Stk. 5. Krøv til, hvat næmingurin skal duga fyri at standa próvtøkuna, standa í skjali 1 til hesa kunngerð.

§ 10. Lærarin og ein próvdómari, sum Fjarskiftiseftirlitið tilnevnir, døma skrivligu og verkligu royndina.

Stk. 2. Próvdómarin skal hava galdandi GOC-próvbræv.

Stk. 3. Próvdómarin skal tryggja, at próvtøkan fer fram sbrt. galdandi reglum, og at próvtakarar fáa einsháttaða og rættvísa viðferð.

Gildistíð

§ 11. GOC-próvbræv hevur eina gildistíð á 5 ár, frá tí degi royndin er staðin.

Stk. 2. Fyri at endurnýggja GOC-próvbrævið uttan nýggja próvtøku krevst, at próvhavarin skjalprógvar, at hesin hevur:

1)   arbeitt umborð á einum skipi sum radiopassari, har GOC er krav, í minsta lagi í 1 ár seinastu 5 árini ella í minsta lagi í 3 mánaðir innanfyri eitt tíðarskeið á 6 mánaðir, ella

2)   framt annað arbeiði, sum Fjarskiftiseftirlitið metir kann javnmetast við nr. 1.

§ 12. Um próvhavarin ikki lýkur treytirnar í § 11, stk. 2, skal próvhavarin upp til nýggja próvtøku.

Stk. 2. Um próvhavarin ikki ynskir at fara upp til nýggja próvtøku sbrt. stk. 1, kann próvhavarin ístaðin fáa útskrivað eitt LRC-radioprógv ella ROC-radioprógv.

Stk. 3. Ein próvhavari til eitt LRC-radioprógv kann fáa útskrivað eitt ROC-radioprógv.

§ 13. LRC-prógv, ROC-prógv og SRC-prógv eru ikki tíðaravmarkað.

Afturkalling

§ 14. Um Fjarskiftiseftirlitið metir, at tann, ið hevur prógvið, ikki longur hevur tað neyðugu vitanina, ið ein próvhavari eigur at hava, skal hesin upp til nýggja próvtøku.

Stk. 2. Um próvhavarin ikki stendur nýggju próvtøkuna, ella ikki møtir upp til nýggju próvtøkuna, kann Fjarskiftiseftirlitið afturkalla próvbrævið.

§ 15. Fjarskiftiseftirlitið kann afturkalla eitt próvbræv, um próvhavarin ikki yvirheldur altjóða ásetingina í radioreglugerðini hjá ITU um tagnarskyldu sbrt. § 8, stk. 2.

Stk. 2. Fjarskiftiseftirlitið kann afturkalla viðurkenningina sbrt. § 4, stk. 3, um Fjarskiftiseftirlitið metir, at tann, ið hevur prógvið, ikki longur hevur neyðugu vitanina, ið ein próvhavari eigur at hava.

Stk. 3. Prógv og viðurkenningar, ið eru afturkallað, skulu latast Fjarskiftiseftirlitinum.

Gildiskomureglur

§ 16. Henda kunngerð kemur í gildi dagin eftir, at hon er kunngjørd.

Stk. 2. Samstundis fara úr gildi reglugerð nr. 2 frá 16. mai 2004 um treytir at nýta radioútbúnað í radiotænastu á sjónum (siglingarradiopróvbrøv) og reglugerð nr. 1 frá 14. desembur 2012 um at nýta radioútbúnað í radiotrygdartænastu á landi og á sjónum.

 

 

Fjarskiftiseftirlitið, 6. februar 2023

 

Jógvan Thomsen (sign.)

stjóri

/ Louise Restorff Jacobsen (sign.)

 

 

 

 

Skjal 1

 

 

 

Royndarkrøv fyri at fáa eitt GOC-próvbræv, ROC-próvbræv, LRC-próvbrøv og SRC-próvbræv

 

A. Fyri at standa GOC royndina skal próvtakarin:

1) Hava kunnleika um grundleggjandi meginreglur og funktiónir í siglingarflytiligu tænastuni og siglingarflytiligu fylgisveinatænastuni, undir hesum:

i) sløg av samskifti,

ii) sløg av støðum,

iii) frekvensir og frekvensbond,

iv) útbreiðslan av radiobylgjum,

v) samskiftishættir,

vi) sendi og modulasjónshættir,

vii) frekvensir tillutaðir til siglingar radiotænastuna,

viii) fylgisveina infrakervisskipanina,

ix) tænastur í neyðstøðum og trygdarstøðum,

x) virkisfør krøv í samsvari við SOLAS kap. 4.,

xi) sjóøkir,

xii) flutningskrøv og hættir at tryggja tøkan radioútbúnað,

xiv) halda vakt á neyðfrekvensum,

xv) streymveiting, undir hesum neyð- og eyka streymveiting, og

xvi) loyvir, prógv, eftirlit og kanningar.

2) Duga at nýta í einari skipsstøð:

i) VHF radioútbúnað,

ii) MF/HF radioútbúnað,

iii) antennur og sambond,

iv) tiltaks orkukeldur,

v) bjargingar radioútgerð,

vi) DSC,

vii) Radio Telex (NBDP),

viii) NAVTEX, og

ix) fylgisveinaskipanir.

3) Duga at nýta skipaðar mannagongdir innan:

i) neyð-, bráð- og trygdarsamskifti í GMDSS, íroknað ásetingarnar um samskifti í IAMSAR handbókini hjá IMO,

ii) fylgisveinasamskifti,

iii) EPIRB,

iv) SART,

v) AIS-SART,

vi) ógildað neyðaruppkall,

vii) SAR samskifti,

viii) móttøka av trygdarboðum (MSI), og

ix) vanligum samskifti.

