KUNNGERÐ NR. 126 FRÁ 21. SEPTEMBER 2001 UM ALMENT PRÓVSKEIÐ Í FØROYSKUM Á FRÓÐSKAPARSETRI FØROYA

---

Kunngerð nr. 126 frá 21.09.2001

---

Nr. 126

21. september 2001

   Við heimild í § 1, stk. 2 í løgtingslóg nr. 65 frá 21. mai 1987 um Fróðskaparsetur Føroya, sum seinast broytt við løgtinglóg nr. 84 frá 13. juni 1995 verður fyrisett:

   § 1. Á Fróðskaparsetri Føroya verður skipað fyri almennum próvskeiði í føroyskum.

   § 2. Endamálið er at menna førleikan at nýta málið sum amboð á ein góðan og fjøltáttaðan hátt og at økja fatanina av føroyskum máli og nýta tað í arbeiði, gerandislívi og til hægri lestur. Skeiðið skal økja um innlitið í føroyskt mál og menna tilvitið um mál og málnýtslu bæði í talu og skrift.

   § 3. Skeiðið fevnir um:

1)	Mállæru og venjingar í rættskriving
2)	Upplestur og orðaskifti
3)	Viðgerð av fjølbroyttum tekstum
4)	Málburð og ymisk stílløg

   § 4. Skeiðið byggir á ávísan forkunnleika, svarandi til føroyskt á miðnámsskúlastigi ella samsvarandi.

   § 5. Skeiðið endar við próvtøku.

   § 6. Til tess at standa krevst í minsta lagi 6 í miðal, tó skal einki einstakt próvtal vera lægri enn 5.

   § 7. Kæra um próvtøkuhald og próvtøkudøming skal skrivliga verða latin setursskrivstovuni í seinasta lagi vikudagin eftir, at próvtøkuúrslitið er kunngjørt. Kæra verður viðgjørd av kærunevnd, ið rektarin setur. Avgerð kærunevndarinnar er endalig.

   § 8. Sami próvdómari er til allar stakroyndir í próvtøkuni. Hann verður tilnevndur av rektaranum.

   § 9. Henda kunngerð kemur í gildi dagin eftir, at hon er kunngjørd.

Mentamálastýrið, 21/9-2001

Óli Holm (sign.)

Landsstýrismaður

/ Petur Petersen (sign)