Kunngerð nr. 45 frá 21. april 1995 um reglur fyri nevndina fyri stuðli til nýggjar vinnur.

KUNNGERÐ NR. 45 FRÁ 21. APRIL 1995 UM REGLUR FYRI NEVNDINA FYRI STUÐLI TIL NÝGGJAR VINNUR.

Kunngerð nr. 45 frá 21.04.1995

Við heimild í § 1, stk. 2 í løgtingslóg nr. 17 frá 1. februar 1995 um stuðul til nýggjar vinnur hevur landsstýrið fyrisett:

§ 1. Nevndin er sett sambært § 1, stk. 2 í løgtingslóg nr. 17 frá 1. februar 1995 um stuðul til nýggjar vinnur.
Stk. 2. Heiti og heimstaður nevndarinnar er: Nevndin fyri nýggjar vinnur, R. C. Effersøesgøta 30, Postrúm 179, 110 Tórshavn.

   § 2. Nevndin hevur til uppgávu at taka avgerð um, hvør vinna kann metast sum nýggj.
   Stk. 2. Bert virkir við føstum rakstrarstaði í Føroyum kunnu fáa stuðul.
   Stk. 3. Arbeiðið, ið treytar lønina, sum er grundarlag fyri studninginum, skal vera gjørt ú Føroyum ella umborð á skipi, skrásett í Føroyum og har veruliga leiðslan er í Føroyum.
   Stk. 4. Landsstýrið ger reglur fyri umsiting og eftirlit av studninginum.

   § 3. Nevndin hevur tríggjar limir, allir settir av landsstýrinum.
   Stk. 2. Nevndin skipar seg sjálva.
   Stk. 3. Til umsiting av nevndarvirkseminum hevur nevndin skrivara, ið landsstýrið setur.

   § 4. Nevndin hevur fund so ofta, tað er neyðugt fyri at røkja uppgávur nevndarinnar. Nevndin er viðtøkufør, tá í minsta lagi 2 limir eru á fundi. Avgerðir verða tiknar við vanligum atkvøðumeiriluta. Um atkvøðurnar standa á jøvnum, og um formaðurin er til staðar, er atkvøða formansins avgerandi.
   Stk. 2. Avgerðir nevndarinnar eru endaligar, og kunnu ikki kærast til aðrar fyrisitingarligar myndugleikar.
   Stk. 3. Fundir nevndarinnar verða førdir í gerðabók. Gerðabókin verður undirskrivað av øllum limunum, ið eru á fundi. Nevndarlimur kann krevja, at hansara atkvøðugreiðsla við viðmerkingum verður førd í gerðabókina. Í gerðabókini kunnu harumframt verða førd onnur viðurskifti, ið kunnu hava nevndarinnar áhuga.
   Stk. 4. Nevndin og skrivaraembætið fáa samsýning eftir avtalu við landsstýrið.

§ 5. Nevndin kann við vanligum atkvøðumeiriluta gera tilmæli um broyting í reglugerðini fyri nevndina til landsstýrið, ið ger av, um reglugerðin skal broytast.

§ 6. Henda kunngerð fær gildi dagin eftir, at hon er kunngjørd.