Kunngerð nr. 68 frá 18. juni 2008 um avreiðing av livur og treytir fyri tillutan av eyka fiskidøgum

KUNNGERÐ NR. 68 FRÁ 18. JUNI 2008 UM AVREIÐING AV LIVUR OG TREYTIR FYRI TILLUTAN AV EYKA FISKIDØGUM

Kunngerð nr. 68 frá 18.06.2008

Nr. 68

18. juni 2008

Við heimild í § 29, stk. 10 í løgtingslóg nr. 28 frá 10. mars 1994 um vinnuligan fiskiskap, við seinni broytingum, verður ásett:

§ 1. Kunngerðin fevnir um avreiðing av livur til virkingar í Føroyum frá fiskiførum í høvuðsbólkunum 2, 3 og 4, sbrt. § 28, og treytir fyri at fáa lut í eyka fiskidøgum í hesum sambandi.

   § 2. Í fiskiárinum 2007/2008 eru, fyri høvuðsbólkarnar 2, 3 og 4, tillutaðir ávikavist 127, 79 og 125 fiskidagar tilsamans millum tey fiskifør, sum avreiða livur.
   Stk. 2. Fiskifar í høvuðsbólki 2, partrolarar, kann fáa 6 fiskidagar fyri tey fyrstu 10 tonsini av livur, sum verða avreidd. Fyri hvørji 4 tons, sum síðani verða avreidd, verða 2 eyka fiskidagar tillutaðir.
   Stk. 3. Fiskifar í høvuðsbólki 3, línuskip, kann fáa 6 fiskidagar fyri tey fyrstu 5 tonsini av livur, sum verða avreidd. Fyri hvørji 3 tons, sum síðani verða avreidd, verða 2 eyka fiskidagar tillutaðir.
   Stk. 4. Fiskifar í høvuðsbólki 4, útróðrarbátar yvir 15 tons, kann fáa 5 fiskidagar fyri tey fyrstu 1,5 tonsini av livur, sum verða avreidd. Fyri hvørt tons, sum síðani verður avreitt, verða 2 eyka fiskidagar tillutaðir.
   Stk. 5. Um fiskidagar eftir stk. 1 ikki eru brúktir fyri 1. juni 2008, kunnu teir brúkast samsvarandi § 3.

   § 3. Í fiskiárinum 2007/2008 eru, fyri høvuðsbólkarnar 2, 3 og 4, tillutaðir ávikavist 42, 26 og 42 fiskidagar eyka at brúka í sambandi við verkætlanir um gagnnýtslu av livur, ella til serligar avtalur millum virki og fiskifør, ið hava til endamáls at gagnnýta livur.
   Stk. 2. Fiski- og tilfeingismálaráðið skal góðkenna møguligar verkætlanir ella avtalur millum virki og skip.
   Stk. 3. Eykadagar verða tillutaðir, eftir at Fiski- og tilfeingismálaráðið hevur givið sína góðkenning, og tá ætlaðu nøgdirnar av livur eru avreiddar.
   Stk. 4. Um fiskidagar eftir stk. 1 ikki eru brúktir fyri 1. juni 2008, kunnu teir brúkast samsvarandi § 2.

§ 4. Fiskidagar sbrt. §§ 2 og 3 verða lagdir afturat fiskiloyvinum hjá viðkomandi fiskifari, tá Fiski- og tilfeingismálaráðið hevur fingið skjalprógv frá keypara fyri, at ásettu nøgdirnar av livur eru avreiddar til virkingar í Føroyum.

§ 5. Henda kunngerð kemur í gildi dagin eftir, at hon er kunngjørd, og hevur virknað frá 1. september 2007. Kunngerðin fer úr gildi 31. august 2008.

Fiski- og tilfeingismálaráðið, 18. juni 2008

Tórbjørn Jacobsen (sign.)

landsstýrismaður

/ Rógvi Reinert (sign.)