4) Hava kunnleika til reglugerðir og avtalur á siglingarøkinum og siglingarfylgisveinaøkinum.

5) Duga at nýta kravd skjøl og útgávur, undir hesum at skriva radiodagbók.

6) Duga so mikið av enskum, bæði skrivligt og munnligt, sum er nøktandi fyri samskifti, sum er týdningarmikið fyri trygdina hjá mannalívum á sjónum.

7) Hava kunnleika til tær týdningarmestu sjóferðsluleiðirnar og altjóða gjaldsskipan, íroknað AAIC kota.

 

 

B. Fyri at standa ROC royndina skal próvtakarin:

1) Hava kunnleika um grundleggjandi meginreglur og funktiónir í siglingarflytiligu tænastuni og siglingarflytiligu fylgisveinatænastuni, undir hesum:

i) sløg av samskifti,

ii) sløg av støðum,

iii) frekvensir og frekvensbond,

iv) útbreiðslan av radiobylgjum,

v) samskiftishættir,

vi) sendi og modulasjónshættir,

vii) frekvensir tillutaðir til siglingar radiotænastuna,

viii) virkisfør krøv í samsvari við SOLAS kap. 4.,

ix) sjóøkir,

x) flutningskrøv og hættir at tryggja tøkan radioútbúnað,

xi) halda vakt á neyðfrekvensum,

xii) streymveiting, undir hesum neyð- og eyka streymveiting, og

xiii) loyvir, prógv, eftirlit og kanningar.

2) Duga at nýta í einari skipsstøð:

i) VHF radioútbúnað,

ii) antennur og sambond,

iii) tiltaks orkukeldur,

iv) bjargingar radioútgerð,

v) DSC, og

vi) NAVTEX.

3) Duga at nýta skipaðar mannagongdir innan:

i) neyð-, bráð- og trygdarsamskifti í GMDSS, íroknað ásetingarnar um samskifti í IAMSAR handbókini hjá IMO,

ii) EPIRB,

iii) SART,

iv) AIS-SART,

v) ógildað neyðaruppkall,

vi) SAR samskifti,

vii) móttøka av trygdarboðum (MSI), og

viii) vanligum samskifti.

4) Hava kunnleika til reglugerðir og avtalur á siglingar- og siglingarfylgisveinaøkinum.

5) Duga at nýta kravd skjøl og útgávur, undir hesum at skriva radiodagbók.

6) Duga so mikið av enskum, bæði skrivligt og munnligt, sum er nøktandi fyri at tryggja samskifti, sum er týdningarmikið fyri trygdina hjá mannalívum á sjónum.

7) Hava kunnleika til tær týdningarmestu sjóferðsluleiðirnar og altjóða gjaldsskipan, íroknað AAIC kota.

 

 

C. Fyri at standa LRC royndina skal próvtakarin:

1) Hava kunnleika til grundleggjandi meginreglur fyri siglingar radiotænastur, undir hesum:

i) sløg av samskifti,

ii) sløg av støðum,

iii) frekvensir og frekvensbond,

iv) frekvensstaðseting og nýtslan av hesum,

v) fylgiseinaskipanir,

vi) bygnaðurin á GMDSS skipanini,

vii) SAR, og

viii) Maritime Safety Information (MSI).

2) Duga at nýta:

i) VHF radioútbúnað,

ii) MF/HF radioútbúnað,

iii) DSC (Digital Selective Calling), og

iv) antennur, markamót og streymveiting.

3) Duga at nýta skipaðar mannagongdir innan:

i) neyð-, bráð- og trygdarsamskifti í GMDSS, íroknað ásetingarnar um samskifti í IAMSAR handbókini hjá IMO,

ii) Maritime Mobile Satellite Service, og

iii) ávaring, samskifti og staðfesting.

4) Hava kunnleika til tær týdningarmestu sjóferðsluleiðirnar og altjóða gjaldsskipan, íroknað AAIC kota.

5) Duga at nýta tjóðar og altjóða reglugerðir og mannagongdir, sum krevjast umborð á skipum.

6) Hava kunnleika til reglugerðir og avtalur á siglingar- og siglingarfylgisveinaøkinum.

7) Duga at nýta kravd tjóðskaparlig og altjóða skjøl og útgávur, undir hesum at skriva radiodagbók.

 

 

D. Fyri at standa SRC royndina, skal próvtakarin:

1) Hava kunnleika til grundleggjandi meginreglur og avgerðandi virkisføri fyri siglingar radiotænastur, undir hesum:

i) bygnaðin á GMDSS skipanini,

ii) SAR, og

iii) Maritime Safety Information (MSI).

2) Duga at nýta:

i) VHF radioútbúnað,

ii) DSC (Digital Selective Calling), og

iii) antennur, markamót og streymveiting.

3) Duga at nýta skipaðar mannagongdir innan:

i) neyð-, bráð- og trygdarsamskifti í GMDSS,

ii) vernd av neyðfrekvensum, og

iii) ávaring, samskifti og staðfesting.

4) Duga at nýta mannagongdir innan radiotelefonmannagongdir innan:

i) Samskifti, sum er viðkomandi fyri trygdina á sjónum, og

ii) radiosamskiftismannagongdir.

5) Hava kunnleika til mannagongdir fyri VHF samskifti.