Kunngerð nr. 56 frá 31. mai 1999 um flutning av fiski

KUNNGERÐ NR. 56 FRÁ 31. MAI 1999 UM FLUTNING AV FISKI

Kunngerð nr. 56 frá 31.05.1999

Nr. 56 31. mai 1999

   Við heimild í § 3 í løgtingslóg nr. 14 frá 3. mars 1999 um stuðul til flutning av fiski verður ásett:

   § 1. Til flutning av fiski, livur og rogni frá uppboðssølu ella landingarmiðstøð til virkingar í økjum, har firðir ella sund skilja, verður latin upp til 31 oyru/kilo í flutningstuðli til tann partin av flutningskostnaðinum, sum er omanfyri 10 oyru/kilo.
   Stk. 2. Sum landingarmiðstøð er at skilja stað, har fiskur verður landaður, skildur v.m. til at selja beinleiðis ella um uppboðssølu til fiskakeyparar.

   § 2. Til flutning av fiski, livur og rogn frá útróðrarbátum úr økjum, har eingin uppboðssøla er, verður latin upp til 10 oyru/kilo í flutningstuðli til tann partin av flutningskostnaðinum, sum er omanfyri 5 oyru/kilo, til at flyta fisk, livur og rogn til nærmastu uppboðssølu.

   § 3. Til flutning av feskum virkaðum fiski, livur og rogn frá fiskavirki til avskipingarhavn, har firðir ella sund skilja, verður latin upp til 31 oyru/kilo í flutningstuðli til tann partin av flutningskostnaðinum, sum er omanfyri 10 oyru/kilo.
   Stk. 2. Virkaður feskur fiskur, er fiskur, sum er meira hagreiddur enn sløgdur, avhøvðaður, vaskaður, ísaður og lagdur í kassar ella pakning.

   § 4. Hendan kunngerð kemur í gildi dagin eftir, at hon er kunngjørd, og er galdandi frá 18. mars 1999.
   Stk. 2. § 3 fer úr gildi 31. desember 1999.
Fiskimálastýrið, 31. mai 1999

Jørgen Niclasen (sign.)
landsstýrismaður
/ Kaj P. Mortensen (sign.)